[1] Masakɛ Artakserkses ka masaya san mugannan la Nisan kalo la, diwɛn tun bɛ masakɛ ɲɛ kɔrɔ. Ne ye diwɛn ta k'a di masakɛ ma. Ne tun ma ɲɛnasisi a ɲɛ kɔrɔ ni o don tɛ.
[2] Masakɛ y'a fɔ ne ye ko: «Mun y'a to i ɲɛnasisilen don, k'a sɔrɔ bana tɛ i la? O tɛ fɛn wɛrɛ ye dusu kasi kɔ.» O tuma la ne siranna kosɛbɛ.
[3] Ne y'a fɔ masakɛ ye ko: «Masakɛ ka si sɔrɔ badaa. Ne bɛnbaw kaburuw bɛ dugu min na, o tiɲɛnnen don, a dondaw jeninen don ni tasuma ye, ne man kan ka ɲɛnasisi wa?»
[4] Masakɛ ko: «I bɛ mun deli ne fɛ?» O tuma la ne ye sankolola Ala deli,
[5] o kɔ, k'a fɔ masakɛ ye ko: «Ni a diyara masakɛ ye, ni i ka jɔnkɛ ko diyara i ye, i k'a to ne ka taa Juda bɔnsɔnw ka jamana la, ne bɛnbaw kaburuw bɛ dugu min na walisa k'o jɔ ko kura.»
[6] Ka masakɛ muso sigilen to a kɛrɛ fɛ, a y'a fɔ ne ye ko: «I na waati joli kɛ o dugu taa yɔrɔ la? I na kɔsegin tuma jumɛn?» Masakɛ sɔnna ka ne bila ka taa, ne ye o waati dan fɔ a ye.
[7] Ne y'a fɔ masakɛ ye ko kura ko: «Ni a diyara masakɛ ye, i ka sɛbɛnw kɛ ka u di ne ma o ba kɔ fɛ faamaw kosɔn walisa olu ka sɔn ne ka tɛmɛn fo ka taa se Juda jamana la.
[8] I ka sɛbɛn dɔ fana di ne ma ka taa di masakɛ ka tu kɔlɔsibaa Asaf ma walisa o ka ne magoɲɛ jiriw di ne ma ka kɛlɛ kunbɛn so dondaw ni dugu lamini kogo dondaw ani ne sigi so dila.» Masakɛ ye olu di ne ma ka kɛɲɛ ni ne ka Ala ka marali ye.
[9] O tuma la ne taara o ba kɔ fɛ kuntigiw sɛgɛrɛ ka masakɛ ka sɛbɛnw di u ma. O y'a sɔrɔ masakɛ ye kɛlɛbolo kuntigiw ni sotigiw di ne ma.
[10] Sanbalat min bɔra Horɔn ani Amɔn bɔnsɔn ka baaraden Tobija, a fɔra olu ye ko mɔgɔ dɔ nana ko ɲuman kɛ Israɛl bɔnsɔnw ye minkɛ, o ma diya u ye fewu.
[11] Ayiwa ne sera Jerusalɛm ka tile saba kɛ yen.
[12] Ne wulila su fɛ ka taa ni mɔgɔ dama dɔ ye ne fɛ. Ne ka Ala ye baara min bila ne dusu la ka kɛ Jerusalɛm, ne tun ma o fɔ mɔgɔ si ye fɔlɔ. Bagan wɛrɛ tun tɛ ne fɛ yen ne ka yɛlɛnkan fali kɔ.
[13] Ne bɔra jɛkɛnɛ donda la su fɛ ka taa dragon kɔlɔn fan fɛ ka taa sununkun yɔrɔ donda la ka Jerusalɛm lamini kogow filɛ. U cilen don, u dala konw jenina ni tasuma ye.
[14] Ne bɔra yen ka taa ji boyi donda filɛ ani masakɛ ka ji dingɛ. Nka ne ka yɛlɛnkan fali tɛmɛn yɔrɔ tun tɛ yen.
[15] Ne taara kɔ da la su fɛ ka kogo filɛ, o kɔ, ne kɔseginna. Ne taara don jɛkɛnɛ donda fɛ ka kɔsegin ne ka so.
[16] Kuntigiw ma ne taa yɔrɔ dɔn ani ne tun b'a fɛ ka min kɛ, k'a masɔrɔ fo ka se o waati ma, ne tun ma foyi fɔ Yahutuw ni sarakalasebaaw ni mɔgɔ tɔgɔbaw ni kuntigiw ni mɔgɔ tɔw si ye, olu minw tun bɛ baara kun na.
[17] O tuma la ne y'a fɔ u ye ko: «An bɛ cogoya min na, aw ɲɛ bɛ o la. Jerusalɛm tiɲɛnna. A dala konw jenina tasuma fɛ. A' ye na an ka Jerusalɛm lamini kogow jɔ walisa an kana kɛ mafiɲɛya fɛn ye mɔgɔw ɲɛ na.»
[18] O kɔ, Ala bolo tora ne fɛ cogo min na, ne ye o lakali u ye. Masakɛ ye kuma minw fɔ ne ye, ne ye olu fɔ u ye. O tuma la u pɛrɛnna ko: «An ka wuli k'a kogo jɔ.» U ye ja gɛlɛya sɔrɔ ka baara ɲuman kɛ.
[19] Nka Sanbalat min bɔra Horɔn ani Amɔn bɔnsɔn ka baaraden Tobija ani Gesɛm min bɔra Arabi jamana la, an ka baara ko fɔra olu ye tuma min na, u yɛlɛla an na ka an lagosi ko: «Aw bɛ taa mun kɛ? Aw bɛ muruti masakɛ ma mun na?»
[20] Ne ye u jaabi ko: «Sankolola Ala yɛrɛ de na an dɛmɛ. An ye a ka baaradenw ye, an na wuli ka kogo jɔ. Aw kɔni, aw niyɔrɔ si tɛ Jerusalɛm la. Aw ka foyi tɛ yan, aw tɔgɔ tɛna sɔrɔ yan fewu.»