[1] Sanbalat y'a mɛn ko an bɛ dugu lamini kogo jɔ tuma min na, a dusu bɔra, a diminna kosɛbɛ. A yɛlɛla Yahutuw la.
[2] A y'a fɔ a balimaw ni Samari kɛlɛkɛ cɛw ɲɛ na ko: «O Yahutuw barikantanw bɛ mun kɛ? Mɔgɔ n'a to u ka o kɛ wa? U na sarakaw faga wa? U na o baara ban don kelen na wa? Kabakurun jeninen minw tununna dugukolo rɔ, u na olu labɔ ka baara kɛ ni u ye tun wa?»
[3] Amɔn bɔnsɔn Tobija min tun bɛ a kɛrɛ fɛ, o pɛrɛnna ko: «U bɛ kogo min jɔ, hali ni kungo wulu yɛlɛnna o kan, o na o kabakurun kogo labi.»
[4] An ka Ala, i tulo majɔ. U bɛ an mafiɲɛya. I ka u ka mafiɲɛyali kumaw kɔsegin u yɛrɛw ma. I ka u don jamana wɛrɛ mɔgɔw bolo, olu ka u cɛ ka taa u kɛ jɔnw ye.
[5] I kana u ka tilenbaliya ko yafa u ma, u ka jurumu kana jɔsi ka bɔ i ɲɛ kɔrɔ katuguni u ye i ka baarakɛlaw mafiɲɛya kosɛbɛ.
[6] Ayiwa, an ye kogo jɔ. A yɔrɔ bɛɛ sera a jɔ kundama tilancɛ ma katuguni mɔgɔw bɛɛ ye o baara minɛ u sɛbɛ la.
[7] Nka Sanbalat ni Tobija ani Arabuw ni Amɔn bɔnsɔnw ani Askɔdkaw y'a mɛn ko Jerusalɛm lamini kogo wulila, ko wow gerenna tuma min na, u diminna kosɛbɛ.
[8] U bɛɛ ye jɛ siri ko u bɛ na Jerusalɛm kɛlɛ ka dugu ɲaami.
[9] Nka an ye an ka Ala deli ka kɔlɔsibaaw sigi ka kɔlɔsili kɛ su fara tile kan, walisa olu ka an kɔlɔsi binkannikɛlaw la.
[10] O bɛɛ n'a ta Juda bɔnsɔnw y'a fɔ ko: «Baarakɛlaw barika b'a la ka dɔgɔya, k'a sɔrɔ ɲaman ɲaman ka ca. An tɛ se ka kogo jɔ.»
[11] An juguw b'a fɔ fana ko an tɛna foyi dɔn, an tɛna foyi ye fo u ka se an cɛma yan ka an faga ka nin baara lajɔ.
[12] Nka Yahutu minw sigilen bɛ u kɛrɛ fɛ, olu nana an lasɔmi siɲɛ tan, ko: «U bɛ na bi an kan ka bɔ an fan bɛɛ la.»
[13] O de kosɔn ne ye mɔgɔw jɔ kogo kɔ fɛ ani yɔrɔ lankolon na. U bɛɛ tun jɔra gwa-gwa ni u ka npanw ani u ka tamaw ni u ka bɔnnikɛ kalaw ye.
[14] Ne ye o bɛɛ filɛ minkɛ, ne wulila k'a fɔ mɔgɔ tɔgɔbaw ni kuntigiw ani mɔgɔ tɔw ye ko: «Aw kana siran u ɲɛ fewu. A' ye aw hakili to Matigi la, a ka bon, siranfɛnba don. A' ye kɛlɛ kɛ aw balimaw ni aw denkɛw ni aw denmusow ni aw musow ni aw ka sow kosɔn.»
[15] Kabini an juguw y'a mɛn ko an lasɔmina ani ko Ala ye u ka dabali tiɲɛn, an bɛɛ kɔseginna an ka kogo jɔli la. An bɛɛ kelen-kelen taara an ka baara kɛ yɔrɔw la.
[16] Kabini o don na, an ka mɔgɔw tilancɛ tun bɛ baara kɛ, tilancɛ labɛnnen tun don ni tamaw ni nɛgɛ bɛnnanw ni bɔnnikɛ kalaw ani nɛgɛ dulɔkiw ye. Kuntigiw jɔlen tun bɛ Juda ka mɔgɔw kɔ kɔrɔ.
[17] Kogo jɔlaw ni doni talaw ani minw bɛ doni talaw ɲun, olu tun bɛ baara kɛ ni u bolo kelen ye, kɛlɛkɛ minan tun bɛ u bolo dɔ la,
[18] katuguni npan sirilen tun bɛ kogo jɔlaw bɛɛ tɔgɔw la ka u to baara la. Buru fyɛla tun bɛ ne kɛrɛ fɛ.
[19] Ne y'a fɔ mɔgɔ tɔgɔbaw ni kuntigiw ni mɔgɔ tɔw bɛɛ ye ko: «Baara ka bon, an furancɛ ka jan ɲɔgɔn na kogo kan, an mabɔra ɲɔgɔn na.
[20] Ni aw ye buru fyɛkan mɛn yɔrɔ o yɔrɔ la, aw ka an sɛgɛrɛ yen. An ka Ala na kɛlɛ kɛ an ye.
[21] O cogo la, an na se ka baara kɛ, an tilancɛ na jɔ ni tamaw ye u bolo kabini tile bɔ tuma fo ka taa dolow bɔ.»
[22] O tuma la ne y'a fɔ mɔgɔw ye ko: «An fɛ mɔgɔw bɛɛ ni u ka baaradenw ka si Jerusalɛm, walisa ka an dɛmɛ kɔlɔsili la su fɛ ani baara la tile fɛ.»
[23] Ne kɔni, ani ne balimakɛw ni ne ka baaradenw ani ne kɔlɔsibaaw ma an ka finiw bɔ. An bɛɛ kelen-kelen taara ji da la ni an ka npan ye an bolo la.