[1] Ибраимнинъ ве Давутнынъ союндан олгъан Иса Месих акъкъында ривает. Мына Онынъ баба-деделери:
[2] Ибраим – Исхакънынъ бабасы, Исхакъ – Якъупнынъ бабасы, Якъуп – Ехуданынъ ве агъа-къардашларынынъ бабасы эди.
[3] Ехудадан ве онынъ апайы Тамардан Перец ве Зерах догъулдылар. Перец – Хецроннынъ бабасы, Хецрон – Рамнынъ бабасы,
[4] Рам – Амминадавнынъ бабасы, Амминадав – Нахшоннынъ бабасы, Нахшон – Салмоннынъ бабасы эди.
[5] Салмондан ве онынъ апайы Рахавдан Боаз догъулды. Боаздан ве онынъ апайы Руттан Овед догъулды. Овед – Йишайнынъ бабасы,
[6] Йишай – Давут падишанынъ бабасы эди. Давут падишадан ве Уриянынъ сабыкъ апайындан Сулейман догъулды.
[7] Сулейман – Реховоамнынъ бабасы, Реховоам – Авиянынъ бабасы, Авия – Асанынъ бабасы,
[8] Аса – Ехошафатнынъ бабасы, Ехошафат – Ёрамнынъ бабасы, Ёрам – Уззиянынъ бабасы,
[9] Уззия – Ётамнынъ бабасы, Ётам – Ахазнынъ бабасы, Ахаз – Хизкиянынъ бабасы,
[10] Хизкия – Менашшенинъ бабасы, Менашше – Амоннынъ бабасы, Амон – Ёшиянынъ бабасы эди.
[11] Исраиллилер Вавилонгъа сюргюн этильгенде, Ёшиядан Еконья ве онынъ агъа-къардашлары догъулды.
[12] Вавилонгъа сюргюн этильгенден сонъ, Еконьядан Шеалтиэл догъулды. Шеалтиэлден Зеруббавел,
[13] Зеруббавелден Авиуд, Авиуддан Эльяким, Эльякимден Азор,
[14] Азордан Цадокъ, Цадокътан Ахим, Ахимден Элиуд,
[15] Элиуддан Элазар, Элазардан Маттан, Маттандан Якъуп догъулды.
[16] Якъуптан Мерьемнинъ акъайы Юсуф догъулды. Мерьемден Месих деп адлангъан Иса догъулды.
[17] Бойледже, эписи олып, Ибраимден Давуткъа къадар – он дёрт несиль, Давуттан Вавилонгъа сюргюнликкедже – он дёрт несиль, Вавилонгъа сюргюнликтен сонъ Месих догъгъандже – он дёрт несильдир.
[18] Иса Месих бойле догъды: Онынъ анасы Мерьем Юсуфкъа нишанлы эди. Амма оларнынъ никяхларындан эвель Мерьемнинъ Мукъаддес Рухтан бала беклегени белли олды.
[19] Онынъ киеви Юсуф инсафлы адам олгъаны себебинден, Мерьемден айырылмакъ ниетине кельди, лякин гизли, чюнки къадынны масхара этмеге истемеди.
[20] Бойле фикирге кельген вакъытта, гедже онынъ тюшюнде Раббиден бир мелек келип: – Эй, Давутнынъ огълу Юсуф! Сен Мерьемге эвленмектен асыл къоркъма. Онынъ къарнындаки Бала – Мукъаддес Рухтандыр.
[21] Мерьем огъул догъаджакъ, ве сен Онынъ Адыны Иса къояджакъсынъ. О, Озь халкъыны гуналарындан къуртараджакъ, – деди.
[22] Буларнынъ эписи, Раббининъ пейгъамбер ярдымынен айткъан сёзлери ерине кельмеси ичюн олды:
[23] «Бакъынъыз, къыз юклю олып, огъул догъаджакъ, Адыны Иммануэл къояджакълар». Иммануэл – «Алла бизнен» демектир.
[24] Юсуф уянгъанынен, Раббининъ мелеги онъа буюргъаныны япты ве Мерьемге эвленди,
[25] амма апайы огъул тапмагъандже онен ятмады. Догъгъан огълунынъ Адыны Иса къойды.