[1] O kalo kelen tile mugan ni naaninan don, Israɛl bɔnsɔn bɛɛ ye ɲɔgɔn lajɛ ka sun don ka cafu fini don u kan na ka buguri kɛ u kan.
[2] Minw tun ye Israɛl bɔnsɔn ye, olu farala ka bɔ siya wɛrɛ mɔgɔw la ka u jɔ u dan na, u jɔra u ka jurumuw ni u bɛnbaw ka tilenbaliya kow la.
[3] U tora u jɔyɔrɔ la Matigi u ka Ala ka sariya kalan na lɛrɛ saba kɔnɔ. O kɔ, u y'u jɔ u ka jurumuw la ka Matigi u ka Ala bato lɛrɛ saba wɛrɛ kɔnɔ.
[4] O tuma la, Josue ni Bani ni Kadmiɛl ni Sebania ni Buni ni Serebia ni Bani ani Kenani yɛlɛnna Levitew ka gwɛlɛ kan ka kasikanba bɔ Matigi u ka Ala nɔ fɛ.
[5] O tuma la Levitew Josue ni Kadmiɛl ni Bani ni Hasabnia ni Serebia ni Hodija ni Sebania ani Petakja kumana ko: «Aw ka wuli ka aw jɔ ka barika da Matigi aw ka Ala ye badaa badaa. «Ɔwɔ, i tɔgɔ nɔɔrɔma ka tanu, o min bɛ dubaw ni tanuli bɛɛ san fɛ.»
[6] «E kelenpe ye Matigi de ye. E de ye sankolo da, sankolow bɛɛ kun na sankolow ni a dolow bɛɛ, ka dugukolo ni a kan fɛnw bɛɛ da, ani kɔgɔji ni a kɔnɔ fɛnw bɛɛ. E de bɛ ɲɛnamaya di fɛn bɛɛ ma. Sankolola kɛlɛbolow bɛɛ bɛ u biri i ɲɛ kɔrɔ.
[7] E Matigi Ala, e de ye Abrama ɲɛnatɔmɔ ka bɔ Kaldekaw ka jamana la Ur ka a tɔgɔ da ko Ibrahima.
[8] I y'a sɔrɔ ko ale dusukun tilennen don i ɲɛ kɔrɔ, i ye layidu ta a ye ko i na Kanankaw ni Hɛti bɔnsɔn ni Amɔr siya ni Ferɛz siya ni Jebuskaw ani Girgas siya ka jamana di a bɔnsɔn ma. E tilennen don, o de kosɔn i ye o layidu dafa a ye.
[9] «I ye an bɛnbaw tɔɔrɔ kow ye k'u to Misira jamana kɔnɔ, i ye u kasikan mɛn Kɔgɔji Bilen da la.
[10] I ye i ka kabakow ni taamashyɛnw kɛ u ye yen, walisa ka Faraon ni a ka jɔnw ni a ka jamana kɔnɔ mɔgɔw tɔɔrɔ, k'a masɔrɔ i y'a dɔn ko u ye an bɛnbaw minɛ kojuguya ka u tɔɔrɔ kosɛbɛ. I ye tɔgɔba sɔrɔ i ko min kɛra bi.
[11] I ye kɔgɔji cɛ tila fila ye u ɲɛ, u ye kɔgɔji cɛ tigɛ gwele kan. I ye u nɔgɛnbaaw bila ji dun na i ko kabakurun bɛ jigin ji dun na cogo min na.
[12] I ye u ɲɛ minɛ ni kabasen ye tile fɛ ka u ɲɛ minɛ ni kabasen tasumama ye su fɛ ka yeelen bɔ u ye u taa siraw la.
[13] I jiginna Sinayi kulu kan, i kumana u fɛ ka bɔ fo sanfɛ sankolo la ka sariya tilennenw di u ma ani kalan sɛbɛw ani i ka ci fɔlenw ni i ka sariya sɛbɛmaw.
[14] I ye i ka lafiɲɛ don senuma jira u la, ka ci fɔlenw ni ko fɔlenw ani sariya jira u la i ka jɔnkɛ Musa da la.
[15] I ye dumuni fɛn di u kɔngɔtɔ ma ka bɔ san fɛ sankolo la ka ji bɔ fara la k'a di u minnɔgɔtɔ ma. E tun ye i kali u ye jamana min ko la, i ye u ladon yen.
[16] «Nka an bɛnbaw ye kuncɛbaya kɛ ka u tulo gɛlɛya ka ban i ka ci fɔlenw ma.
[17] U ma sɔn ka i kan minɛ, i ye kabako minw kɛ u ye, u ɲinɛna olu kɔ. U ye u tulo gɛlɛya, u murutira ka kuntigi sigi u kun na ko u bɛ kɔsegin u ka jɔnya la Misira jamana la. Nka e Ala ma u bila, i labɛnnen bɛ ka yafali kɛ. I ye Ala hinɛma, makarima ye, i tɛ dimin joona, i ka makari ka bon.
[18] U ye sanu yeele ka misiden bisigi dila k'a fɔ ko: ‹An ka bato fɛn filɛ, o min ye an labɔ Misira jamana la,› ka e dusu kasi.
[19] Halio i ka ɲumayaba kosɔn, i ma u bila kungokolon kɔnɔ yen. Kabasen ma mabɔ u la tile fɛ, o tora ka u ɲɛ minɛ u ka taama sira kan. Kabasen tasumama ye u ɲɛ minɛ su fɛ, o tora ka yeelen bɔ u ye ka u taa sira jira u la.
[20] I ye i Ni ɲuman di u ma walisa ka u kalan. I ma manɛ dili dabila u ma. I ye ji di u ma ka u ka minnɔgɔ ban.
