[1] Amma gaa amantii jechuun, wanni abdiin eeggatan akka taatu mirkanii qabaachuu, wanni ijatti hin mullanne jiraachuus fudhachuun mirkaneeyfachuu dha.
[2] Warri dur, amantitti Rabbi duratti faarfamanii ti jiru.
[3] Bantiiwwan samii tii fi dachiiniis, akka Qoowlii Rabbii tiin uumaman amantii dhaani hubanna; akkasitti wanni kanneen ijatti mullatan, waan ijatti hin mullanne irraa tolfaman.
[4] Abeel, amantii dhaan aarsaa Qaayyin dhiheeyse irra caalu Rabbiif dhiheeyse; Rabbiis kannaa isaa faarsee waan fudhateef jecha, Abeel amantii isaa tiin qaceelaa akka tahe ragaa dha baheefi. Inni du'u illee ammoo, ammumaa huu amantii isaa tiin dubbachaa ti jira.
[5] Henook, du'a akka hin dhamdhamneef, jireenya biyya addunyaa tana irraa amantii dhaan ol fuudhatame; Rabbi waan isa fudhateefiis hin arkamne; ol fudhatamuu isaa dura ammoo, Rabbi gammachiisuun isaa ragaan bahee tiifi jira.
[6] Amantii dhaan maleetti ammoo, Rabbi gammachiisuun hin dandayamu. Gara isaa kan dhufu eenyu illee taanaan, Rabbi akka jiruu fi ammaas warra isa barbaadaniif ujuraa akka isaaniif kafalu, amanuu tu irra jira.
[7] Noohi, waan ijaan arkuu hin dandeenye tan hegere taati jedhee, Rabbi isa akeekkachiise san dhagayee, amantii dhaan markaba ijaaree ti haaskaa isaa eewaluu dandaye; ammaas amantii isaa tiin biyya addunyaa irratti yakka muree ti qaceelina amantii dhaan dhuftuu nama dhaalu tahe.
[8] Abrahaam, bakka itti deemu odoo hin beekin, biyya isaa tii bahee gara biyya dhaalaaf hegere fudhachuuf taa'uu, akka dhaqu wayta Rabbi isa yaame amantii dhaan ajajame.
[9] Amantii dhaan biyya isaaf abdachiifamte san keeysa, akka nama biyya ambaatti qubate; Yisihaaqii fi Yaaqoob, warra isaa wajjiin abdii dhaaluuf deeman wajjiin dunkaana keeysa jiraate.
[10] Inni magaalaa bu'ura jabaa qabu, kan Rabbi akeekee ijaare tokko eeggachaa ti ture.
[11] Rabbiin abdii kanneef amanamaa tahuu isaa, Abrahaam waan amaneef jecha, umriin isaa deemtu illee, ammaas Saaraaniis dubartii dhabduu taatuus ammoo, amantii dhaan akka ilmoo arkatan ni dandeeysifaman.
[12] Eegaa, haala kanatti namticha tokkicha, sanuu kan nama du'aa irra hin jirre kana irraa, shanyiin akka urjiilee samii keeysaa hedduu dhaa, ammaas akka hashawwaa bahar qarqaraa tan lakkaawamuu hin dandeenyetti hoddomaatan.
[13] Jarreen kun, waan abdachiifaman san fudhachuu baatan illee, amantii isaanii odoo gadi hin dhiisin du'an; haa tahu malee, waan abdachiifaman san fagootti daawwatanii ti salaam jedhaniin; biyya addunyaa tana irrattiis, nama ambaa tii fi imaltu-yaatuu tahuu isaanii zaahiritti fudhatanii ti jiru.
[14] Namoonni waan akkasii dubbatan biyya isaanii tiif yaadaan dharra'aa akka jiran agarsiisu.
[15] Biyya keeysaa bahan san waan yaadan odoo taahanii, isiitti deebi'uuf silaa carraa ni qabaatu turan.
[16] Sanii mannaa ammoo, isaan biyya san irra caaltu hawwaa ti turan, isiin saniis tan samii irraa ti; akkana waan taheef, Rabbiin biyya isaaniif qopheeyse: “Rabbii keenya” isaan jechuu isaaniititti, inni if hin qaanfatu.
[17] Abrahaam wayta Rabbiin fitiname, amantii dhaan Yisihaaq aarsaaf dhiheeyse; isuma kan abdii arkate sanii tu ilma isaa tokkicha aarsaa dhiheeysuuf qophaawe.
[18] Ilmi isaa kuniis isuma Rabbi, “Yisihaaqiini shanyiin siif lakkaawamti” jedhee dubbateef san ture.
