[1] Gowwummaa tiyya xiqqo akka anaaf obsitaniin abdadha; eeyye, anumaaf obsaa.
[2] Ani akka intala dubra birkaa tan dhiira tokko heerumuuf qophooytetti, isin dhiheeysuuf, Kiristoosiif isin qaadhimee tiin jira; ani hinaaffaa Rabbi quba qabuuniin isiniif hinaafa.
[3] Akkuma bofichi, shaaxirummaa isaa tan kijibaa tiin Haawa gowwoomsetti, yaadni keeysaniis, Kiristoosuma garaa qulqulluu fi dhugumaan if kannitaniif jalaa garagalfama taha, jedhee sodaa irraan jira.
[4] Namni tokko dhufee, Yesuus nuti isinitti lallabne malee, Yesuus biraa yoo isinitti lallabe, yookiin Ruuhaa kanaan dura fudhattan malee, Ruuhaa biraa yoo fudhattan, yookiin Wangeela kanaan dura fudhattan malee, Wangeela biraa yoo fudhattan, caluma jettanii laafumatti fudhattan jechuu dha.
[5] Ani karaa tokko illeenuu, ergamoota, kanneen hundumaa irra caalan jedhamanii gaditti, wanniniin laalamuuf waan jiru hin seehu.
[6] Dubbachutti hayyuu tahuu baadhu illee, beekumsa numaan qaba; kanaas haaluma hundumaan, qaceellotti isiniif mirkaneeysinee ti jirra.
[7] Wangeela Rabbii gatee takkaan maletti isiniif lallabuuf, if gadi qabee isin ol kaasuu kiyyaa tu, dilii natti tahee laata?
[8] Gargaarsaan isaan irraa fudhadheen isin tajaajiluu dhaan, waldoottan biraa saamee tiin jira.
[9] Ammaas waytaan isiniin wajji turees, waan natti irrate naaf dhiheeysuun amantoota kanneen Maqedooniyaa dhufanii tu na dandaye malee, ani nama tokkotti illee huu ba'aa hin taane; akkanattiin if qabe, fuula duraafiis taanaan karaa tokkotti illee huu akkaan ba'aa isinitti hin taane ammaas ifumaan qabuuf taa'a.
[10] Dhugaa Kiristoosiin, if dhaadachuu kiyya, kutaa Akaayyaa keeysatti nam tokko illeen dhoorkamuu hin dandayu.
[11] Waaniin isin hin jaalanneefiin akkana jedhaa laata? Ani akkaan isin jaaladhuus, Rabbii tu naa beeka.
[12] Namoonni warri biraa carraa arkatanii, nutiis akkuma isaatti hojjanna jedhanii, nuun qixxaachuuf if dhaadachuu barbaadan san, bakka dhoorkuuf akkumaan amma hojjachaa jiruttiin itti furee hojjadha.
[13] Jarreen akkasii kun, ergamoota kijibaa ti, hojjatoota malaan-nyaattoota, isaan ergamoota Kiristoos yaame warra if fakkeeysuu dha.
[14] Sheeyxaanni illeen maleeykoota ifaa waan if fakkeeysuuf jecha, kun waan nama ajaa'ibsisuu miti.
[15] Kanaaf jecha, hojjatoonni isaa tiis hojjatoota qaceelinaa yoo if fakkeeysan, kun waan ajaa'ibamuu miti; gara dhumaattiis akkuma hojii isaanitti arkachuufi taa'u.
[16] Ammaas irra deebi'ee tiin dubbadha, namni tokko illeen gowwaa ana hin seehin! Yoo seetan ammoo, akkaan aniis xiqqo if dhaadachuu dandayuuf, akkuma nama gowwaa tokko fudhattanitti na fudhadhaa!
[17] Waa'ee dhaytaan if dhaadachuu tanaa, akka Gooftaan dubbachuuf anaaf kannetti odoo hin tahin, akka nama gowwaa tokkottiin dubbadha.
[18] Namoonni hedduun akka haala addunyaatti kan if dhaadatan eega tahee fuu, aniis mee ifiin dhaadadha.
[19] Isin hikma-qabeeysa waan taataniif, warra gowwootaaf gammachuun obsuuf ni dandeeysuu mitii?
[20] Nama gabra isin godhate, yookiin kan isin irraa nyaate, kan carraa argatee isinitti faaydawe, yookiin kan isin irra ejjetee if ol guddise, ammaas fuula keeysa kan isin kabalees, ni obsituuf.
[21] Nuti ammoo waan akkasii nama irratti godhutti dadhaboo akka turre qaanfachaa tiin dubbadha. Ammoo waanuma namni ittiin if dhaadachuuf ija jabaatu, aniis sanumaan ija niin jabaadha; kanaas akka nama gowwaa tokkottiin dubbadha.
[22] Isaan Ibrootaa waan tahaniifii? Aniis akkasuma. Warra Israa'el waan tahaniifii? Aniis akkasuma. Shanyii Abrahaam waan tahaniifii? Aniis akkasuma.
[23] Kaadamtoota Kiristoos waan tahaniifii? Tanatti ammoo anaa tu irra caala; tana akka nama qalbiin wal-bira fayyaa hin tahinittiin dubbadha. Ani hedduu caalchisee itti dadhabee, dedeebi'ee tiin itti hidhamee, caalattiin itti garafame, wayta hedduus du'aaf kannamee tiin ture.
[24] Ani wayta shan harka Yihudootaatti, roobiin afurtama tokko irruu garafamee tiin jira.
[25] Wayta sadih ulee dhaan tumamee tiin jira; wayta takka dhagaa dhaan rukutamee tiin jira; wayta sadih markabni naan caccaphe; guyyaa tokkoo fi halkan tokko bahar gubbaan ture.
[26] Amni kiyya adda hin citu; gaaga'ama galaana guutee tiin, shiftaan gaaga'amuun, nama saba kiyyaa tiin gaaga'amuun, nama saboota biraa tiin gaaga'amuun, gaaga'ama magaalaa keeysaa tiin, gaaga'ama baadiyyaa keeysaa tiin, gaaga'ama bahariin, akkasumatti ammaas amantoota kijibooniis gaaga'amni nu irra gahee ti ture.
[27] Hojitti dadhabee tiin carraaqe, halkan hedduus hirriiba malee bule, beelawe, dheebodheesi, waaniin nyaadhuus dhabe, hamadayya keeysa huccuun malee ture.
[28] Wanti biraa hundi haftee, guyyuu waldayoota kiristaanaa hundumaaf yaadaan cinqamuun anatti ulfaachaa ti jira.
[29] Eenyuu tu dadhabe, odoon ani hin dadhabin? Namni tokko dilitti yoo dhiibame, waa'ee isaa tiif garaan kiyya ana hin gubatuu ree?
[30] If dhaadachuun yoo ana barbaachise ammoo, waan dadhabbii tiyya agarsiiftuu niin if dhaadadha.
[31] Rabbi, Abbaan Gooftaa Yesuus, galateeyfamaan bara baraa, akkaan kijiba hin dubbanne ni beeka.
[32] Magaalaa Damaasqootti namtichi mooticha Areexaas jalatti bulchaa biyyaa ture, ana qabsiisuuf karra mandarichaa eeysisaa ti ture.
[33] Ani ammoo zambiilaan, karaa qaawa darbii mandarichaa tiin gadi buufamee tiin isaan qabamuu jalaa bahe.