[1] Sarakalasebaaw kuntigi Eliasib ni a balima sarakalasebaaw wulila ka sagaw donda jɔ k'a di Ala ma k'a konw don. Ka bɔ Mea sankansojan na fo ka taa se Hananeɛl sankansojan ma, u ye o kogo fana jɔ ka o di Ala ma.
[2] Jerikokaw ye kogo jɔ Eliasib kɛrɛ fɛ. Imri denkɛ Zakur ye kogo jɔ olu kɛrɛ fɛ.
[3] Sena denkɛw ye jɛgɛ donda jɔ k'a daw labɛn ka konw don ka sɔgɔlanw ni kon balabalaw don a la.
[4] Hakoz denkɛ Uri denkɛ Meremot ye kogo jɔ ka tugu olu la. Mesezabɛl denkɛ Berekia denkɛ Mesulam ye kogo jɔ ka tugu olu la. Baana denkɛ Zadɔk ye kogo jɔ ka tugu olu la.
[5] Tekoakaw ye kogo jɔ ka tugu olu la, nka u ka mɔgɔ tɔgɔbaw ma sɔn ka baara kɛ u matigiw ye.
[6] Paseak denkɛ Jojada ni Besodia denkɛ Mesulam ye donda kɔrɔ dila. U ye kon dila ka sɔgɔlanw ani kon balabalaw don a la.
[7] Meletia min bɔra Gabaon ani Jadon min bɔra Meronot ani Gabaonkaw ni Mizpakaw ye kogo jɔ ka tugu olu la. U tun bɛ faama baara kɛ o ba kɔ fɛ faamaw ye.
[8] Harhaja denkɛ Uziɛl ye kogo jɔ ka tugu olu la. O tun ye sanu faga numu ye. Hanani min tun ye suma diyalan dilabaa ye, o ye kogo jɔ ka tugu olu la. U ye baara kɛ ten fo ka taa se kogoba ma.
[9] Hur denkɛ Refaja min tun ye Jerusalɛm kinda tila kelen kuntigi ye, o ye kogo jɔ ka tugu ale la.
[10] Harumaf denkɛ Jedaja ye baara kɛ a ka so kuntilenna la. Min ye baara kɛ ale kɛrɛ fɛ, o tun ye Hasabnia denkɛ Hatus ye.
[11] Min ye baara kɛ ka tugu u la, o tun ye Harum denkɛ Malkija ani Pakat-Moab denkɛ Hasub ye. Olu tun ye fuurunoba kɛrɛ fɛ sankanso lamini kogo dilabaaw ye.
[12] Halokes denkɛ Salum ni a denmusow ye kogo jɔ ka tugu olu la. Jerusalɛm kinda tila kelen kuntigi tun don.
[13] Hanun ni Zanoakkaw ye kuluw furancɛ donda dila. U y'a jɔ k'a konw don ka sɔgɔlanw ni kon balabalaw don a la. U ye nɔnkɔn ɲɛ waa kelen kogo jɔ fo ka taa se ɲaman bɔn yɔrɔ donda ma.
[14] Rekab denkɛ Malkija min tun ye Bɛt-Hakerɛm kinda kuntigi ye, o ye ɲaman bɔn yɔrɔ donda dila k'a kon don k'a sɔgɔlanw ni kon balabalaw don a la.
[15] Kol-Hoze denkɛ Salum min tun ye Mizpa kinda kuntigi ye, o ye ji boyi donda dila. A y'a jɔ k'a datugu ka konw ni sɔgɔlanw ani kon balabalaw don a la. Ale ye Siloe ji dingɛ kogo fana jɔ masakɛ ka nakɔ kɛrɛ fɛ fo ka taa se Dawuda ka dugu yɛlɛnyɛlɛnnan ma.
[16] Min ye baara kɛ ka tugu ale la, o tun ye Azibuk denkɛ Nehemi ye. Bɛt-Zur dugu kinda tila kelen kuntigi tun don. Ale ye baara kɛ Dawuda kaburu kuntilenna la fo ka taa se ji dingɛ ni kɛlɛkɛ cɛ barikamaw ka so ma.
