[1] Malkiisedeeq mootii Saalem kun, ammaas luba Rabbii waan hundumaa irraa ol jiruu ti ture; gaaf tokko Abrahaam mootoota tokko rukutee, moohatee odoo gala-deebi'aa jiruu, Malkiisedeeq, karaa irratti isa afaan bahee ti isa eeybise.
[2] Abrahaam ammoo waanuma qabu hundumaa irraa huu, kudhan keeysaa tokko qoodeefi; Malkiisedeeq jechuun “Mootii qaceelummaa” jechuu dha; mootii Saalem jechuuniis “Mootii nagayaa” jechuu dha.
[3] Inni abbaa fi haadhaas, yookiin abaabuus qabaachuun isaa, barri jalqaba isaa tii fi dhuma isaa tiis, nutti hin himamne; inni akkuma Ilma Rabbitti, bara baraaf luba tahee ti jiraata.
[4] Abrahaam, abbaan ummataa beekamaan san illeen, waan boojihe keeysaa, kudhan keeysaa tokko nam kanneef eega tahe, Malkiisedeeq kun hammam takka guddaa akka tahe agarsiisa.
[5] Seerri, shanyiin Abrahaam illeen, waan qabeenya isaanii tahe keeysaa, kudhan keeysaa tokko, obboleeyyan isaanii shanyii Lewii warra lubummaa fudhataniif kannuun, akka isaan irra jiru, ajajee ti jira.
[6] Malkiisedeeq kun ammoo, nama shanyii Lewii keeysaa odoo hin tahin, Abrahaam abdiin kannameef irraa, kudhan keeysaa tokko fudhatee ti isa eeybise.
[7] Namtichi eeyba namaa kannu tokko, nama eeyba fudhatu irra caalaa guddaa akka tahe beekamaa dha.
[8] Karaa tokkoon, kudhan keeysaa tokko, namoota warra du'aniin fuudhame, karaa kaaniin ammoo isa lubicha jiraataa jedhameen fuudhame.
[9] Lewiin, kan shanyiin isaa kudhan keeysaa tokko fuutu illeen, wayta san karaa Abrahaamiin, “Kudhan keeysaa tokko kannee ti jira” jechuun ni dandayama.
[10] Sababni isaa tiis, bara Malkiisedeeq Abrahaamitti dhaqe san, Lewiin gudeeda abaabuu Abrahaam keeysa waan tureef jecha.
[11] Ammaas, karaa seeraa fi sirna lubummaa Lewiif kanname saniin, fiinxaan baafamuun silaa waan arkamu taatee, eegasuu lubni akka Aaronitti yaamame hafee, lubni biraa kan akka Malkiisedeeqii kaafamuun maaliif barbaachise ree?
[12] Eegaa, wayta lubummaan sun jijjiiramu, seerri niis jijjiiramuu tu irra jira.
[13] Inni kan amma waa'een isaa kanneen dubbataman kun, gosa biraa keeysaahi ture; gosa san keeysaahiis, namni tokko illeen, akka lubaatti bakka aarsaatti kaadamee hin beeku.
[14] Gooftaan keenya, gosa Yihudaa keeysaa dhalachuun isaa beekamaa dha; Museen waa'ee gosa sanii laalchisuu dhaan, waan dubbate keeysatti waa'ee lubaa hin kaafne.
[15] Lubni biraa, kan akka Malkiisedeeq gaafa ka'u ammoo, wanni dubbatame kun caalaatti ni mullata.
[16] Lubni sun, akka seeraa fi ajaja biyya addunyaa tanaatti, abaabuu lakkaawuu dhaan odoo hin tahin, akka humna jireenya hin badnee tiin luba tahe.
[17] Waa'ee isaa tiif Barreeyfama Qulqulluu keeysatti: “Akkuma lubummaa Malkiisedeeqitti, ati bara baraaf luba ni taata” jedhamee ragaa bahamee ti jira.
[18] Seerri duraa sun, dadhabaa fi faayda-malii tahuu isaa tiif, diigamee ti jira.
[19] Seerichi taanaan, nama tokko illee guutummatti qulqulleeysuu hin dandeenye; haa tahu malee, seera bakka bu'uu dhaan, abdiin haarayni tan gara Rabbii ittiin dhihaannuun, kannamtee ti jirti.
[20] Kun ammoo, kakuun maleetti hin taane; warri duraan luboota tahan hojii isaanii wayta fudhatan, kakuun maleetti ture.
[21] Inni kun, wayta lubummaa fudhate ammoo, Rabbi ni kakateef; waa'ee isaa tiif Kitaaba keeysatti, “Gooytaan, ‘Ati bara baraaf luba taata’ jedhee kakatee ti jira, inni yaada isaa tiis hin jijjiiru” jedhamee barreeyfamee ti jira.
[22] Kakuu kana irraa kan ka'e, Yesuus irbuu irra caaluuf wabii dha nuuf tahe.
[23] Luboonni warri dur hedduu tu ture; duuti hojii isaanii akka itti hin furreef isaan hanqifte.
[24] Yesuus ammoo, bara baraaf waan jiraatuuf jecha, lubummaan isaa, tan dhuma qabduu miti.
[25] Kana irraa kan ka'e, inni wayta hundumaa isaaniif maganfachuuf waan jiraatuuf jecha, warra isaan Rabbitti dhihaatan, guutummatti najaa baasuu ni dandaya.
[26] Angafa lubootaa qulqulluu, kan waan itti baanan hin qabne, xaliilli, kan dilaawoota irraa addatti bahee bantiiwwan samii gararratti ol kaafame, Yesuus kanaatu nu barbaachisa.
[27] Inni akka angafoota lubootaa warra kaaniitti, guyyuu duraan dursee dilii ifii isaa tiif, kana booddees dilii ummataa tiif, aarsaa dhiheeysuun, isa hin barbaachisu; inni ifuma isaa ti aarsaa godhee, wayta takka qofa bara baraaf dhiheeyse.
[28] Seerri, namoota dadhaboo dha angafa lubootaa godhee ti hojii irratti isaan ramada; qoowliin kakuu dhaan dhagayamte, tan seericha booddee dhufte ammoo, ilma, kan bara baraaf guutummatti qulqulluu tahe, hojitti shuumte.