[19] Rabbi du'a keeysaa nama kaasuu akka dandayu, Abrahaam hubannoo qaba ture; haaluma kana fakkaatuuni inni ilma isaa akka waan du'a keeysaa deebi'ee arkatetti lakkaawama.
[20] Yisihaaq amantii dhaan Yaaqoobii fi Esaawu waan hegere tahuuf deemu laalchisuun eeybise.
[21] Yaaqoob wayta du'uu jala gahe, bordoo isaa irratti gadi gombobee sagaduun, amantii dhaan ilmaan Yoseef adduma addaan eeybise.
[22] Yoseef dhuma umrii isaa jala wayta gahe, ummanni Israa'el akka biyya Misraa tii bahu, amantii dhaan hubatee dubbatee ti, waa'ee lafee isaa tiifiis isaanitti dhaammate.
[23] Wayta Museen dhalate, abbaan isaa tii fi haati isaa mucichi akka nama gammachiisu arkanii ti, ajaja mootichaa ti illee odoo hin sodaatin, amantii dhaan ji'a sadihiif isa dhooysan.
[24] Museen eega guddate booddee, amantii dhaan ilma intala Fara'oon jedhamee yaamamuu dha dide.
[25] Inni wayta gabaabduuf jiruu diliitti gammaduu mannaa, ummata Rabbii tiin wajji hiraaramuu dha filate.
[26] Inni ija isaa ujuraa isaa tan hegeree irra waan kaayeef jecha, badhaadhummaa Misraa hundumaa irra, sababa Masiihichaa tiif arrabsamuun, gatii caalu akka qabutti lakkaawe.
[27] Inni amantii dhaan lola Fara'oon odoo hin sodaatin, biyya Misraa tii bahee; akka waan Rabbii ijatti hin mullannee san arketti, odoo if duuba hin deebi'in jabaatee ti hafe.
[28] Inni amantii dhaan Ayyaana Bira Dabruu godhuu dhaan maleeykaan angafa hundumaa ajjeesu san, akka angafoota Israa'el hin tuyneef, dhiiga balbalatti isaan dibsiise.
[29] Ummanni Israa'el amantii dhaan akka nama lafa goggooyduu irra deemutti bahar diimaa gama ceehan; warri Misraa akkuma isaanii godhuuf wayta yaalan ammoo ni liqimfaman.
[30] Ummanni Israa'el amantii dhaan, Yerikoo marsanii, guyyaa torba eega itti naannawan booddee, dallayni darbii ni jige.
[31] Rahaab dubartiin ejjituun, warra basaasota Israa'el nagayaan waan simatteef jecha, amantiin eewalamte malee, warra ajajamuu didan wajjiin hin ajjeefamne.
[32] Ammaas kana caalaa maal haa dubbadhu ree? Waa'ee Gidewoon, Baaraaq, Siimson, Yiftaa, Daawwid, Saamu'el, akkasumatti waa'ee nabiyyootaa isiniif haasawuuf wayta hin qabu.
[33] Isaaniis amantii dhaan mootummoota moohanii, haqaan bulchanii, waan abdachiifamees arkatanii, ammaas afaan leencotaa tiis warra cufani.
[34] Ibidda holotaas ni dhaamsan, qara habalee jalaahiis ni bahan, dadhabbii irraa jabina arkatanii, lolatti jajjaboo dha tahan, loltuu biyya ambaa tiis guuysanii ti jiru.
[35] Dubartoonni firoota isaanii warra duraan du'an, du'aa kaafamnaanii fi deebisaanii fudhatanii ti jiru. Warri kaan qiyaamaa irra wayyaa dhaa arkachuuf jecha, gadi dhiifamuu didanii harka warra isaan hiraarsanitti du'an.
[36] Warri hangi tokko itti qoosaman, ni garafaman, shanshalataan hidhamanii ti mana hidhaatti galfaman.
[37] Dhagaan rukutaman, minshaaraan bakka lamatti gargar baqayfaman, habaleen ajjeefaman, gogaa hoolaa yookiin kan re'ee uffatanii nannaannawan, deegan, akka malee godhaman, miidhamaniisi.
[38] Biiyti addunyaa dhaa isaaniin tan hin malle turte; amma ammoo isaan biyya addunyaa tanaaf warra hin malletti lakkaawamanii, huffee gammoojjii tii fi gaarran gubbaa nannaannawaa, holqaa fi boolla lafaa keeysa jiraatan.
[39] Isaan kun hundinuu amantii isaanii tiif yoo faarfaman illee, ammoo waan abdachiifame san hin arkanne turan.
[40] Rabbi, waan nuuf irra wayyaa dhaa akeekuu dhaan, isaan numaan wajji yoo tahan qofa, akka guutummatti fiinxaan bahan godhe.