[1] Yaa obboleeyyan keenya, waan ni'imaan Rabbii, waldayoota kiristaanaa Maqedooniyaa tiif raawwatte, akka beeytan barbaanna.
[2] Rakkinni hizaaba hin qabne isaan fitinu illee, ammaas miskiinummaa hundaa gadii keeysa jiraachaa, gargaarsa kannuu irratti gammachuu haddii hin qabneen, arjummaan isaan godhan, guutuu gubbaan dhangalatu turte.
[3] Isaan fedhuma isaanii tiin, waan kannuu dandayanii fi, inumaatuu humna isaanii tii oluu, akka kannan ani ragaan bahaafi.
[4] Warra amantoota san gargaaruuf, carraa akka isaaniif kanninu, gadi jabeeysanii, nu kadhatanii ti turan.
[5] Isaan, waan nuti isaan irraa eegganne caalaa dha godhan; duraan dursanii Rabbitti if kannan, booddee ammaas akka fedhii Rabbitti, nuttiis if kannan.
[6] Kanaaf Tiitoos akkuma kanaan dura jalqabetti, hojii ni'imaa tana gara keeysaniin akka raawwatu, hadaraa itti dhaamannee ti jirra.
[7] Ammaas waan hundumaatti dureeyyii akkuma taatan, kuniis amantitti, hayyummaa dubbitti, beekumsatti, fedha nama gargaaruu irratti, jaalala nuuf qabdan irratti, ammaas tajaajila hojii ni'imaa tana irrattiis, caalatti arjummaan duroomaa!
[8] Akkana jechuun tiyya, warri biraa akkamitti akka dhugumaan fardeeyfatan agarsiisuu dhaan, jaalalti teeysan tan dhugaa tahuu mirkaneeysuufi malee, ajaja isiniif kannuufii miti.
[9] Isin kunoo, ni'imaa Gooftaa keenyaa Yesuus Kiristoosiin, inni dureeysa tahee odoo jiruu, isiniif jecha akka deege, isin ammoo deegummaa isaa tiin akka duroomtan ni beeytan.
[10] Gocha isin bara-dheengaddaa jalqabdan san, amma itti furtanii raawwachuun keeysan, gaarii tahuun isin gorsa; dura kannuu qofa odoo hin tahin, warri kannuuf dura yaadees isini.
[11] Waan godhuuf itti mirqaantan tana, bakkaan gahaa raawwadhaa! Xumuruuf, yaadni qabdan akka boodatti hin hafne, waanuma amma qabdaniin itti dirmadhaa!
[12] Namni kannuuf fedha qabaannaan, kannaan inni dhiheeysu san tan humna isaa gararraa odoo hin tahin, akkuma humna isaatti yoo taate fudhatama qaba.
[13] Kanaas ba'aa isin irratti tuullee, warra kaaniif sablisuuf odoo hin tahin, wal qixxeeysuu dha barbaanna.
[14] Haala ammaa kanatti qabeenya keeysan bash-bash kan tahe irraa waan isaanitti hanqate isinii tu guutaafi, isaaniis faraqatti qabeenya isaanii bash-bash kan tahu irraa hanqina keeysan ni guutu; akkanatti wal-qixxummaan argama jechuu dha.
[15] Barreeyfamni Qulqulluun, “Nama hedduu guurrateef humaa irraa hin hafneef, nama waa xiqqo guurratees humaa itti hin irranne” jedha.
[16] Rabbi, kan fedha akkaan ani isiniif qabuu garaa Tiitoos keeysa kaayeef hamdiin haa geeysuuf!
[17] Tiitoos gaaffii teenya fudhachuu qofa odoo hin tahin, fedhuma mataa isaa tiinuu, mirqaana jabaan gama keeysan dhufaa ti jira.
[18] Isaa wajjiiniis, obboleeysa amantii dhaa, kan tajaajila Wangeela lallabutti, waldayoota kiristaanaa hundumaa biratti faarfamaa tahees, erguu keenya.
[19] Kana qofaa miti; obboleeysi kun gargaarsa jaalalaa, kan ulfina Gooftichaa tiif mirqaanaan itti cinnee tajaajiluuf kaane kana irratti, akka nu wajjiin deemuuf, waldayoota kiristaanaa tiin nama filamee shuumamee dha.
[20] Akkaataan nuti horii gargaarsaaf arjoomame kana itti qabnu, maqaan keenya akka nu hin badnetti, hama hundumaa hambisuuf tattaafanna.
[21] Nuti fuula Gooftaa duratti qofa odoo hin tahin, fuula namootaa durattiis, haqaan dalaguuf hedduu dha itti cinqamna.
[22] Itti daballee, nuti obboleeysa keenya tokko, nama waan heddutti xiinxallee, wayta hedduu gargaaruu nama fedhu tahuu isaa bira geenye, jara kanaa wajjiin erguu keenya; inni ammaan tana waan isin irratti amantaa qabuuf jecha hamilee guddooni gargaara.
[23] Tiitoos taanaan gola kiyya kan isin wajjiin dalagu; obboleeyyan keenya jara kaan taanaaniis, isaan bakka-buutoo waldaya kiristaanaa, warra durrii ulfina Kiristoosiif tajaajila kannanii dha.
[24] Kana waan taheef, waldayoonni kiristaanaa hundinuu akka beekaniif, jaalala teeysan tan nuti ittiin isiniin if dhaadannu san, jara kanaaf mirkaneeysaa!