[1] Kabajamoo saahibban koo! Nuti warra abdii kanneen qabu eega taane, koottaa mee, waanuma jasada qaamaa keenyaa fi ruuhaa keenya najisu hundumaa irraa if haa xaaharruu; sodaa Rabbii tiin jiraachaa, qulqullummaa illaa hin qabne bira gahuuf haa tattaafannuu.
[2] Garaa nuuf balladhaa! Nuti nama tokko illee hin yakkine, nama tokko illee amala hin balleeysine, ammaas nama tokko illees gowwoomsinee itti haajaa hin baane.
[3] Tanaas yakka isinitti muruuf hin dubbadhu, akkumaan kanaan duraa huu jedhetti, wajjiin du'uu fi wajjiin jiraachuufiis, isin garaan keenya keeysa jirtu.
[4] Ani amantaa guddaan isin irraa qaba, hedduun isiniin dhaadadhaasi; rakkoolee nu irra gayan hunda keeysatti, hedduu dha jajjabeeyfamne, gammachuun tiyyaas hanga hin qabdu.
[5] Wayta Maqedooniyaa seenne, qaamni kiyya kun boqonnaa dhabee ti ture; gara itti garagalluus ni dhabne, alaan lolli adawwii tu nu irra ture, keeysa namummaa keenyaa tiin ammaas sodaani rakkanne.
[6] Rabbi inni warra gaddan jajjabeeysu ammoo, dhufa Tiitoosiin nu jajjabeeyse.
[7] Kuniis dhufa isaa qofaan odoo hin tahin, isa jajjabeeysuun keeysaniis irratti dabalamee ti; Tiitoos na yaaduu keeysan, booya teeysan, yaadaan anaa wajji dhaabbachuu keeysaniis hogguu anatti hime, gammachuun tiyya hizaabaa baate.
[8] Xalayaa tiyyaan isin gaddisiisee turu illee, amma sheenaa hin qabu; waytumaaf isin gaddisiisuu isii hogguun arke, xiqqo sheenawee tiin ture.
[9] Amma ammoo waaniin isin gaddisiiseef jecha odoo hin tahin, gaddi keeysan akka toowbattan, waan isin godheef jecha niin gammada; gadduun keeysan akkuma Rabbi haa tahu jedhetti waan tureef, karaa tokko illee nuu gocha keenyaan isin hin kasaarre.
[10] Gaddi fedhii Rabbii tiin gahu sheenaa hin qabu, toowbaa fiduu dhaan najaatatti nama geeysa; gaddi biyya addunyaa ammoo, du'a namatti fida.
[11] Gaddi fedhii Rabbii tiin tahe kun, maal akka isin keeysatti uume, eegasuu mee laalaa! Akkamitti akka isin hamiltan, xaliilummaa teeysan agarsiisuuf akkamitti akka fardeeyfattan, warra balleeysaniin akkamitti akka loltan, akkamitti akka if birrattan, hammam na arkuuf dharraa akka qabdan, badii irratti yakka muruuf hammam akka isin qophooytan; qafxii kanneen hundumaa irratti badii dhabuu teeysani mirkaneeysitan.
[12] Ani xalayaa san isiniif katabu illee, sababa warra nama miidhaniif yookiin nama miidhameef odoo hin tahin, ammoo isin hammam takka amanamoo akka nuuf taatan, Rabbi duratti akka isinitti mullattu godhumaafi ture.
[13] Tana hundumaaniis sadoo arkannee ti jirra. Sadoo teenya qofaaf odoo hin tahin, haaluma isin hundinuu isatti agarsiiftaniin, Tiitoos waan hedduu gammadeef jecha nutiis ammaas irra caalatti gammachuun nutti dhagayamte.
[14] Isiniin xiqqo isatti if dhaadadhee tiin ture, isiniis if na hin qaanfachiifne; akkuma wanni isiniin jenne hundinuu mirkana taatetti, akkasumatti ammaas isiniin Tiitoositti dhaadachuun tiyyaas mirkanooytee ti jirti.
[15] Akkaataa itti hundi keeysanuu barsiisa isaa tiif ajajamtanii, sodaa fi hollachuu dhaan isa simattan wayta yaadatu, jaalalti inni isiniif qabu tan dur irraa huu ni caalti.
[16] Aniis amantaa guutuu isin irratti qabaachuu kiyyaaf niin gammada.