[1] Ani Phaawulos, kan namoota irraa yookiin namaan odoon hin tahin, ammoo kan Yesuus Kiristoosii fi Rabbi Abbaa kan isa du'aa kaaseen ergame.
[2] Nagaya kiyya gara waldayoota kiristaanaa kanneen kutaa biyya Galaatiyaa keeysa jiraniif erguu koo ti; ammaas amantoonni as na bira jiraniis nagaya isaanii isiniif dhaamu.
[3] Ni'imaanii fi nagayni Rabbii Abbaa keenyaa, Gooftaa keenya Yesuus Kiristoos irraa hiis isiniif haa tahan!
[4] Kiristoos, akka fedhii Rabbii Abbaa keenyaatti, bara hamaa wayta ammaa kana jalaa nu baasuufi, dilii teenyaaf jecha dabarsee ti if kanne.
[5] Durriin ulfinaa, bara baraaf Rabbiif haa taatu! Aammiin.
[6] Ni'imaa Kiristoosiin Rabbii isin yaame san hanganumatti dhiiftanii, Wangeela kanaa alatti kan biraatti garagaluun keeysan heddu na ajaa'ibsise.
[7] Wangeelli biraa jiraachuu baatu illee, ammoo isinuma dararuu dhaan, warra Wangeela Kiristoos jallisuu barbaadanii tu jira.
[8] Haa tahu malee, nu taanaaniis yookiin maleeykaan samii irraa tiis, Wangeela nuti kanaan dura lallabne san irraa adda kan tahe kan lallabu, abaaramaa haa tahu!
[9] Akkumaan duraan jedhe, ammaas itti deebi'ee tiin jedha; Wangeela isin fudhattan malee, kan biraa namni lallabu abaaramaa haa tahu!
[10] Amma ammoo ani, nama moo Rabbi if fudhachiisuu fedhuu kiyya? Yookiin ani namaan gammachiisuu barbaadaa? Ani silaa hanga ammaatti kanuma nama gammachiisu tahee, kaadamaa Kiristoos hin tahuun ture.
[11] Yaa obboleeyyan koo! Wanniniin akka isin beeytan barbaadu, Wangeelliniin ani lallabe, waan namaan qindaawe akka hin tahinii dha.
[12] Ani mullataaniin Yesuus Kiristoos irraa arkadhe malee, nama irraa hiis hin fuune, namni niis hin barsiifamne.
[13] Waytaan amantii warra Yihudootaa keeysa ture, ani hizaaba malee waldaya Rabbii dhabamsiisuuf akkaan reebaa ture, isinuu dhageessanii ti jirtu.
[14] Amantii Yihudootaatti, hiriyoota kiyya Yihudoota hundumaa irra caalatti fullahee, aadoota abbootii tiyyaa tiif qiyaasa maleen hinaafaan ture.
[15] Ammoo Rabbuma kan odoon ani hin dhalatin dura addatti na baase sanii tu, ammaas ni'imaa isaa tiin na yaame.
[16] Akkaan Wangeela saboota qomoo Israa'el hin tahin jiddutti lallabuuf jecha, Ilma isaa ana keeysatti mullisuu dha jaalate; aniis hogguus nam tokkoon wajjiin illee hin marihanne.
[17] Ammaas warra anaan dura ergamoota turan laaluuf Yerusaaleemittiis ol hin baane; ammoo gara biyya Arabaatiin dhaqe, achiin booda ammaas gara Damaasqottiin deebi'e.
[18] Eegas bara sadih booddee Phexiroos arkee wal baruufiin Yerusaaleemitti ol bahee, isaan wajjiiniis guyyaa kudha shan ture.
[19] Yaaqoobuma, obboleeysa Gooftaa malee, ergamoota warra biraa tokko illee achitti hin agarre.
[20] Wanniniin isiniif barreeysaa jiru tun kijiba akka hin tahin, Rabbii tu ragaa dha!
[21] Eegas booda gara kutaa biyya Sooriyaa tii fi Qiliiqiyaa tiin dhaqe.
[22] Waldayoonni kiristaanaa kanneen biyya Yihudaa keeysaa kanaan dura fuula kiyya arkanii hin beekan turan.
[23] Wanti isaan dhagayanii beekaniis, “Namtichi kanaan dura nu reebaa ture, amma ammoo amantuma duraan balleeysuuf yaale san lallaba” tan jettu qofa turte.
[24] Akkanatti sababa kiyyaaf jecha isaan Rabbiif hamdii dha galchan.