[1] Ayiwa jama la mɔgɔw ni u musow ye dajukɔrɔ kuma fɔ u balima Yahutuw ma.
[2] U dɔw ko: «An ni an denkɛw ani an denmusow ka ca, alikama ka di an ma walisa an ka dumuni kɛ ka balo.»
[3] Dɔ wɛrɛw ko: «An bɛ taa an ka forow ni an ka rezɛn nakɔw ni an ka sow tɔnɔmada walisa an ka alikama sɔrɔ kɔngɔ waati la.»
[4] U la dɔw ko: «An ye an ka forow ni an ka rezɛn nakɔw tɔnɔmada walisa an ka faama wari sara.
[5] O bɛɛ n'a ta an ni an balimaw bɛɛ ye farisogo kelen ye, an denw ni u denw ye kelen ye, nka an bɛ an denkɛw ni an denmusow tɔnɔmada ka kɛ jɔnw ye. An denmuso dɔw tɔnɔmadara ka ban. An tɛ se ka foyi kɛ katuguni an ka forow ni an ka rezɛn nakɔtuw bɛ mɔgɔ wɛrɛw bolo.»
[6] Ne ye u tɔɔrɔ kow ni o kumaw mɛn tuma min na, ne diminna kosɛbɛ.
[7] O tuma la ne ye cogo ɲini ka kuma mɔgɔ tɔgɔbaw ni kuntigiw fɛ k'a fɔ u ye ko: «A bɛ di sa? Aw bɛ juru don aw balimaw la ka tɔnɔ ɲini olu fɛ wa?» Ayiwa ne ye jamaba lajɛ u kama.
[8] Ne y'a fɔ u ye ko: «An balima Yahutu minw feerela siyaw ma, an ye an se ko kɛ ka olu kunmabɔ. Aw b'a fɛ ka aw balimaw feere wa? An ka u san wa?» U ma kuma, u ma ne jaabi.
[9] Ne y'a fɔ fana ko: «Aw bɛ min kɛ, o man ɲi. Aw tun man kan ka taama Ala ɲɛsiran na walisa an juguw siyaw kana yɛlɛ an na wa?
[10] Ne ni ne balimaw ni ne ka baaradenw ye wari ni alikama dɔnɔ u ma. Ayiwa ne bɛ aw deli ko aw ka juru min bɛ u la ko aw ka o yafa u ma.
[11] Aw ka u ka forow ni u ka rezɛn nakɔtuw ni u ka olive tuw ni u ka sow kɔsegin u ma bi. Aw ye wari ni suman ni diwɛn kɛnɛ ani tulu min minɛ u fɛ tɔnɔ ye, aw ka o fana kɔsegin u ma.»
[12] U y'a jaabi ko: «An na o bɛɛ segin u ma, an tɛna foyi ɲini u fɛ. An b'a kɛ i ko i y'a fɔ cogo min na.» O tuma la ne ye sarakalasebaaw wele u bɛɛ ɲɛ na ka u kali ko u na o layidu dafa.
[13] Ne ye ne ka dulɔki yuguyugu fana k'a fɔ ko mɔgɔ o mɔgɔ ma o layidu dafa, Ala ka olu yuguyugu ka bɔ u ka so ni u ka baara la. U na yuguyugu ka bɔ yen ten. Jama bɛɛ y'a fɔ ko: «Amiina.» U ye Matigi tanu. Mɔgɔw ye o layidu dafa.
[14] Ka fara o bɛɛ kan, kabini masakɛ ye ne sigi ka kɛ Juda jamana kuntigi ye don min na, o kɔrɔ ko k'a daminɛ masakɛ Artakserkses ka masaya san mugannan la fo ka taa se san bisaba ni filanan ma, san tan ni fila kɔnɔ, ne ni ne balimaw, an ma balo kuntigiya sara la.
[15] Kuntigi minw tun bɛ ne ɲɛ fɛ, olu ye doniba da mɔgɔw kun ka dumuni ni diwɛn ni warijɛ sikle binaani ɲini u bɛɛ fɛ. U ka baaradenw tun bɛ kuntigiya kɛ mɔgɔw kun na. Ne yɛrɛ ta fan fɛ, ne ma o kɛ Ala ɲɛsiran kosɔn.
[16] Ne yɛrɛ ye nin kogo jɔli baara kɛ. An ma foro si san. Ne ka baaraden bɛɛ lajɛlen ye o baara kɛ.
[17] Ka fara o kan, Yahutuw ni mɔgɔ tɔgɔbaw cɛ kɛmɛ ni biduuru ani minw nana ka bɔ siyaw cɛma, ne ye dumuni di olu bɛɛ ma.
[18] An tun bɛ ntura kelen faga don o don ani saga ɲɛnatɔmɔlen wɔɔrɔ ani kamanman fɛn caman. Tile tan o tile tan, ne tun bɛ diwɛn sifa bɛɛ caman di. Halio, ne ma faama wari minɛ mɔgɔ si fɛ k'a masɔrɔ baara tun ka bon mɔgɔw kan.
[19] Ne ka Ala, i hakili to ne la ka ko ɲuman kɛ ne ye k'a masɔrɔ ne ye nin mɔgɔw dɛmɛ.