[1] Kiri ko bɛ Matigi fɛ a ka jamana kɔnɔ mɔgɔw kama. Israɛl bɔnsɔn, Matigi bɛ min fɔ, aw ka o lamɛn. «Kantigiya niɲumaya tɛ yen. U ma ne dɔn Ala ye.
[2] Foyi tɛ yen dangali ni nkalon tigɛ ni mɔgɔ fagali ni sonyali ani jatɔya kɔ. U ka farin kosɛbɛ, u bɛ mɔgɔ faga tuma bɛɛ.
[3] O de kosɔn jamana na tɔorɔ. Jamana kɔnɔ mɔgɔw bɛɛ ani kungo sogow ni sanfɛ kɔnɔw na fasa ka ta'a fɛ. Hali kɔgɔji kɔnɔ jɛgɛw na sa ka ban.
[4] «O bɛɛ n'a ta, mɔgɔ si kana si kɔrɔfɔ, mɔgɔ si kana mɔgɔ wɛrɛ jalaki. Nka e yɛrɛ nɔ don, sarakalasebaa kuntigi. Kiri bɛ ne ni e cɛ.» Matigi ko ten.
[5] «I na talon ka bi tile gwan fɛ. I ni kira yɛrɛ sen na talonɲɔgɔn fɛ su fɛ. Ne na i ba faga.
[6] Ne ka mɔgɔw bɛ halaki u ka ko dɔnbaliya kosɔn, sabu i ye dɔnniya fili ka mabɔ i la. Ne na i ɲɔni, i tɛna kɛ sarakalasebaa ye tun. I ɲinɛna i ka Ala ka sariya kɔ, o de kosɔn ne fana naɲinɛ i denw kɔ.
[7] «U cayara cogo min na, u ka jurumu fana cayara ne kama ten. Ne na u nɔorɔ yɛlɛma ka kɛɲiginna fɛn ye.
[8] U bɛ u yɛrɛw balo ne ka mɔgɔw ka jurumuw la, olu ka tilenbaliya ko ka di u ye.
[9] Fɛn kelen na sarakalasebaa ni mɔgɔ tɔw bɛɛ sɔrɔ. Ne na u sara ka kɛɲɛ ni u taama cogo ye, ka u sara ka kɛɲɛ ni u ka kɛwalew ye.
[10] U na dumuni kɛ, nka u tɛna fa. U na jatɔya kɛ, nka u tɛna jiidi, k'a masɔrɔ u ye Matigi bila. U t'a fɛ ka baara kɛ a ye.
[11] «Kakalaya ni diwɛn kɔrɔ ni diwɛn kura bɛ u hakili tiɲɛn.
[12] Ne ka mɔgɔw bɛ u ka jiri bato fɛn ɲininka. U ka berew bɛ kow jira u la, k'a masɔrɔ kakalaya dusu ye u lafili. U ye jatɔya kɛ ka u ka Ala bila.
[13] U bɛ sarakaw faga kulu janw san fɛ ka wusulan suma duman wusu tintinw kan, ani sensunw ni puplie sunw ni tɛrɛbɛnte sunw kɔrɔ, k'a masɔrɔ olu ko ka di u ye. O de kosɔn aw denmusow bɛ kakalaya kɛ, aw denkɛw musow bɛ jatɔya kɛ.
[14] Ne tɛna aw denmusow sara u taama cogo jugu kosɔn. Ne tɛna aw denkɛw musow sara u ka jatɔya kow kosɔn, sabu cɛw yɛrɛw bɛ taa kakalamusow fɛ, ka saraka fagata bɔ jatɔmusow fɛ. O de kosɔn mɔgɔ hakilintanw na halaki.
[15] «E Israɛl, i ye i yɛrɛ don jatɔya la, nka Juda kana o ɲɔgɔn kɛ ka a yɛrɛ jalaki. Aw kana don Gilgal. Aw kana taa Bɛt-Avɛn. Aw kana aw kali Matigi ɲɛnama tɔgɔ la.
[16] K'a masɔrɔ Israɛl bɔnsɔn murutira i ko misi geren murutilen. Sisan Matigi bɛ u balo i ko sagaden bɛ balo jɛkɛnɛ fɛrɛlen na cogo min na.
[17] Efrayim bɔnsɔn nɔrɔlen bɛ boliw la. A' ye a to yen, a ka o kɛ.
[18] Ni u tilara diwɛn minni la tuma min na, u bɛ jatɔya kɛ. U ka kuntigiw bɛɲagali maloya kow dama la.
[19] Fiɲɛ na u ta a kamanfuraw kan ka taa ni u ye. U na maloya u ka sarakaw kosɔn.