[1] Daasni addunya irratti keeysa jiraannu, [qaamni keenya] kun yoo diigame, kan harka namaa tiin hin ijaaramin, samii irratti mana bara baraan jiraatu tokko, Rabbi biraa akka qabnu ni beeyna.
[2] Hangasuu amma asitti, mana keenya kan samitti keeysa gallu san uffachuuf hawwiin aadaa ti jirra.
[3] Eega isa uffanne gaa, qullaa taanee arkamnuun hin hafne.
[4] Hanga daasa kana keeysa jiraannuu, mashquulaani ittanna; kuniis uffanni kun akka nu irraa fuudhamu barbaannee tii miti, inumaatuu itti fufnee uffifamuu dha barbaanna; akkasitti qaamni du'aaf kanname kun jireenyaan akka liqimfamuufi.
[5] Inni waanuma tanaaf nu qopheeyse, Rabbuma kan Ruuhaa isaa qabuulii waan dhufaa jiruu godhee nuuf kannee dha.
[6] Kanaaf jecha, hanga jasada qaamaa kana keeysa jiraannuu, mana Gooftaa irraa fagoo taahuu keenya beeynu illee, hoggayyuu mirkanii abdii ni qabna.
[7] Nuti amantii dhaan jiraanna malee, arkaa ijaa tiinii miti.
[8] Nuti jasada qaamaa kana keeysaa baanee, Gooftaan wajji jiraachuu akka filannu abdii jabdu qabna.
[9] Eegasuu jasada qaamaa keeysa jiraannuus, yookiin irraa fagaannuus, akeekni keenya Gooftuma gammachiisuu.
[10] Namni hundinuu matumatti, jasada qaamaa keeysa odoo jiruu waan hojjateef, gaarii taatuus yookiin hamtuu, gatii teenya fudhachuuf hundi keenyaahuu arshii firdii Kiristoos duratti dhihaachuu tu nu irra jira.
[11] Kanaaf nuti Gooftaa sodaachuu jechuun maal akka taate beeynee, namoota fudhachiisuu dha yaalla. Maalummaan teenyaas Rabbi biratti beekamtuu dha; akkasumatti ammas xalalii teeysan keeysattiis beekamoo akka taane niin abdadha.
[12] Nuti irra deebinee isinitti if dhaadeysuu keenyaa miti; nuun akka if dhaadattaniif carraa isiniif kannina; kuniis warra waan qalbii keeysa jiruun odoo hin tahin, kanneen waan ijatti mullatuun dhaadataniif, jawaaba isaaniif kannuu akka dandeeysaniifi.
[13] Yoo qalbiin kan nu gargalte taate, Rabbumaaf jecha; qalbiin wal bira fayyaa yoo nu taate ammoo, isiniif jecha.
[14] Namtichi tokko nama hundumaaf akka du'e, akkaataa kanaaniis namoonni hundinuu akka du'an amannee waan fudhanneef jecha, jaalalti Kiristoos nu qabdi.
[15] Kiristoos hundumaaf du'e; eegasuu warri jiran asii achi, mataa isaanii tiif jiraachuu odoo hin tahin, ammoo kan bakka isaanii du'ee ammaas kaafame saniif jiraachuu dha qaban.
[16] Eegasuu nuti ammaa jalqabnee, eenyu illee akka haala addunyaatti hin ilaallu; Kiristoos, wayta takka akkasitti kan laallee taanu illee, asii achi ammoo akkasitti isa hin hubannu.
[17] Kanaaf, namni Kiristoositti amane uumama haaraya taha; wanni moofaan dabree, kunoo waan haarayaa tu dhufe.
[18] Kun hundinuu Rabbi kan Kiristoosiin ifitti nu araarse biraahi tahe; inni ammaas tajaajila hojii araaraa nutti kanne.
[19] Kuniis, Rabbi dilii namaa odoo itti hin lakkaawin Kiristoosiin biyya addunyaa ifitti araarsaa ti ture; ergaa araaraa tanaas hadaraa dha nutti kanne.
[20] Kana waan taheef, nuti ambaasaadaroonni Kiristoos, akka waan Rabbi nu keeysaan isin dhageeysifatuu taanee, “Rabbitti araaramaa!” jennee ti isin kadhanna.
[21] Kiristoosuma dilii hin qabne keeysaan, qaceelina Rabbii akka taanuuf, nuuf jecha dilii dha isa godhe.