[1] Ayiwa, a fɔra Sanbalat ni Tobija ni Arabu Gesɛm ani an juguw tɔw bɛɛ ye, ko ne ye kogo jɔ ka ban, ko wo si tɛ a la nka ne ma konw don a da la.
[2] O tuma la Sanbalat ani Gesɛm ye ci bila ka ta'a fɔ ne ye ko: «Na an ka taa ɲɔgɔn fɛ Ono jɛkɛnɛ la dugu dɔ kɔnɔ.» Ayiwa, u tun bɛnna a la ko u bɛ ko jugu kɛ ne la.
[3] Nka ne ye cidenw bila ka taa a fɔ u ye ko: «Ne bolo degunnen bɛ baaraba la, ne tɛ se ka taa. Mun kosɔn ne ka nin baaraba bila ka a to yen ka taa aw fɛ yen?»
[4] U ye ci bila ne ma o cogo la fo siɲɛ naani. Ne ye u jaabi o cogo kelen na.
[5] O tuma la Sanbalat ye o ci kelen lase ne ma a siɲɛ duurunan la a ka baaraden bolo la, o nana ni o sɛbɛn dayɛlɛlen ye a bolo.
[6] A tun sɛbɛnna o kɔnɔ ko: «Mankan bɛ siyaw cɛma, Gesɛm y'a fɔ ko e ni Yahutuw b'a fɛ ka muruti, o de kosɔn i ye kogo jɔ. Ko i b'a fɛ ka kɛ u ka masakɛ ye, o de fɔra an ye.
[7] Ko i b'a fɛ ka kiraw sigi, olu ka i sigi ka kɛ Juda bɔnsɔnw ka masakɛ ye Jerusalɛm. Ayiwa sisan o miirili na se masakɛ tulo ma. O de kosɔn i ka na, an ka kuma ɲɔgɔn fɛ o ko la.»
[8] O tuma la ne ye a jaabi ko: «I bɛ min fɔ, o ye nkalon ye. E yɛrɛ de ye nin kow bɛɛ miiri.»
[9] Ayiwa, nin mɔgɔw tun b'a fɛ ka an lasiran. A tun bɛ u kɔnɔ ko an fari na faga ka baara dabila. Nka sisan, Ala, i ka ne bolo barika bonya.
[10] O kɔ, ne taara Delaja denkɛ Semaɛja ka so kɔnɔ. O tun ye so datugu a yɛrɛ da la. Delaja fa tun ye Mehetabɛl ye. Semaɛja y'a fɔ ne ye ko: «An ka taa Ala ka so kɔnɔ ɲɔgɔn fɛ yɔrɔ senuma kɔnɔ ka yɔrɔ senuma da tugu an da la, k'a masɔrɔ mɔgɔ dɔw b'a fɛ ka na i faga. U bɛ na su fɛ ka i faga.»
[11] Nka ne y'a jaabi ko: «Ne bɔɲɔgɔnko cɛ ka boli wa? Ne bɔɲɔgɔnko mɔgɔ jumɛn bɛ se ka don Alabatosoba kɔnɔ ka kisi o kɔ? Ne tɛna don yen fewu.»
[12] Ne y'a faamu ko Ala ma a ci o la, ko a ye kiraya kɛ ne kosɔn, k'a masɔrɔ Tobija ni Sanbalat ye wari di a ma.
[13] U ye wari di a ma ko a ka ne lasiran fo ne ka u ka kuma minɛ. O tun na kɛ jurumu ye ne fɛ. U tun na cogo sɔrɔ ka fere ne ma ka ne tɔgɔ tiɲɛn.
[14] Ne ka Ala, i ka i hakili to Tobija ni Sanbalat ka kɛwalew la ka i hakili to kiramusoma Noadia ani kira tɔw fana la, olu minw tun b'a fɛ ka ne lasiran.
[15] Ayiwa lamini kogo jɔli banna tile biduuru ni fila kɔnɔ, Elul kalo tile mugan ni duurunan don.
[16] O yɔrɔ nin bɛɛ, an juguw y'o mɛn. An kɛrɛ fɛ siyaw bɛɛ siranna ka u ja tigɛ. U bɛɛ y'a faamu ko nin ko kɛra ka kɛɲɛ ni an ka Ala sago ye.
[17] O waati la, Juda bɔnsɔn na mɔgɔw dɔw tun bɛ to ka sɛbɛnw ci Tobija ma, ale fana tun bɛ sɛbɛn ci u ma.
[18] Juda mɔgɔ caman tun ye u kali ka kɛ ale jɛɲɔgɔnw ye, katuguni Arak denkɛ Sekania birankɛ don. A yɛrɛ denkɛ Jokanan ye Berekia denkɛ Mesulam denmuso furu.
[19] U bɛɛ tun bɛ Tobija tɔgɔ ɲuman fɔ ne ɲɛ na ka ne ka kumaw lase Tobija ma. Fan wɛrɛ fɛ, a tun bɛ sɛbɛn ci ne ma walisa ka ne lasiran.