[1] Seerri ammoo gaaddidduu waan gaggaarii kanneen dhufa jiranii ti malee, zaata aslii kan isaan ittiin mullatanii miti; kanaaf jecha, aarsaalee baruma baraan odoo gargar hin kutin dhiheeyfaman saniin, seerri warra ibaaduuf dhihaatan san raawwatee fiinxaan baasuu gonkumaa hin dandeenye.
[2] Ummanni Rabbi ibaadu sun, odoo dhugumaan waan dilii isaanii irraa xaaharaman taatee, silaa dilaawummaan, kanaa achi isaanitti hin dhagayamu ture; ammaas aarsaan dhihaatu hundi niis ni hafa ture.
[3] Ammoo aarsaan dhiheeyfaman sun, baruma baraan dilii isaanii ti namoota yaadachiisu.
[4] Kuniis wanni tahuuf, dhiiyni kormaa tii fi ammaas kan re'ee tiis, dilii nama irraa fuudhuu gonkumaa waan hin dandeenyeef jecha.
[5] Kanaaf jecha Kiristoos, gara biyya addunyaa wayta dhufe, “Ati aarsaa fi kannaas hin barbaanne, ammoo jasada anaaf qopheeysitee ti jirta.
[6] Ati aarsaa gubamutti, aarsaa diliif dhihaatuttiis hin gammanne;
[7] kanaaf jechaan, ‘Kitaaba maramu keeysatti ana laalchisuun akkuma barreeyfamee jiru sanitti, yaa Rabbi, ani kunoo fedha kee godhee raawwachuuf dhufee tiin jira’” jedha.
[8] Jalqaba, “Ati aarsaa fi kannaas, aarsaa gubamuu fi, ammaas aarsaa diliif dhihaatuus hin barbaanne, ittiis hin gammanne” jedhe; tanaas isaan kanneen akka dhiheeyfaman ajajni seeraa oduma jiruu ti jedhe.
[9] Ammaas itti dabalee ti, “Ani kunoo ti, fedha kee raawwachuuf jecha dhufee tiin jira” jedhee ti jira; kanaaniis aarsaa lammaffaa bakka buusuuf jecha, kan duraa san bakkaahi isa fuudhe.
[10] Akka fedhii Rabbii sanitti, jasadni Yesuus Kiristoos, aarsaa wayta hundumaa akka tahuuf, wayta takka dhiheeyfamuu isaa tiin nutiis qulqulleeyfamnee ti jirra.
[11] Lubni guyyuu dhaabbatee, tajaajila lubummaa isaa ni kanna; aarsaa dilii, kan namoota irraa dilii bara baraaf fuudhuu hin dandeenye saniis deddeebi'ee ti dhiheeysa.
[12] Kiristoos ammoo, waytuma takka bara baraaf aarsaa dilii dhiheeysee ti, gara harka mirga Rabbii tiin taa'e.
[13] Achi taa'ee ti, diinonni isaa ejjeta miillan isaa hanga Rabbiin godhamanitti eeggata.
[14] Waytuma takka qofaaf aarsaa dhiheeysuu dhaani, warra Rabbiif qulqulleeyfaman bara baraaf akka guutummatti raawwataman isaan godhe.
[15] Ruuhal Qudus ammaas waa'ee kanaa laalchisuun ragaa nuuf baha.
[16] Inni duraan dursee, “Guyyoota san keeysatti irbuun ani isaaniif seenee kakadhu, ‘Seera kiyya qalbii isaanii keeysaan kaaya, qalbii isaanii keeysattiis niin kataba’ jedha Gooytaan” jedhee ti ragaa bahe.
[17] Itti dabalee tiis, “‘Ani Rabbi dilii isaanii tii fi, jallina isaanii tiis asii achi deebi'ee hin yaadadhu’ jedhee ti jira” jedha.
[18] Isaan kanneeniif eega oomfiin godhamte, asii achi aarsaan diliif jecha dhihaatu hin jiru.
