[1] Kanaaf nuti karaa irraa akka hin mayneef, waan kanneen dhageenye san, caalatti itti yaadnee fardeeyfachuu tu nu barbaachisa.
[2] Qoowliin maleeykoota Rabbii tiin dubbatamte, dhugaa tahuun isii mirkanooyte; namni qoowlii san caphse, yookiin isiif hin ajajamne hundinuu, adaba isaanitti haqaa ti arkatu.
[3] Nuti ammoo najaata guddaa akkanaa, kan Gooftaan dura dubbatee, ammaas warra isa irraa dhagayaniin nuuf mirkanaawe kanaan, kurshii isaa ti yoo jenne, akkamitti firdii jalaa bahuu dandeenya ree?
[4] Tana malees, Rabbi ifumaa fuu, milikkita waan nama ajaa'ibsisaa tii fi mu'ujizaa adda addaa tiin, ammaas kannaalee Ruuhal Qudus, kanneen akka fedhii isaatti hiramaniiniis qoowliin dhugaa tahuu isii mullisee ti jira.
[5] Biyya addunyaa dhaa, tan dhufuuf deemtu, tan nuti waa'ee isii dubbannuu san, Rabbi harka maleeykootaa jala hin galchine.
[6] Namtichi tokko Barreeyfama Qulqulluu keeysaa bakka tokkotti ragaa bahuun, “Yaa Rabbi, namni maali, akka isa yaadattuuf? Yookiin Ilmi Namaa maali, akka isaaf yaadduuf?
[7] Wayta gabaabaaf maleeykootaa gadi isa goote, gonfoo guddinaa tii fi tan ulfinaa mataa isaa irra keeyse;
[8] waan hundumaa huu miillan isaa jala galchite” jedha. Rabbi waan hundumaa huu harka isaa jala hogguu galche, waa takka illee isa jalatti odoo hin galchin hin hafne; haa tahu malee, ammaan tana garuu wanni hundinuu harka isaa jala galuu isaanii hin agarru.
[9] Amma ammoo kan waytumaaf maleeykootaa gadi tahe, hiraaramee du'uu isaa tiif jecha, gonfoo guddinaa tii fi tan ulfinaa mataa isaa irra kan kaayate Yesuusi agarra; kuniis ni'imaa Rabbii tiin, inni namuma hundumaa fuu du'a akka dhamdhamuufi tahe.
[10] Rabbi, kan waan hundumaa uume jiraachisu, hundi niis kan isaa kan tahe, ilmaan hedduu gara ulfinaatti fiduun hojuma isaa ti ture; kanaaf jecha, Yesuus kan isaan najaatatti geggeeysu san, hiraariin fiinxaan baasee ti jira.
[11] Eegaa lamaanuu, jechuun inni namoota qulqulleeysuu fi warri qulqulleeyfamaniis haaskuma tokkoo iraahi; kanaaf jecha, Yesuus obboleeyyan kiyya jedhee isaan yaamuuf itti if hin qaanfatu.
[12] Inni, “Obboleeyyan kiyyatti maqaa kee niin beeysisa, waldaya keeysattiis hamdii tee niin faarfadha” jedhee ti jira.
[13] Dabalee ammaas, “Amantaa tiyya isa irraan godha”; akkasumatti ammaas, “Kunoo ani asiin jira, joolleen Rabbi anaaf kannees as jiran” jedhee ti jira.
[14] Joollonni kun jasadaa fi dhiigaas waan qabaniif, inni obboleeyyan kiyya jedhee isaan yaamu kuniis, namummaa isaanii irraa hirmaatee ti jira; kuniis du'a isaa tiin Sheeyxaana humna du'aa qabu san moohachuufi tahe.
[15] Warra sodaa du'aa tiin umrii isaanii guutuu gabroomaniis bilisa isaan baase.
[16] Inni maleeykoota odoo hin tahin, shanyii Abrahaam gargaaruufi dhufe.
[17] Kanaaf, inni fuula Rabbii duratti angafa lubootaa, rahamata-qabeeysaa fi amanamaa tahuuf, namootaas oomfii dilii arkachiisuuf, karaa hundumaanuu obboleeyyan isaa fakkaachuu tu isa barbaachise.
[18] Yesuus ifii fuu waan fitinamee hiraaramee beekuuf jecha, warra fitinamaa jiran gargaaruus ni dandaya.