[1] Nuti warri Rabbii wajjiin hojjannu, ni'imaa Rabbii akkanumatti bilaashitti hin fudhatinaa jennee ti isin kadhanna.
[2] Rabbi, “Wayta ana biratti jaalatamee fudhatametti, si dhagayee tiin jira; guyyaa najaataattiis si gargaaree tiin jira” jedha. Kunoo, amma wayti jaalatamtee fudhatamte; guyyaan najaataa tiis kunoo arruma!
[3] Tajaajila kanninu keeysatti irrinni akka hin arkamneef jecha, wannummaan feetee taatu, nuti gufuu namatti hin taanu.
[4] Gara kaaniin ammoo, nuti karaa hundumaanuu akka kaadamtoota Rabbitti if dhiheeysina. Kuniis obsa guddaan, rakkachuu dhaan, cinqamuun, balaan nu mudattuus;
[5] ni garafamna, ni hidhamna, rabshaa nu irratti kaasu, hojii ulfaattuun miidhamuun, halkan hirriiba dhabuun, beelaaniis ni hubamna.
[6] Garaa xaliilaan, hubannaa qabaachuun, obsaa fi rahamataas qabaachuun, Ruuhal Qudusiin jaalala dhugaa dhaa ti agarsiifna.
[7] Dhugaa dubbachuu dhaan, ammaas humna Rabbii tiiniis ni dalayna; meeshaa qaceelinaa kanneen Rabbi nuuf kanne, harka mirgaa tii fi harka bitaatti qabanna.
[8] Kabajamaa, sablachaatiis, arrabfamaa, faarfamaatiis, malaan-nyaattuus ni jedhamna, nuti ammoo warra haqaa taanee ti jiraanna.
[9] Beekamoo taanee odoo jirruu, akka warra hin beekaminitti lakkaawamne, akka warra du'anitti lakkaawamnaasi, nuti ammoo kunoo ni jiraanna! Ni garafamna, ammoo hin ajjeefamne.
[10] Ni naasifamna, ammoo wayta hundumaa gammachuu dha qabna; deegoo taanee, ammoo namoota hedduu taajiroomsina; waa takka illee qabaachuu baannuus, wanni hundinuu teenyuma.
[11] Yaa warra Qorontoos, nuti baxalaquma goonee ti isinitti dubbanne, garaan keenyaas isiniif ballaa dha.
[12] Isinii tu garaa keeysan nuuf ballisuu dide malee, nuti garaa keenya isiniif ballisuu hin dinne.
[13] Akkuma nuti garaa isiniif ballannetti, isiniis garaa nuuf balladhaa! jedhee tiin, akkuma abbaan ilmaan isaatitti dubbatuttiin aniis isinitti dubbadha.
[14] Warra amantii didan wajjiin walitti hin hidhatinaa! Qaceelinninii fi jallinni maal walitti qabu? Ifninii fi dukkanti niis tokkummaa maalii ti qabu?
[15] Kiristoosii fi Sheeyxaanni hoo maal irratti walii galu? Namni amane tokko nama hin amanin wajjiin maal qooda qaba?
[16] Beeytel maqdas Rabbii, waaqayyolii tolfamoo wajjiin wali-galtee maali qabu? Numaatu beeytel maqdas Rabbii Jiraataa ti, Rabbiinuu, “Ani isaan keeysaan jiraadha, isaan jidduus niin deddeebi'a; ani Rabbii isaanii tiin taha, isaaniis ummata kiyya tahu” jedhee ti jira.
[17] Bakka biraattiis ammaas, “Eegasuu isaan keeysaa as bahaa, ammaas isan irraa gargar bahaa, waan najisaas harkaan hin tuqinaa! Aniis isiniin fudhadha, jedha Gooytaan.”
[18] Akkasumatti ammaas, “‘Ani Abbaa keeysaniin taha, isiniis dhiiraa fi dhalaan ilmaan kiyya taatu’ jedha Gooytaan inni hundumaa dandayu” jedhamee ti jira.