[1] Juda bɔnsɔn ka masakɛw Oziasi ni Jotam ni Akaz ni Ezekiasi ani Israɛl ka masakɛ Jeroboam, Joas denkɛ tilew la, Matigi ka kuma sere Beeri denkɛ Ose ma.
[2] Matigi kuma ko fɔlɔ filɛ nin ye a ka jama fɛ Ose da la. Matigi y'a fɔ a ye ko: «I ka taa jatɔmuso dɔ furu kaɲɛmɔgɔdenw bange, sabu nin jamana murutira Matigi ma ka bato fɛn fufafuw bato.»
[3] O tuma la Ose taara Diblayim denmuso Gomer furu. O ye kɔnɔ ta ka denkɛ bange a ye.
[4] Matigi y'a fɔ Ose ye ko: «I ka a tɔgɔ da ko Jizreɛl, k'a masɔrɔ ne na Jehu ka so sara sɔoni Jizreɛl fagali kosɔn ka Israɛl bɔnsɔn ka so ka masaya ban.
[5] O don na ne na Israɛl ka bɔnnikɛ kala kari Jizreɛl jɛkɛnɛ la.»
[6] Gomer ye kɔnɔ ta ko kura ka denmuso bange. Matigi y'a fɔ Ose ye ko: «I ka o tɔgɔ da ko Lo-Rukama k'a masɔrɔ don bɛ na, ne tɛna hinɛ Israɛl bɔnsɔn ka so la fewu. Ne tɛna yafa u ma.
[7] Nka ne, Matigi, u ka Ala, ne na hinɛ Juda bɔnsɔn ka so la ka u kisi. O tɛna kɛ kala wala npan wala kɛlɛ wala sow wala sotigiw barika la.»
[8] Lo-Rukama da bɔlen sin na, Gomer ye kɔnɔ ta ko kura ka denkɛ bange.
[9] Matigi y'a fɔ ko: «I ka o tɔgɔ da ko Lo-Ami, sabu aw tɛ ne ka mɔgɔw ye tun, ne tɛ aw ka Ala ye.»