[1] Ani Phaawulos, nama Yesuus Kiristoosiif jecha hidhame, ammaas obboleeysa keenya Ximotewoosiin wajjiin, gara Filemoon nama jaalatamaa fi hojittiis gola keenya taheetti,
[2] akkasumatti ammaas gara obboleeytii teenya Aaphiyaatti, gara Arkiphos nama gola qabsoo teenyaa taheetti, gara waldaya mana keetitti walitti qabamtuttiis, xalayaa tana barreeysuu keenya.
[3] Rabbi Abbaa keenya, Gooftaa keenya Yesuus Kiristoos biraa, ni'imaa fi nagayni niis isiniif haa tahu!
[4] Kadhata kiyya keeysatti waytaan maqaa kee dha'u hundumaa, Rabbii kiyya niin galateeyfadha.
[5] Yesuus jaalachuu fi isatti amanuu kee tiis, ammaas kiristaana hundumaaf jaalala qabaachuu kee tiis, dhagayee tiin jira.
[6] Eeyba nuti Kiristoos keeysatti qabnu, sirriitti hubattee, hojii amantii keeysaa hirmaachuu kee, caalatti mullisuu akka si dandeeysisuuf niin kadhadha.
[7] Waa'ee jaalala ati kiristaanota agarsiiftee dhagayuun koo, hedduu dha na gammachiiftee na jajjabeeysite; yaa obboleeysa koo, ati dhugumatti, isaan gammachuu dhaan mirqaansitee ti jirta.
[8] Eegasuu, bar waan ati godhuu qabdu si ajajuuf, Kiristoos irraa amrii niin qabaan turee.
[9] Haa tahu malee, ani Phaawulos jaarsichi, ammaas Yesuus Kiristoosiif jecha kaniin hidhamees, karuma jaalalaa tiiniin si gorsuu filadha.
[10] Waa'ee Oneesimos ilma ruuhaanii kiyya, kaniin mana hidhaa keeysa odoon jiruu arkadhe sanaa tiin sitti dubbachuu barbaada.
[11] Inni niis kanaan dura, nama siif faaydaa qabu hin turre; amma taanaan garuu, sii fi anaafiis lamaan keenyaa fuu nama faaydaa qabu tahee ti jira.
[12] Isa deebisee gara keetitti hogguun ergu, qalbiin tiyyaas oduma isa jala na rarraatuu ti.
[13] Ani illeen, silaa isa if biratti hambisee, hammaan Wangeelaaf jecha mana hidhaa kana keeysa jiraadhu, bakka tee bu'uu dhaan akka na gargaaru niin fedhaan ture.
[14] Haa tahu malee, fedha kee tiin alatti si duubaa, waa takka illee godhuu ani hin barbaanne; keeyraata hojjachuun dhiibbaa namni biraa nama irratti godhuun odoon tahin, fedhuma Abbaa tiin yoo tahe, irra wayyaa dha.
[15] Waytuma gabaabduuf si irraa gargar bahuun isaa, tarii huu deebi'ee wayta hundumaa ati akka isa if biraa qabaattuuf tahuu nuu ni mala taha.
[16] Inni arraan booda, akkuma gabrichatti odoo hin tahin, kan gabra irra caalu, akka obboleeysa jaalatamaa ti; na biratti hedduu jaalatamaa dha; siif ammoo akka nama tokkoof hojjatu qofatti odoo hin tahin, ammaas Gooftatti amanuu isaa tiif, inumaa tuu caalatti jaalatama taha.
[17] Eegaa, ani amantiitti gola tee tahuu kan koo yoo naaf fudhatte, akkuma silaa na simattutti, Oneesimos naaf simadhu.
[18] Inni yoo kan waanuma takkatti illee sitti balleeysee tahe, yookiin deeynii yoo isa irraa qabaatte, hadaraa san anumaa irratti lakkaawi!
[19] Ani Phaawulos “Deeynii isa irraa qabdu siifiin kafala” jechaa tiin harka kiyyaan siif barreeysa; kana malees, matummaan kee tuu kiyya tahuu isaa sitti himuun na hin barbaachisu.
[20] Eeyye yaa obboleeysa kiyya, maqaa Gooftaa tiin, haajaa tana anaaf raawwadhuu tii, haarayatti garaa koo Kiristoositti mee gammachiisi.
[21] Akka anaaf ajajamtu, amantaa si irratti qabaachaa, waaniin “Godhi” siin jedhe caalaas akka gootu, beekaa tiin siif katabe.
[22] Achumaan ammoo Rabbi anaaf maganfachuu keeysaniif isiniif deebisee na ni kanna jedhee, abdii waaniin godhuuf jecha, manaan keeysa qubadhu hadaraa anaaf qopheeysi!
[23] Ephafraas, maqaa Yesuus Kiristoosiif jecha anaa wajjiin hidhamee kan jiruus, nagaya siif dhiheeysa.
[24] Maarqos, Arisxaarkos, Deemaas, Luqaas, warri hojitti gola kiyya tahaniis nagaya siif dhiheeysu.
[25] Ni'imaan Gooftaa keenyaa Yesuus Kiristoos, ruuhaa teeysanii wajjiin haa taatu.