[1] Ayiwa, u ye Musa ka kitabu kalan jama bɛɛ ɲɛ na o waati la. U y'a sɛbɛnnen sɔrɔ o kɔnɔ ko Amɔn bɔnsɔn ni Moab bɔnsɔn si kana don Ala ka jama lajɛ so kɔnɔ,
[2] k'a masɔrɔ u ma na Israɛl bɔnsɔn kunbɛn ni dumuni ni minni ji ye. U ye Balam fana wele ka o sara ko a ka Israɛl bɔnsɔn danga, nka an ka Ala ye o danga yɛlɛma k'a kɛ duba ye.
[3] Ayiwa, mɔgɔw ye sariya kuma mɛn minkɛ, u ye Israɛl bɔnsɔn ni dunanw fara ka bɔ ɲɔgɔn na.
[4] Sani o kow ka kɛ, sarakalasebaa Eliasib min tun ye an ka Ala ka so kɔlɔsibaa ye, o ni Tobija tun ka surun ɲɔgɔn na.
[5] O ye fɛn mara yɔrɔ bonba di Tobija ma. Mugu sarakaw ni suma diyalanw ni minanw ani alikama jakaw ni diwɛn kɛnɛ ani tulu minw tun ka kan ka di Levitew ni dɔnkili dalaw ani dakɔlɔsibaaw ani sarakalasebaaw ma, olu tun bɛ bila o so kɔnɔ.
[6] Ne tun tɛ Jerusalɛm o fɛnw bɛɛ kɛ tuma la katuguni Babilonɛ masakɛ Artakserkses ka masaya san bisaba ni filanan la, ne tun seginna ka taa masakɛ yɔrɔ la. Nka waati dɔ tɛmɛnnen kɔ, ne ye lafiya waati ɲini masakɛ fɛ.
[7] Ne kɔseginna ka taa Jerusalɛm. Ne ye Eliasib ka jalakima kow ye o tuma la. Ne y'a sɔrɔ ko a ye Ala ka so kɔnɔ fɛnw mara yɔrɔ di Tobija ma.
[8] O ye ne dusu kasi kosɛbɛ. Ne ye Tobija ka minanw bɛɛ fili kɛnɛma.
[9] Ne ko u ka o bon saniya. U y'o kɛ. Ne ye Ala ka so kɔnɔ minanw ni mugu sarakaw ni suma diyalan mana kɛ o bon kɔnɔ ko kura.
[10] Ne y'a ye fana ko Levitew niyɔrɔw tun ma di u ma. O de kosɔn Levitew ni dɔnkili dala minw tun bɛ o baara kɛ, olu bɛɛ kelen-kelen bolila ka taa u ka dugukolo la.
[11] O tuma la ne ye kuntigiw lakari ko: «Mun y'a to Ala ka so bilara?» Ne ye Levitew ni dɔnkili dalaw bɛɛ lajɛ yɔrɔ kelen na ka u kɔsegin u ka baaraw la.
[12] O tuma la Juda bɔnsɔn bɛɛ taara ni u ka alikama jakaw ni diwɛn kuraw ni tulu jakaw ye fɛn mara bonw kɔnɔ.
[13] Ne ye sarakalasebaa Selemia ni sɛbɛnnikɛla Zadɔk ani Levitew la Pedaja bila bolo fɛn mara yɔrɔw kun na katuguni u jatera dannamɔgɔw ye. Ne ye Zakur denkɛ Hanan fara u kan. Zakur fa tun ye Matania ye. Olu ye fɛnw tila ka u di u balimaw ma.
[14] Ne ka Ala, i ka i hakili to ne la nin kosɔn. Ne ye ko ɲuman minw kɛ ne ka Ala ka so ani ko minw ka kan ka kɛ, i ka i hakili to olu bɛɛ la.
[15] O waati la, ne ye Juda bɔnsɔn dɔw ye minw bɛ rezɛn ji bɔ la lafiɲɛ don na. Dɔ wɛrɛw tun bɛ faliw doni ni alikama bɔrɛw ni rezɛn ji ani toro mɔw ani doni sifaw bɛɛ ye Jerusalɛm lafiɲɛ don na. Ne ye u lasɔmi ko u kana dumuni fɛn feere lafiɲɛ don na.
[16] Tirkaw fana sigilen tun bɛ yen, olu tun bɛ na ni jɛgɛ ni fɛn feereta sifaw bɛɛ ye ka olu feere Juda bɔnsɔn ma Jerusalɛm lafiɲɛ don na.