[17] Levitew ye kogo jɔ ka tugu ale la. Rehum tun ye u ɲɛminɛbaa ye. Baani denkɛ tun don. Min ye baara kɛ olu kɛrɛ fɛ a ka kinda kosɔn, o tun ye Hasabia ye. Ale tun ye Keila kinda tila kelen kuntigi ye.
[18] Min ye baara kɛ a balimaw ye ka tugu olu la, o tun ye Henadad denkɛ Bavai ye. Ale tun ye Keila kinda tila kelen kuntigi ye.
[19] Josue denkɛ Ezɛr ye baara kɛ ale kɛrɛ fɛ. O tun ye Mizpa kinda kuntigi ye. Ale ye yɔrɔ wɛrɛ jɔ, a kɛra kɛlɛkɛ minanw mara yɔrɔ yɛlɛnyɛlɛnnan kuntilenna la fo ka se kogo seleke ma.
[20] Zabai denkɛ Baruk ye kogo yɔrɔ dɔ dila ka tugu ale la k'i jija a la kosɛbɛ ka bɔ kogo seleke la ka taa bila sarakalasebaaw kuntigi Eliasib ka so da la.
[21] Uri denkɛ Meremot ye kogo yɔrɔ dila ka tugu ale la, ka bɔ Eliasib ka so da la fo ka taa se Eliasib ka so dan na. Uri fa tun ye Hakoz ye.
[22] Jerusalɛm da fɛ yɔrɔ la, sarakalasebaaw ye kogo dila ka tugu ale la.
[23] Benjamɛn ni Hasub ye kogo yɔrɔ dila u ka so kuntilenna la ka tugu olu la. Maseja denkɛ Azaria ye kogo dila a ka so kɛrɛ fɛ ka tugu olu la. Maseja fa tun ye Anania ye.
[24] Henadad denkɛ Binui ye kogo yɔrɔ dɔ dila ka bɔ Azaria ka so fo ka taa se kogo seleke ma fo a seleke dogodogo la ka tugu ale la.
[25] Uzai denkɛ Palal ye kogo jɔ kogo seleke ni sankansojan kuntilenna la. O sankansojan bɛ masakɛ ka sanfɛ so kɔ fɛ, o min bɛ kasobon dukɛnɛ kɛrɛ fɛ. Pareos denkɛ Padeja ye kogo dila ka tugu ale la.
[26] Ayiwa, Netiniɛnw sigilen tun bɛ Ofɛl ka kogo jɔ fo ka taa se ji donda kuntilenna ma kɔrɔn yanfan fɛ ani kɔ fɛ sankansojan kuntilenna ma.
[27] Tekoakaw ye kogo yɔrɔ dɔ dila kɔ fɛ sankansojanba kuntilenna la ka taa se Ofɛl kogo ma ka tugu olu la.
[28] K'a daminɛ yɛlɛnkan so donda la, sarakalasebaaw bɛɛ kelen-kelen ye kogo yɔrɔ dɔ dila u ka so kuntilenna la.
[29] Imɛr denkɛ Zadɔk ye kogo dila a ka so kuntilenna la ka tugu olu la. Sekania denkɛ Semaɛja, kɔrɔn fɛ donda kɔlɔsibaa, o ye kogo dila ka tugu ale la.
[30] Selemia denkɛ Hanania ani Zalaf denkɛ wɔɔrɔnan Hanun, olu ye kogo yɔrɔ dɔ dila ka tugu ale la. Berekia denkɛ Mesulam ye kogo dila a ka bon kuntilenna la ka tugu olu la.
[31] Sanu faga numu kelen, Malkija, ye kogo dila fo ka taa se Netiniɛnw ka so ma ani jagokɛlaw ka so ma, Mifkad donda kuntilenna la fo ka taa se seleke sanfɛ so ma ka tugu ale la.
[32] Seleke sanfɛ so ni saga donda la cɛmancɛ kogo, sanu faga numuw ni jagokɛlaw ye o dila.