[1] Hakalia denkɛ Nehemi ka kumaw. San mugannan la, Kisleu kalo la, ka ne to masadugu Suse kɔnɔ,
[2] Hanani min tun ye ne balimaw la kelen ye, o ni mɔgɔ wɛrɛw nana ka bɔ Juda jamana la. Yahutu tɔ tolen minw bɔra jɔnya la, ne ye u ɲininka olu ni Jerusalɛm ko la.
[3] U y'a fɔ ne ye ko minw bɔra jɔnya la ka taa u ka jamana la, ko olu bɛ tɔɔrɔ la, u maloyalen don. Jerusalɛm lamini kogow fana bilen don, a dala konw jenina ni tasuma ye.
[4] Ne ye o kumaw mɛn minkɛ, ne ye ne sigi ka kasi. Ne ɲɛnasisira kosɛbɛ tile caman kɔnɔ. Ne ye sun don, o kɔ ne taara sankolola Ala ɲɛ kɔrɔ ka delili kɛ ko:
[5] «Matigi, e min ye sankolow la Ala ye, Ala, i ka bon, i ye siranfɛnba ye. Mɔgɔ minw bɛ i kanu ka i ka ci fɔlenw mara, i bɛ i ka layidu dafa olu ye ka makari u la.
[6] Ne b'i deli ko i ka i ɲɛ yɛlɛ ka i tulo majɔ ka i ka jɔnkɛ ka delili lamɛn. Ne bɛ i deli sisan su fara tile kan i ka jɔnw, Israɛl bɔnsɔnw ko la. Ne bɛ jɔ Israɛl bɔnsɔnw ka jurumu la, an ye i hakɛ ta. Ne ni ne fa ka so fana ye jurumu kɛ.
[7] An ye kojuguba kɛ i la. I ye sariya ni ci fɔlen ani ko latigɛlen minw di i ka jɔnkɛ Musa ma, an ma olu mara.
[8] I ye kuma min fɔ i ka jɔnkɛ Musa ye, ne bɛ i deli, i ka i hakili to o la. I y'a fɔ ko ni an ye hakɛma kow kɛ, ko i na an jɛnsɛn siyaw cɛma.
[9] Nka ni an kɔseginna i ma ka i ka ci fɔlenw mara ka u kɛ, hali ni an ka mɔgɔw gɛnna fo ka se sankolo dan na, i ko i na an lajɛ ka bɔ yen. I ye yɔrɔ min ɲɛnatɔmɔ ka i tɔgɔ sigi yen, i ko i na an kɔsegin ka taa yen.
[10] «Ninw ye i ka baaradenw ni i ka mɔgɔw ye, i ye olu minw kunmabɔ ni i ka sebaayaba ni i bolo barikama ye.
[11] Matigi, ne bɛ i deli, i tulo majɔlen ka to ka i ka jɔnkɛ ka delili lamɛn. I ka jɔn minw sɔnna ka siran i ɲɛ, i ka olu fana ka delili lamɛn. I ka i ka jɔnkɛ ka ko ɲɛnabɔ bi, k'a to masakɛ ka makari ne la.» Ayiwa ne tun ye masakɛ ka minni fɛnw dibaa ye.