[1] Ani Yaaqoob, kaadamaa Rabbii tii fi ammaas kan Gooftaa Yesuus Kiristoos, gosa kudha lamaanuu keeysaa warra biyya ambaa keeysa faca'anii jiraniif ergaa tana barreeysuu kiyya. Nagaya kiyyaas isiniifiin dhiheeysa.
[2] Yaa obboleeyyan koo! Fitinaan adda addaa wayta isin irra geeysu, gammachuu guutuun fudhadhaa!
[3] Amantiin teeysan fitinamtee laalamuun isii, obsaan dandayuu akka fidu ni beeytan.
[4] Isin warra raawwattanii fiinxaan baatan, warra illaa fi irrina takka illee hin qabne akka taataniif, hanga xumuraatti odoo hin rooraane obsaan dhaabbadhaa!
[5] Isin keeysaa, namni hikmaan itti irratte yoo jiraate, Rabbi kan nama hundumaa fuu, nyaara odoo namatti hin guurre, arjummaa dhaan kannu san ni kannaafii, haa kadhatuu.
[6] Ammoo, odoo hin mamin amantii dhaan haa kadhatuu; namni mamu akka bishaan bahar kan bubbee dhaan asii fi achi wal darbaa oofamuu ti.
[7] Namni akkasitti mamu, Gooftaa biraa waa niin arkadha jedhee hin eeggatin!
[8] Namni akkasii kun, gara-lammii dhaa, bakka takkattiis hin sabatu.
[9] Kiristaanni miskiinummaan gadi qabame, Rabbi duratti ol qabamuu isaa tiin if haa dhaadatu!
[10] Namni taajirri niis ammaas gadi qabamee, akkuma daraaraa meeyra citaatti dhabama.
[11] Aduun baatee oowwa isii finiinaan citaa ni xoollaysiti, daraaraa isaa tiis ni harca'a. Miidhagummaan daraaraa sanii tiis ni bada. Namni taajirri niis akkasuma, leeccalluma odoo naaneeysuu ti dhabama.
[12] Namni fitinaa isatti dhuftu obsaan dandaye eeybifama! Fitinamee eega ilaalame booddee, Rabbi warra isa jaalataniif gonfoo jireenyaa tan inni abdachiise arkachuuf taa'a.
[13] Namni wayta fitinamu, fitinaan tun Rabbi biraa anatti dhufte hin jedhin! Rabbi hammeenyaan fitinamuu hin dandayu, ifiifiis nama tokko illee waan hamaan hin fitinu.
[14] Ammoo, namayyuu kajeellaa hamtuu isaa tiin achi harkifamee wayta itti qalbisu fitinama.
[15] Kajeellaan hamtuun ulfooytee ti dilii dhalti; diliiniis eega guddattee bakka geeyse du'a dhalti.
[16] Yaa obboleeyyan koo jaalatamoo, hin gowwoomfaminaa!
[17] Kannaan gaariin hundinuu, kannaan guutuun illaa hin qabne hundi niis Abbaa ifaa biraa, ol samii irraa dhufu; Abbaa ifaa bira, akka gaaddisa nannaannawutti jijjiiramuun hin jiru.
[18] Nuti uumama isaa hundumaaf angafa akka taanuuf, Rabbi akka fedhii isaatti qoowlii dhugaa tiin nu dhalche.
[19] Yaa obboleeyyan koo jaalatamoo, dubbii tana hubadhaa! Namni hundinuu dhagayutti haa jerjeru, dubbachutti ammoo haa dhibaawuu, ammaas dafee aaru irraa suuta haa deemuu!
[20] Aarri namaa waan qaceelaa Rabbi fedhu fiduu hin dandayu.
[21] Kanaaf jecha, waan najisa tahe, amala hamaa hundumaa if irraa fageeysaa! Qoowlii lubbuu teeysan najaa baasuu dandeeysu, tan Rabbi qalbii teeysan keeysa kaaye san, damboobummaan fudhadhaa!
[22] Warra qoowlii hojii irra oolchan tahaa malee, warra dhagayuu qofaan if gowwoomsan hin tahinaa!
[23] Namni qoowlii dhagayee, ammoo hojii irra hin oolchine, akka nama fuula isaa daawwitii keeysatti laalee akkuma jirutti if arkee ti.
[24] If laalee eega deemee booddee, hogguusuma waan fakkaatu akka nama if irraanfatuu ti.
[25] Namtichi, seera irrina hin qabne, seera bilisa nama baasu keeysa gadi seenee ilaalu, ammaas kan itti fufeetuma qalbii godhu, kan waan dhagayees odoo hin irraanfatin hojii irra oolchu, waanuma dalaguttuu eeybifamaa dha taha.
[26] Namni “Rabbiin ibaada” jedhu, kan arraba isaatti ammoo cancala hin godhin, ifuma gowwoomsa malee, ibaadaan isaa gatii hin qabdu.
[27] Amantiin qulqulluun tan Rabbi Abbaan keenya akka xaliila huuba hin qabnetti fudhatu, yatiimaa fi gursummeeytoota rakkoo keeysa jiran gargaaruu fi, hammeenya addunyaa irraa tiiniis gaddaafamuu irraa if eeguu dha.