[1] Ammaas deebinee if dhaadachuu dha jalqabnaa? Yookiin akka namoonni tokko tokko xalayaa ragaa dhaa tan gara keeysan fidanii, yookiin isin irraa arkachuu barbaadanii tu nu barbaachisee laata?
[2] Nuuf taanaan isinuma mataa keeysanii tu, xalayaa ragaa tan onnee teenya keeysatti katabamtee beekamtee namayyuun dubbifamte.
[3] Isin, xalayaa Kiristoos tan nuun ergamte; tan qalimaan hin katabamin, ammoo tan Ruuhaa Rabbii Jiraataa tiin katabamte; tan loohaa dhagaa irratti odoo hin tahin, loohaa onnee jiraattuu teeysan irratti katabamtee dha.
[4] Amantaan nuti Kiristoos keeysaan gara Rabbitti qabnu tan akkasii tana.
[5] Nuti ifii keenyaan waa takka illee godhuuf dandeeyyii qabna hin jennu; dandeeyyiin teenya ammoo Rabbi biraa nuuf dhufti.
[6] Isumaa tu kaadamtoota irbuu haarayaa akka taanu nu dandeeysise, irbuun tuniis tan qubeen katabamte odoo hin tahin, tan Ruuhaan katabamtee dha. Seerri katabame ni ajjeesa, Ruuhal Qudus ammoo jireenya namaaf kanna.
[7] Eegasuu, seerri du'a fide, inni loohaa dhagaa irratti qubee dhaan kan katabamee huu, nuura ulfinaa fuula Muusee irraa walaqisiifnaan, ummanni Israa'el ija itti dhaabanii, laaluu hanga dadhaban takka gahe. Akkasumaanuu nuurri san kan irrachaa deemu ture.
[8] Tajaajilli Ruuhaan kannamu ammoo hangam takka caalchisee nuura ulfinaa haa qabaatu ree?
[9] Tajaajilli namatti firdii godhuu huu ulfina-qabeeysa eega tahe, tajaajilli qaceelaa nama godhu ammoo, hangam takka caalchisee ulfina-qabeeysa tahuu tu irra jira?
[10] Amma wal bira qabnaan, dhugumaan ulfina irra caalu kan qabu waan arkameef, inni kanaan dura ulfina-qabeeysa ture, ulfina-dhabeeysa tahee ti jira.
[11] Eega inni waytumaaf jiraate sanuu ulfina qabaate, inni bara baraan itti furee jiraatu ammoo, hangam irra caalchisee ulfina haa qabaatu ree?
[12] Kanaaf nuti abdii akkanaa warra qabu eega taanee fuu, ija-jabina guddaa dha qabna.
[13] Nuti akka Musee tii miti; Muuseen, walaqqisa fuula isaa, sanuu kanuma nuurri irraa irrachaa deemu san, ummanni Israa'el ija itti dhaabee akka hin laalleef, fuula isaa irra hagooggii kaayee ti ture.
[14] Qalbiin isaanii tiis akka dhagaatti jabaatte; wayta irbuun dullattiin sun dubbifamtu, hanguma arraatti illee taanaan, golguma sanii tu odoo irraa hin kaafamin irra jira; kan golga san irraa kaasuus, Kiristoosuma qofa waan taheefi.
[15] Arruma illee wayta Seerri Musee dubbifamu, golgichi qalbii isaanii hagoogaa ti jira.
[16] Barreeyfamni Qulqulluun, “Wayta namtichi gara Gooytaatti deebi'u, golgi isa irraa ni kaafama” jedha.
[17] Kunoo, Gooytaan, Ruuhaa dha; bakkuma Ruuhaan Gooytaa jiru, bilisummaaniis achuma jirti.
[18] Ammaas nuti warri fuula keenya odoo hin hagooggatin, ulfina Gooftaa walaqqisnu hundinuu, gara bifa isaa, tan ulfinni isii itti dabalamaa deemutti jijjiiramaa ti jirra; ulfinni kuniis Gooytaa Ruuhaa tahe irraa dhufa.