[1] Ayiwa masakɛ Asuerus ye masaya kɛ jamana kɛmɛ ni mugan ni wolonwula kun na ka bɔ Inde fo ka taa se Etiopi.
[2] Ale tilew la, ka a sigilen to masasigilan kan a ka masadugu Suse kɔnɔ,
[3] a ka masaya san sabanan la, a ye dumuniba dila a ka jamana kɔnɔ mɔgɔ tɔgɔbaw ni a ka baaradenw ye. Perse jamana ni Medi jamana kɛlɛbolo kuntigiw ani kuntigibaw ani jamana kuntigiw bɛɛ lajɛlen tun bɛ a fɛ yen.
[4] A ye a ka nafolo ni a nɔɔrɔ ani a ka sebaaya jira u la tile kɛmɛ ni tile bisegin kɔnɔ.
[5] O kɔ, masakɛ ye dumuniba dila a ka masadugu Suse mɔgɔw bɛɛ ye, mɔgɔ misɛn fara mɔgɔba kan. A ye o kɛ tile wolonwula kɔnɔ a ka masaya du kɔnɔ, nakɔ tun bɛ o dukɛnɛ la.
[6] Fini jɛ ni finiɲɛ bin kɛnɛma ani fini bulaman dulonnen tun bɛ yen. U sirila kabakurunɲuman samasenw la ni warijɛ koolilenw ni lenfu jurukisɛ ani a lomaasa ye. Sanu ni warijɛ kalakaw dara kabakurunɲuman selekema nugulenw kan duguma. O kabakurunw tun ye ɲɛ bilenmanw ni jɛmanw ni nɛrɛmugumanw ani finmanw ye.
[7] U ye masakɛ ka diwɛn di mɔgɔw ma sanu minanw kɔnɔ, olu si ni si tun tɛ kelen ye. U ye a caya ka kɛɲɛ ni masakɛ ka tɛgɛ labilali ye.
[8] Nka karabali tun t'a la, katuguni masakɛ tun y'a fɔ a ka so kɔnɔ baara kuntigi ye ko a ka mɔgɔw bɛɛ kelen-kelen sago kɛ.
[9] Masakɛ muso Vasti ye dumuniba dila musow ye masakɛ Asuerus ka masaya so kɔnɔ.
[10] A tile wolonwulanan la, ka masakɛ nisɔndiyalen to diwɛn fɛ, masakɛ Asuerus ye ci fɔ masakɛ ka so kɔnɔ koɲɛnabɔlaw mɔgɔ wolonwula ye. Olu tun ye Mehuman ni Bizita ni Harbona ni Bigita ni Abagata ni Zetar ani Karikas ye.
[11] A ko u ka taa ka na ni masakɛ muso Vasti ye ka masafugula to a kun na walisa jama ni mɔgɔbaw ka a cɛɲɛ ye katuguni a cɛ tun ka ɲi.
[12] Masakɛ ye o ci fɔ a ka so kɔnɔ koɲɛnabɔlaw ye ko u ka o fɔ a muso Vasti ye. Masakɛ muso Vasti ma sɔn ka taa. O de kosɔn masakɛ diminna kosɛbɛ, a dusu bɔra kojugu.
[13] O tuma la hakilitigi minw bɛ waatiw dɔn, masakɛ kumana olu fɛ, k'a masɔrɔ masakɛ tun bɛ sariya dɔnbaaw ni kiri tilennen tigɛbaaw ɲininka.
[14] Minw tun bɛ a kɛrɛ fɛ, olu tun ye Karisena ni Setar ni Adimata ni Tarsis ni Merɛs ni Marisena ani Memukan ye. O cɛ wolonwula tun ye Persekaw ni Medikaw kuntigiw ye. Olu tun bɛ masakɛ ka yɔrɔ fɔlɔw la, u tun ka surun masakɛ la.
[15] Masakɛ y'a fɔ olu ye ko: «An ka mun kɛ masakɛ muso Vasti la ka kɛɲɛ ni sariyaw ye?» Sabu masakɛ Asuerus ye ci min fɔ a ye a ka cidenw da la, a ma sɔn ka o kɛ.
[16] Memukan ye jaabili kɛ masakɛ ni kuntigiw ɲɛ na ko: «Masakɛ muso Vasti ye ko jugu kɛ. Sariya tiɲɛnni dama tɛ, nka a ye masakɛ ka mara la kuntigiw ni a ka mara la cɛw bɛɛ dɔgɔya.
[17] O cogo la masakɛ muso ka ko kɛlen na fɔ musow bɛɛ ye. Olu na u cɛw dɔgɔya k'a fɔ ko masakɛ Asuerus tun ye ci fɔ ko masakɛ muso Vasti ka taa a ɲɛ kɔrɔ, nka a ma taa.
[18] K'a daminɛ bi la Perse jamana kuntigiw ni Medi jamana kuntigiw musow bɛɛ na masakɛ muso Vasti ka ko kɛlen mɛn ka kuma masakɛ ka kuntigiw fɛ. Olu na u cɛw dɔgɔya ka u dusuw dimin.
[19] Ni a diyara masakɛ ye, an ka sariya sigi ka o sɛbɛn Persekaw ni Medikaw ka sariya kitabu la walisa a kana yɛlɛma, ko an na Vasti bɔ a ka yɔrɔ la, ko a kana se masakɛ Asuerus ɲɛ kɔrɔ tun. Ko masakɛ ka muso wɛrɛ ɲini min ka fisa ni a ye.
[20] Masakɛ ka ci fɔlen kibaru na se a ka mara yɔrɔw bɛɛ la. Hali ni o masaya ka bon, musow bɛɛ na u cɛw bonya, mɔgɔ misɛn fara mɔgɔba kan.»
[21] O miirili diyara masakɛ ni kuntigiw bɛɛ ye. Masakɛ ye Memukan ka laadili sira taama.
[22] A ye sɛbɛn ci a ka mara yɔrɔw bɛɛ la ka kɛɲɛ ni maraw sɛbɛnni cogo ani siyaw bɛɛ ka kanw ye. A fɔra o sɛbɛnw kɔnɔ ko cɛw bɛɛ kelen-kelen ka kɛ u ka sow kuntigiw ye, u ka kuma u yɛrɛ ka siya kan na.