[1] Anuma Phaawulosii tu, damboobummaa fi gara-laafummaa Kiristoosiin gadi jabeeysee isin kadhata; ani nama kan waytaan fuulletti isin arku ija-laafoo, kan ammoo waytaan isin biraa fagaadhu ija-jabaatu jedhamee dha.
[2] Hogguun isin bira dhufu, ija-jabina amantaan if irratti qabuun, warra kanneen inni akkaataa fedha jasadaatti jiraata jedhanii na shakkan irratti agarsiisutti, akkaan isin irratti agarsiisuuf hadaraa ana hin dhiibinaa! jedhee tiin isin kadhadha.
[3] Warruma biyya addunyaa irra jiraatu taanu illee ammoo, nuti warra duula jasadaa nama irratti oofuu miti.
[4] Meeshaan waraanaa teenyaas, tan akka biyya addunyaa tii miti; ammoo tan irkoo jabduu dirgim godhuuf, qiwwaa Rabbii qabduu dha.
[5] Waanuma beekumsa Rabbii duratti gufuu tahee, dhaytaan falamuuf dhaabbattu hundumaa diiynee, yaada hundaa boojinee Kiristoosiif ajajamsiifna.
[6] Eega ajajamuun teeysan raawwatamte booddee, gocha ajaja didu hundumaa adabuuf nuti qophee dha.
[7] Waanuma ija teeysan dura jiraa laalaa! Namni, amantaa if irratti qabaatee ani kan Kiristoosi ifiin jedhu jiraannaan, nutiis ammaas akkuma isaa sanitti, warra Kiristoos tahuu keenya if haa yaadachiisuu!
[8] Amrii Gooftaan, akka ittiin isin diiynuuf odoo hin tahin, akka ittiin isin ijaarruuf nuuf kanneen, silaa xiqqo keeysa dabree, ittiin if dhaadadhe illee, wanni na qaanfachiisu hin turre.
[9] Anuu nama xalayaa tiyyaan isin sodaachisuu yaalu fakkaachuu hin barbaadu.
[10] Namoonni hangi tokko, “Xalayaan isaa ulfaattuu fi cimtuu dha; inni nu duratti wayta dhihaatu ammoo, hammanaa miti, dubbiin isaa tiis waa humaa keeysaa huu hin jirtu” jedhanii ti jiru.
[11] Bakka nuti hin jirretti waanuma xalayaa teenyaan jennu sani, ammaas bakka itti arkamnuttiis warruma waanuma san godhu tahuu keenya, jarri kun hubachuu tu isaan irra jira.
[12] Nuti warra if dhaadheysan wajji if lakkaawuu, yookiin isaanitti if qixxeeysuu hin barbaannu; isaan wayta ifii wal miizaananii ammaas walitti if qixxeeysuuniis gowwummaa isaanii ti.
[13] Nuti ammoo hizaaba dabarree if hin dhaadannu; if dhaadachuun keenyaas daangaa Rabbi hojiif nuuf tilmaame keeysatti goona; daangaan kuniis kan isin bira illee gayu.
[14] Nuti, akka waan kanaan dura, isin bira hin gahinii, ammuma isin bira gahuuf hiixannuu tii miti. Nuti warra dura Wangeela Kiristoos wajjiin, karaa san hundumaa irra gara keeysan dhufnee dha.
[15] Hojii namoonni biraa itti dadhabaniin, if dhaadachuun, daangaa dabruu hin barbaannu; akkuma amantiin teeysan guddachaa deemtutti, daangaan hojii teenyaa tan isin biraa tiis ballachaa ti deemti jennee ti abdanna.
[16] Kuniis isin bira dabarree, isinii achitti Wangeela lallabuufi; nuti hojii, lafa warra biraa tiin keeysatti hojjatameen, if dhaadachuu hin barbaannu.
[17] Akkuma Kitaabni jedhutti, “Namni dhaadatu, gochaa Gooftaa tiin if haa dhaadatu!”
[18] Namticha Gooftaan faarsee tu fudhatamaa dha malee, namni ifumaa if faarsu fudhatamaa tahuu hin dandayu.