[19] Eegaa yaa obboleeyyan kiyya! Dhiiga Yesuus nuuf dhangalaaseen bakka hundumaa irra caalaa qulqulluu taatetti galuun, bar saattisaratti nuuf banamee ti jiraa.
[20] Kunoo Yesuus karaa haaraya, karaa jiraataa golga keeysaan, jechuun karaa jasada isaa tiin nuuf banee ti jira.
[21] Nuti lubicha guddaa, kan mana Rabbii irratti shuumame qabna.
[22] Kanaaf jecha, qalbiin teenya, jallina xalalii irraa xaaharamtee, ammaas qaamni keenyaas bishaan xaaharaan dhiqamee, koottaa mee garumaa fudhannee amantii mirkana qabduun gara Rabbii haa dhihaannuu!
[23] Rabbiin abdii nuuf kanne amanamaa waan taheef jecha, koottaa abdii nuti beeysifnu irraa odoo hin sossoohin, jabeeysinee haa qabannuu!
[24] Jaalala agarsiisuu fi keeyraata hojjachuu irrattiis, mee wal haa mimirqaansinuu!
[25] Eegaa, akkuma namoonni tokko tokko wal-gahii teenya irraa hafuu aadaa godhatanitti odoo hin tahin, nuti walitti qabamuu keenya san akka gadi hin dhiifne, guyyaan Gooytaa dhihaachaa deemuu arkuu dhaan, inumaatuu irra caalatti wal haa jajjabeeysinuu!
[26] Nuti beekumsa dhugaa dhaa eega arkanne booddee, beekaatuma dilii hojjachuu yoo kan itti furru taane, aarsaan dilii dhaa, bar asii achi nuuf hin hafnee!
[27] Ammoo, firdii sodaachiftuu fi ibidda azaabaa kan adawwoota Rabbii dam-godhu qofaatu hafe.
[28] Namni Seera Musee tiif hin ajajamne, ragaan lama yookiin sadih itti baanaan, rahamata tokkoon maleetti ajjeefama.
[29] Keeysaa huu namticha Ilma Rabbii tuffate, kan dhiiga irbuu kan isa qulqulleeyse akka najisatti laale, ammaas kan Ruuhaa ni'imaa kannu arrabsu, hammam caalaatti kan iqaabamu isinitti fakkaata ree?
[30] Eegaa, “Ana, kan hijaa baasu, kan deebisee kafaluufiis” ammaas, “Gooytaan ummata isaatitti firdi godha” eenyu akka jedhe nuti ni beeyna.
[31] Rabbii Jiraataa harkatti kufuun, heddu nama sodaachisa.
[32] Guyyoota dur dabran keeysatti, eega ifa arkattan booddee, rakkoon adda addaa isin mudatan illee, obsaan dandeeysanii dhaabbachuu keeysan ammoo mee yaadadhaa!
[33] Wayta takka takkaas isin, zaahiritti ummata duratti arrabfamaa mashaqqaa arkaa, wayta taaniis warra akkas mudatan wajjiiniis rakkachaa ti turtan.
[34] Isin warra mana hidhaatti ugguramaniif naatan, ammaas saamamuu qabeenya keeysanii illee, gammachuuni fudhattan; tanaas godhuu wanni dandeeysaniif, qabeenya caalaa abad tahe qabaachuu keeysan waan beeytaniif jecha ture.
[35] Eegasuu, amantaa qabdan tana, faaydaa guddaa waan qabduuf jecha, hadaraa jabeeysaa qabaa!
[36] Fedhii Rabbii gootanii, waan Rabbi abdachiise san arkachuuf obsaan dandayuu tu isin barbaachisa.
[37] Barreeyfamni Qulqulluun, “Waytuma gabaabduu tu hafe, inni dhufa jiru suniis, ni dhufa malee hin dhibaawu;
[38] inni qaceelaan kiyya: amantii dhaan jireenya dhugaa ti arkata; inni yoo kan na ganu tahe ammoo, garaan kiyya itti na hin gammadu” jedha.
[39] Nuti ammoo, warra amananii najaa bahan irraahi malee, warra amantii gananii turaab godhaman irraahii miti.