[1] Ani ammaas deebi'ee isin gaddisiisuuf, akkaan gara keeysan hin dhufne murteeyfadhee tiin jira.
[2] Ani ammoo isin gaddisiifnaan, mee eenyuu tu jira kan na gammachiisuuf hafe? Isinuma warrumaan ani gaddisiise kanaa mitii?
[3] Gara keeysan waytaan dhufu, namoonni na gammachiisuun isaan irra ture, akka ana hin gaddisiifneef jechaan, akkasitti isiniif katabee jira; gammachuu tiyya akka hirmaattan hunduma keeysan irraa huu amantaan qaba.
[4] Cinqii guddoo fi rakkoo na irra geeysee tu, akkasitti imimmaan dhangalaasaa akkaan isiniif barreeysu na godhe; haa tahu malee, xalayaa tanaan isin gaddisiisuuf odoo hin tahin, jaalaltiniin ani isiniif qabu, hangam gadi fagoo akka taate isinuma hubachiisuufi.
[5] Namni tokko nama biraa yoo gaddisiise, anuma gaddisiise jechuu miti, hunda keeysan gaddisiise malee; hunda keeysan tahu illee baatu, isin keeysaa hanga tokko gaddisiisuun isaa ni mala.
[6] Nama akkasii kanaaf, adabnummaan isin sagalee guddoon irratti walii galanii kannitaniif ni gayaafi.
[7] Tahu illee, akka inni ammaas hizaaba malee gaddee hin miidhamneef, oomfuma isaaf gootanii jajjabeeysuu tu isin irraa eegama.
[8] Akkanatti jaalala namticha kanaaf qabdan, deebiftanii haarayoomsuu dhaan akka mirkaneeysitaniifiin jabeeysee isin kadhadha.
[9] Wanniniin ani isiniif barreeyseefiis, waanuma hundumattuu ajajamoo tahuu keeysan, isin fitinee beekuufi.
[10] Nama isin oomfii gootaniif, aniis oomfiin godhaafi; sanuu wantiniin oomfii godhuu huu yoo jiraatte, isinumaaf jecha Kiristoos duratti oomfii isaaf godhee tiin jira.
[11] Sharriin akeeka Sheeyxaanaa maal akka taate waan beeynuuf, Sheeyxaanni akka nu hin gowwoomsineef tana goona.
[12] Wangeela Kiristoos lallabuuf magaalaa Xirohaas hogguun gahe, Gooftaan akka karaa anaaf baneen arke.
[13] Obboleeysa kiyya Tiitoos achii dhabnaan, qalbiin na sabachuu dha didde, akkasittiin isaanitti nagaya dhaammadhee, gara kutaa biyya Maqedooniyaatti dabre.
[14] Rabbi kan wayta hundumaa karaa Kiristoosiin akka warra injifannoon duulaa galanitti nu deemsisuuf, galanni haa tahu. Bakkuma deemnu hundumattuu, Kiristoos beekuun, akka urgaa shittootti wal geeysi.
[15] Warra najaa baafamaa jiranii fi ammaas warra karaa badii irra jiraniifiis, nuti Rabbiif shurufkaa Kiristoos tan urgooytuu dha.
[16] Warra karaa badii irra jiraniif, ciincaa du'aa tan nama ajjeeftu, warra karaa najaataa irra jiraniif ammoo, urgaa jireenyaa tan nama jiraachiftuu dha; duuba eenyuu tu tajaajila akkasii kanaaf gaha?
[17] Nuti akka warra Rabbi biraa ajajamanii ergamanitti Kiristoos keeysaan fuula Rabbii duratti, amanamummaan dubbanna malee, akkaataa namoonni hedduun Qoowlii Rabbii akka waan meeshaa gurguraa taatetti irraa faaydayuuf barbaadanii tii miti.