[1] Waa'ee gargaarsa warra amantootaa tiif kannamuu ammoo, isiniif katabuun na hin barbaachisu.
[2] Isin gargaarsaaf hamilee qabaachuu keeysan niin beeka; qophaawummaa teeysaniiniis ani, “Kiristaanonni biyya Akaayyaa bara-dheengaddaa tii jalqabanii qophaawanii ti jiru” jedhee waa'ee keeysaniif warra Maqedooniyaatti ifiin dhaadadha; hamileen teeysaniis isaan keeysaa namoota hedduu hojitti sossooftee ti jirti.
[3] Ammaas taanaan qophaawanii ti jiru, akkumaan jedhetti, isiniis qophooytanii akka arkamtan barbaachisa; tana irratti isiniin dhaadachuun teenya bilaasha akka hin taaneef jecha, kunoo obboleeyyan keenya gara keeysan ergine.
[4] Warri Maqedooniyaa anaa wajjiin dhufanii, akka isin hin qophaawin yoo arkan ammoo, teeysan haftee nutuu warri akkasitti isiniin if dhaadanne qaanii tu nu mudata.
[5] Kanaafiin, obboleeyyan keenya kana, na dura gara keeysan dhufanii, gargaarsa isin arjummaa dhaan kannuuf abdachiiftan san, duraan dursanii akka qopheeysaniif isaan jerjersuun barbaachisa anatti fakkaate; gargaarsi kuniis kan dirqamtanii gootan hin tahin, kan fedhaa fi ammaas arjummaan kanname tahee qophaawee nu haa eegu!
[6] Namni waan xiqqoo facaase, waanuma xiqqoo dha oomishata; namni hedduu facaasees, hedduu dha oomishata.
[7] Namni hundinuu adduma addaan, waanuma garaa isaa keeysatti kannuuf murteeyfate haa kannuu malee, rincicaa yookiin dirqamuun hin kannin; Rabbi warra gammachuu dhaan kannu jaalata.
[8] Rabbi kunoo, ni'imaa isiniif hoddommeeysee dhangalaasuun, wayta hundumaa waan isin barbaachisu hunda arkattanii, ammaas hojii gaarii hundumaa fuu akka isin irraa hafee ittiin gargaartan isin dandeeysisa.
[9] Akkuma Kitaaba keeysatti barreeyfame, “Inni miskiinootaaf arjummaa isaa ni hira, qaceelinni isaa tiis bara baraan jabaatee ti dhaabbata” jedha.
[10] Rabbi, nama shanyii facaasuuf kan shanyii kannu, inni kan biddeenaas nyaataaf namaaf kannu, shanyii teeysan isiniif haa barakachiisu, firii qaceelummaa teeysanii tiis isiniif haa hoddommeeysu.
[11] Isin haaluma hunda keeysatti arjoomuu akka dandeeysaniif, waanuma hundumaatti dureeyyii dha isin godha; namoonni hedduuniis gargaarsa gama keenyaa waan arkataniif jecha, Rabbiif galata galchu.
[12] Tajaajilli isin kannitan kun, waanuma amantootatti irrate guuttanii kannuu keeysan qofa odoo hin tahin, ammaas galanni namoota hedduu dhaan Rabbiif akka dhihaatuus godhee ti jira.
[13] Namoota tajaajiluun keeysan, Wangeela Kiristoositti amanamuu fi isaaf ajajamuu keeysan waan agarsiiseef, ammaas gargaarsi isin isaanii fi warra biraa tiif gootaniis, namoonni hedduun akka Rabbi galateeyfatani godhe.
[14] Ni'imaa Rabbi hizaabaan maletti isiniif kanneef jecha, isiniis yaadaa jaalalaan isiniifiis Rabbi kadhachaa ti jiru.
[15] Kannaa isaa, tan hammana hin jedhamneef, Rabbiif galanni haa tahu!