[1] Faaydaa illee qabaachuu baattu, if dhaadachuun qaba! Amma kunoo, waan kanneen Gooftaa irraa anaaf dhufan gara mullataa tii fi raagaattiin dabra.
[2] Namtichi kiristaanni tokko, bara kudha afur dura, bantii samii keeysaa tan sadaffaatti akka ol butame niin beeka; namummaa jasadaa tiin ol haa butamu, yookiin namummaa Ruuhaa tiin ol haa fuudhamu, Rabbumaa tu beeka malee, ani waaniin irra beeku hin qabu.
[3] Namtichi kun gara jannatatti ol butamuu isaa niin beeka; namummaa jasadaa tiin ol haa butamu, yookiin jasadaan maleetti haa tahu, ani hin beeku, Rabbumaa tu beeka.
[4] Namtichi kun waan, waan akkanaa ti jedhanii himuun hin malle, waan namni odeeysuufiis hin hayyamamin dhagaye.
[5] Eegaa ani bakka nama akkasii san bu'ee dhaadachuu niin barbaada; waan mataa koo tii laalchisuun ammoo, dadhabbii too malee waaniin ittiin dhaadadhu hin qabu.
[6] Ani silaa dhaadachuu barbaade illee, dhugaa waaniin dubbadhuuf jecha, akka nama gowwaa tokkoo hin tahuun ture; haa tahuu ammoo tanaas godhuu wanniniin irraa if qusadhuuf, namni tokko illeen, waan na keeysatti arkuu fi waan ana irraa dhagayuu ol caalchisee akka ana hin laalleefi.
[7] Mullata haddii hin qabne kanneen anaaf kannaman irraa kan ka'e, akkaan hin dhaytooyneef jecha, qoreen qaama kiyya keeysa naaf kaayamtee ti jirti, ergamaan Sheeyxaanaa tanaan na hiraarsee akkaan hin dhaytooyne ana godhuufi natti kannamte.
[8] Qoreen tun akka ana irraa baatuuf, wayta sadihiin Gooftaa kadhadhe.
[9] Inni ammoo, “Ni'imaan tiyya siif geeysi, humniti tiyyaas dadhabbii keeysaani akeeka isii raawwatti” naan jedhe. Qiwwaan Kiristoos akka ana irra qubattuuf jecha, hundumaa irra caalchisee dadhabbii tiyyaaniin gammadee dhaadadha.
[10] Kanaafiin maqaa Kiristoosiif jecha, dadhabbii, arrabsamuu, rakkina, reebamuu fi waan nama dhibaa hundumaa gammachuun fudhadha; hogguun dadhabeen jabaadhaasi!
[11] Dhiibbaa teeysaniin nama gowwaa tokko if godhee tiin jira; ani silaa isiniin kabajamuu tu na irra ture. Humatti illee lakkaawamuu yoon baadhe, garuu waa takkatti illee ergamoota kanneen hunda caaloo tahanii beekamanii gadi hin tahu.
[12] Milikkinni ergamaa Gooftaa tahuu kiyya mullisu, baasninii fi quduraan, obsa guddaa dhaan isin jiddutti godhamanii ti jiru.
[13] Waldayoota kiristaanaa warra biraa irraa, maaliin isaanii gadi taatan? Wanni isinitti irrate yoo jiraate, ani ba'aa isinitti tahuu dhabuu kiyyaa mitii? Dogongora kanaafiis oomfii anaaf godhaa.
[14] Kunoo, wayta sadaffaaf dhufee isin laaluuf qophaawee tiin jira; ammoo ba'aa isinitti hin tahu. Wanniniin ani barbaaduus, qabeenya keeysan odoo hin tahin, matuma keeysani; silaa huu haawwan tu joolleef waa ol kaaya malee, joolleen haawwaniif ol hin keeysu.
[15] Ani lubbuu teeysaniif jecha qabeenya kiyyaa fi mataa kiyyaas walumaan dabarsee gammachuu niin kanna; ani hoddommeeysee yoon isin jaaladhe, isin ammoo xiqqeeysitanii ti na jaalattuu ree?
[16] Waanuma fedhee huu taanaan, ani ba'aa isin irratti hin taane; ammoo ani shaaxira tahee, heelaan harka kiyyatti wahiin isin galfadhee?
[17] Yookiin namootaan ani isinitti erge keeysaa karaa nama tokkoo tiin illee waa isin irraa nyaadhee jiraa laata?
[18] Tiitoos, gara keeysan akka dhufu gadi jabeeysee itti hime, obboleeysa saniis wajjiin ergee tiin jira; Tiitoos nama waa takka illee isin irraa nyaatuu miti, ammoo wahi nyaatee? Nuti tarkaanfuma wal fakkaattu fudhannee mitii? Ruuhaa tokkooni hojjannaasii mitii?
[19] Yaa saahibban koo! Hanga ammaan tanaatti, waanuma nuti if baasuu jecha dubbanne isinitti ni fakkaataa? Akkasii mitii lakkisaa! Nuti warra Kiristoos taanee isin jajjabeeysuufi, fuula Rabbii duratti waan hundumaa dubbanna.
[20] Hogguun dhufu akkaan ani itti isin arkuu barbaadutti isin hin arkuun taha; isiniis akkaataa itti ana arkuu barbaaddanitti ana hin arkattan taha. Wal-dhabbiin, hinaaffaan, lolli, ofittummaan, maqaa namaa balleeysuun, nama hamachuun, dhaytaan, qaanuna-dhabuun isin keeysa jiraachuun ni mala jedhee tiin if sodaadha.
[21] Deebi'ee ammaas gara keeysan hogguun dhufu, Rabbiin koo isin duratti if na qaanfachiisuun ni mala! Namoonni hedduun warri kanaan dura najifummaan, zinaan, kajeellaa si'oo shahawaa tiin qabamanii odoo hin toowbatin hafan, na naasisuuf deemu jedhee tiin sodaadha.