[17] Ne ye Juda bɔnsɔn na mɔgɔ tɔgɔbaw kɔrɔfɔ ko: «Aw bɛ mun ko jugu kɛ tan ka lafiɲɛ don tiɲɛn?
[18] Aw bɛnbaw ma o ɲɔgɔn kɛ wa? O de kosɔn Ala ma bɔnɛ sifaw bɛɛ lase an ni nin dugu ma wa? Aw dun bɛ lafiɲɛ don tiɲɛn ka Ala ka dimiya lawuli Israɛl bɔnsɔn kama.»
[19] O yɔrɔ nin bɛɛ ne ye ci fɔ ko sani dibi ka don, Jerusalɛm dondaw ka tugu ko u kana daw yɛlɛ sani lafiɲɛ don ka tɛmɛn. O kɔ, ne ye ne ka mɔgɔ dɔw jɔ dugu dondaw la walisa doni si kana don yen lafiɲɛ don na.
[20] O tuma la jagokɛlaw ani jago kɛ fɛn sifaw bɛɛ feerebaaw bɔra dafɛlaw la ka si Jerusalɛm kogo kɔ fɛ siɲɛ kelen wala siɲɛ fila.
[21] Ne ye u lasɔmi k'a fɔ u ye ko: «Mun kosɔn aw bɛ si dugu kɔ fɛ? Ni aw tora ka o kɛ, ne bolo tɛna dɛsɛ aw ma.» K'a ta o waati la, u tun tɛ na lafiɲɛ don na tun.
[22] Ne y'a fɔ Levitew ye ko u ka u yɛrɛw saniya ka na daw kɔlɔsi walisa lafiɲɛ don ka saniya. Ne ka Ala, i ka i hakili to ne la nin ko la fana ka i ka makari jira ne la ka kɛɲɛ ni i ka ɲumayaba dama dɔnbali ye.
[23] O donw yɛrɛ la, ne ye Yahutu dɔw ye minw ye Asdɔdkaw ani Amɔn bɔnsɔn ni Moab bɔnsɔn denmuso dɔw furu.
[24] U denw tilancɛ tun bɛ Asdɔd kan fɔ, u tun tɛ Yahutuw kan mɛn, nka u tun bɛ jamana wɛrɛw kan fɔ.
[25] Ne ye u lakari ka u danga ka u la caman gosi ka u kunsigiw tufa ka bɔ ka u wajibiya ko u ka u kali Ala tɔgɔ la ko u tɛna u denmusow furu olu denkɛw ma, ko u tɛna olu denmusow furu u denkɛw ni u yɛrɛw ye.
[26] Ne y'a fɔ u ye ko: «Aw m'a dɔn ko Israɛl bɔnsɔn ka masakɛ Solomani ye jurumu kɛ nin ko la wa? Ale bɔɲɔgɔnko masakɛ si tun tɛ diɲɛ yɔrɔ si la. A ka Ala y'a kanu k'a kɛ Israɛl bɔnsɔn bɛɛ ka masakɛ ye. Nka jamana wɛrɛ musow ye ale bila jurumu la.
[27] An kana a mɛn aw ta fan fɛ tun ko aw ye nin kojuguba kɛ ka an ka Ala kan bila ka jamana wɛrɛ musow furu.»
[28] O bɛɛ n'a ta sarakalasebaa Eliasib denkɛ Jojada denkɛw la kelen kɛra Bɛt-Horɔn Sanbalat birankɛ ye. Ne ye ale gɛn ka bɔ ne kɔrɔ.
[29] Ne ka Ala, i ka i hakili to nin cɛw la, katuguni u ye sarakalasebaaya baara ani i ka layidu tiɲɛn, o min dira sarakalasebaaw ni Levitew ma.
[30] Ayiwa, ne ye u saniya ka jamana wɛrɛ mɔgɔw bɛɛ bɔ u cɛma ka sarakalasebaaw ni Levitew ka baara cogo ɲɛnabɔ walisa u bɛɛ kelen-kelen ka u ka baara kɛ.
[31] Ne ye saraka jenita dɔgɔ ko ɲɛnabɔ waati bɛɛ kama ani suman kuraw kun fɔlɔ ko. Ne ka Ala, i ka i hakili to ne la ka ko ɲuman kɛ ne ye.