[21] I ye u balo san binaani kɔnɔ kungokolon kɔnɔ. Foyi ma dɛsɛ u la, u ka finiw ma kɔrɔ ka fara, u senw ma funun.
[22] I ye masayaw ni mɔgɔw don u bolo ka olu ka dugukolow tilatila u cɛ. U ye u sigi Hesbon masakɛ Sihon ka jamana ani Basan masakɛ Og ka jamana kɔnɔ.
[23] I ye u bɔnsɔn caya i ko sankolola dolow. I tun y'a fɔ u bɛnbaw ye ko u ka don jamana min kɔnɔ ka kɛ u ta ye, i ye u ladon yen.
[24] U bɔnsɔnw na sigi o jamana kɔnɔ. Kananka minw sigilen tun bɛ o jamana kɔnɔ, i ye olu kolo u ye ka olu ka masakɛw ni o jamana kɔnɔ mɔgɔw don u bolo k'a to u ka u sagona kow kɛ olu la.
[25] U ye dugu barikamaw ni dugukolo ɲumanw minɛ. U ye sow sɔrɔ minw falen bɛ fɛn ɲumanw la ka ji dingɛ sennenw ni rezɛn nakɔw ni olive nakɔw ani jiri dentaw caman caman sɔrɔ, u kɛra o fɛnw bɛɛ tigiw ye. U ye dumuni kɛ fo ka u fa, u ye lafiyaba sɔrɔ i ka ɲumayaba kosɔn.
[26] «O bɛɛ n'a ta, u ye i kan bila ka muruti i ma. U ye i ka sariya fili u kɔ fɛ. U ye i ka kiraw faga, olu minw tun bɛ u lasɔmi ko u ka kɔsegin i ma. U ye kojuguba kɛ i la.
[27] O de kosɔn i ye u don u juguw bolo, olu ka u tɔɔrɔ. U tɔɔrɔ waati la, u kasira i nɔ fɛ. I ye u kan lamɛn ka i to sankolo la. I ye tilabaaw ci u ma i ka ɲumayaba kosɔn, olu ye u tila ka bɔ u juguw bolo.
[28] Nka kabini u ye dɛmɛni sɔrɔ, u ye ko jugu kɛ daminɛ i ɲɛ kɔrɔ ko kura. I ye u don u juguw bolo ko kura, olu kɛra u kuntigiw ye. O tuma la, u y'a daminɛ ka kasi i nɔ fɛ, i ye u kan lamɛn ka i to sankolo la ka u tila ko caman ka kɛɲɛ ni i ka makariba ye.
[29] I ye u lasɔmi walisa u ka kɔsegin i ka sariya ma, nka u ye u tulo gɛlɛya. U ma i ka ci fɔlenw sira taama, u ye i ka ko latigɛlenw tiɲɛn. Ni mɔgɔ min ye i ka ci fɔlenw sira taama, o na ɲɛnamaya sɔrɔ u la. U murutira ka u kunkolo gɛlɛya, u ma sɔn ka i lamɛn.
[30] I ye u ko muɲu san caman ka u lasɔmi i Ni fɛ i ka kiraw da la, nka u ma olu lamɛn. O de kosɔn i ye u don jamana wɛrɛ mɔgɔw bolo.
[31] O bɛɛ n'a ta i ka ɲumayaba kosɔn, i ma u halaki ka u ban. I ma u to yen k'a masɔrɔ i ye hinɛ ni makaritigi Ala de ye.
[32] «Ayiwa sisan, an ka Ala, Alaba, Sebaayatigi, Siranfɛnba, e min ye i ka layidu dafa ni kantigiya ye, nin sɛgɛnba min ye an sɔrɔ, ka an ka masakɛw ni an ka faamaw ni an ka sarakalasebaaw ni an ka kiraw ni an bɛnbaw ani an ka mɔgɔw bɛɛ sɔrɔ k'a daminɛ Asiri masakɛw tilew la fo ka na se bi ma, i kana o jate ko fitinin ye.
[33] O ko minw bɛɛ ye an sɔrɔ, jo bɛ i fɛ o kow bɛɛ la, katuguni i ye kantigi ye, nka an ye kanntanw ye.
[34] An ka masakɛw ani an ka kuntigiw, an ka sarakalasebaaw ani an bɛnbaw ma i ka sariya sira taama. U ma u tulo majɔ i ka ci fɔlenw ani i ka lasɔmili kuma sɛbɛw la, i ye olu minw fɔ an ye.
[35] Ka u to hɛrɛ la u yɛrɛw ka jamana la, i ye ko ɲumanbaw kɛ u ye ka u to o jamana hinɛma la, i ye o min di u ma, u ma sɔn ka i bato yen. U ma sɔn ka fara u ka ko jugu la fewu.
[36] An filɛ jɔnya la bi. Ɔwɔ, i ye jamana min di an bɛnbaw ma walisa u ka a sɛnɛ sumanw ni a fɛn ɲumanw dun, an kɛlen filɛ jɔnw ye o jamana kɔnɔ.
[37] I ye an don masakɛ minw bolo an ka jurumuw kosɔn, nin jamana bɛ suman caman bɔ olu ye. Olu bɛ an ka mɔgɔw ni an ka baganw mara ka kɛɲɛ ni u yɛrɛw sago ye. An bɛ tɔɔrɔba la.»
[38] O kow bɛɛ kosɔn an bɛ layidu ta ni kantigiya ye ka o sɛbɛn. An ka faamaw ni an ka Levitew ni an ka sarakalasebaaw bɛ u bolonɔ kɛ a la.