[1] Ayiwa mɔgɔw bɛɛ ye u lajɛ yɔrɔ kelen na fɛrɛkɛnɛ la ji donda fan fɛ. O kɔ, u y'a fɔ sɛbɛnnikɛla Esdrasi ye ko a ka na ni Musa ka sariya kitabu ye, Matigi ye o min sɛbɛn Israɛl bɔnsɔn ye.
[2] San kalo wolonwulanan tile fɔlɔ la, sarakalasebaa Esdrasi taara ni sariya kitabu ye jama ɲɛ na, cɛ fara muso kan ani mɔgɔ minw bɛɛ bɛ se k'a mɛn k'a faamu.
[3] U ye gwɛlɛ dila k'a kɛ jɔyɔrɔ ye dugu fɛrɛkɛnɛ la ji donda ɲɛ fɛ. Sɛbɛnnikɛla Esdrasi ye i jɔ o kan. Cɛw ni musow ani mɔgɔ minw bɛɛ bɛ se ka sariya kitabu kɔnɔ kuma faamu, a ye o kalan olu bɛɛ ɲɛ na k'a daminɛ sɔgɔma fo ka taa tile gwan. Mɔgɔ minw jɔlen tun bɛ a kɛrɛ fɛ, olu filɛ. Matitiya ni Sema ni Anaja ni Uri ni Hilkija ani Maseja jɔlen tun bɛ a kinin yanfan fɛ. Pedaja ni Mesaɛl ni Malkija ni Hasum ni Hasbadana ni Zakari ani Mesulam jɔlen tun bɛ a numan fɛ.
[5] Esdrasi ye kitabu da yɛlɛ mɔgɔw bɛɛ ɲɛ na. Ale jɔlen tun bɛ bɛɛ san fɛ. A ye sariya kitabu da yɛlɛ tuma min na, mɔgɔw bɛɛ wulila ka u jɔ o yɔrɔ nin bɛɛ.
[6] Esdrasi ye foli di Matigi Ala Masaba ma. Mɔgɔw bɛɛ y'a jaabi ko: «Amiina, amiina,» ka u bolo kɔrɔta san fɛ. O kɔ, u ye u biri duguma ka batoli kɛ Matigi ɲɛ kɔrɔ ka u ɲɛw birilen to duguma.
[7] O kɔ, Josue ni Bani ni Serebia ni Jamin ani Akub ni Sabetia ni Hodija ni Maseja ni Kelita ni Azaria ni Jozabad ni Hanan ni Pelaja ani Levite tɔw ye sariya kitabu kumaw kɔrɔ fɔ mɔgɔw ye ka u bɛɛ jɔlen to u jɔyɔrɔw la.
[8] U ye Ala ka sariya kitabu kalan k'a jɛya mɔgɔw bɛɛ ɲɛ na k'a kɔrɔ fɔ, fo mɔgɔw ye u ka ko kalannenw faamu.
[9] Jamana kuntigi Nehemi ani sarakalasebaa sɛbɛnnikɛla Esdrasi ani Levite minw tun bɛ mɔgɔw kalan, olu y'a fɔ mɔgɔw ye ko: «Nin don bilara Matigi aw ka Ala ye. Aw kana ɲɛnasisi ka kasi.» Katuguni mɔgɔw bɛɛ ye sariya kitabu kumaw mɛn minkɛ, u kasira.
[10] O kɔ, a y'a fɔ u ye ko: «Aw ka taa sogo tɔlɔlen dun ka minni fɛn dumanw min. Minw ma dɔ labɛn, aw ka dɔ ci olu ma katuguni nin don bilara an Matigi ye. Aw kana ɲɛnasisi k'a masɔrɔ Matigi ye nisɔndiya min di an ma, o ye aw barika ye.»
[11] Levitew ye jama laadi k'a fɔ ko: «A' ye aw makun k'a masɔrɔ nin don ka senu, aw kana aw ɲɛnasisi fewu.»
[12] Ayiwa jama bɛɛ taara so ka dumuni kɛ ka minni kɛ ka balo ci faantanw ma. U ɲagalila kosɛbɛ k'a masɔrɔ kuma minw fɔra u ye, u ye olu faamu.
[13] A tile filanan don, mɔgɔw bɛɛ ka gwatigiw ni sarakalasebaaw ni Levitew taara u lajɛ sɛbɛnnikɛla Esdrasi kɔrɔ walisa ka sariya kitabu kumaw kalan.
[14] U y'a sɛbɛnnen sɔrɔ sariya kitabu kɔnɔ ko Matigi y'a fɔ Musa da la ko Israɛl bɔnsɔn ka sigi gwaw kɔrɔ seli waati la san kalo wolonwulanan la.
[15] Ko u ka welewele da k'a fɔ duguw bɛɛ ni Jerusalɛm kɔnɔ ko: «A' ye taa kulu kan ka na ni olive jiribolow ni kungo kɔnɔ olive bolow ni mirte sun bolow ni ntamaro sun bolow ani jiri furama bolow ye ka gwaw jɔ i ko a sɛbɛnnen bɛ cogo min na.»
[16] O tuma la mɔgɔw bɔra ka taa ka na ni o jiribolow ye ka gwaw jɔ u ka so kun na ani u ka dukɛnɛw la ani Ala ka so dukɛnɛw la ani ji donda kɛrɛ fɛ kɛnɛ la ani Efrayim bɔnsɔn donda fɛrɛkɛnɛ la.
[17] Mɔgɔ minw bɛɛ nana ka bɔ jɔnya la, o jama bɛɛ ye gwaw jɔ ka sigi o gwaw kɔrɔ. Nka Israɛl bɔnsɔn tun ma a bɔɲɔgɔnko kɛ kabini Nun denkɛ Josue tile la fo ka na se o don ma. Ɲagaliba kɛra o don na kosɛbɛ.
[18] U ye Ala ka sariya kitabu kɔnɔ kumaw kalan don o don, kabini don fɔlɔ fo ka taa se a laban ma. U ye o seli kɛ tile wolonwula kɔnɔ. U ye jama lajɛ senuma kɛ tile seginnan don ka kɛɲɛ ni ci fɔlen ye.