[1] Tanaan wajji, amma wayta sadaffaaf gara keeysan dhufuu kiyya; akkuma Kitaaba keeysatti barreeyfame, “Dubbiin takka ragaa nama lamaa yookiin nama sadihii tiin ni murteeyfamti”.
[2] Ani kanaan dura wayta lammaffaaf hogguun isin bira dhufe san, akkumaan isin dinniinetti ammaas isin irraa fagaadhee waytaan jiruus, irruma deebi'ee tiin isin dinniina. Waytaan deebi'ee dhufu, warra kanaan dura yakkanii fi kanneen biraa tiifiis hiluuf hin taa'u.
[3] Kiristoos ana keeysaan akka dubbatu, isin ragaa amansiisaa warra barbaadu. Inni isin toohatuus dadhabaa miti, ammaas isin keeysatti waa hojjachuufiis qiwwa-qabeeysa.
[4] Inni dadhabummaan fannifame, ammoo humna Rabbii tiin jiraata. Nutiis akkasumatti isa keeysaan dadhaboota, ammoo qunnamtii isiniin wajjiin goonu irratti, humna Rabbi biraa arkanneen isaan wajjiin jiraannee ti.
[5] Amantitti jiraachuu keeysan if xiinxalaatii laalaa! Ifiis hubadhaa! Yesuus Kiristoos akka isin keeysa jiru hin hubattanii? Kun tahuu baannaan, xiinxala kanatti kufuu keeysani jechuu dha.
[6] Nuti xiinxala kanatti kufuu dhabuu keenya, akka isinuu bira geeysan niin abdadha.
[7] Isin waan dogongoraa akka hin dalayne, nuti Rabbi isiniifi kadhanna; kuniis akka waan nuti xiinxala dabarretti haa ilaalamnuufii miti, nuti akka waan kufnee yoo fakkaanne illee, isinummaan ammoo waanuma haqa tahe akka dalaydaniifi.
[8] Nuti dhugaaf dhaabbanna malee, waa takkatti illeen dhugaan mormuu hin dandeenyu.
[9] Nuti dadhaboo taanu illee, isinummaan jabaannaan ni gammanna; akkasitti fiinxaan akka baataniifiis Rabbi isiniif kadhanna.
[10] Kanaaf jechaan, waytaan fagoo isin irraa jiru akkanatti kataba; hogguun isin bira dhufe ammoo, amriin qabutti irkadhee, akkaan isin hin miineef jecha; amrii Gooftaan anaaf kanne ittiin isin diiguuf odoo hin tahin, ittiin isin ijaaruufi.
[11] Dhuma irratti yaa obboleeyyan kiyya! Nagayatti jiraadhaa! Akeekni keeysan qaceelinaaf haa tahu, waaniin isinitti dubbadhe qalbii godhaa, wal tahaa, Rabbiin jaalalaa fi nagaya namaaf kannu isin wajjiin haa tahu.
[12] Garaa xaliilaan wal dhudhungadhaa, nagaya wal gaafadhaa! Amantoonni hundinuu nagaya isiniif dhaamu.
[13] Ni'imaan Gooftaa Yesuus Kiristoos, jaalalti Rabbii, tokkummaan Ruuhal Qudus hunduma keeysanii wajjiin haa taatu!