[1] I ka buru fyɛ. Jugu bɛ pan ka na Matigi ka so kama i ko bɔn, sabu Israɛl ye kanntanya kɛ ka layidu tiɲɛn ka ne ka sariya tiɲɛn.
[2] U na kasi ne nɔ fɛ ko: «Ne ka Ala, an Israɛl bɔnsɔn, an bɛ i dɔn.»
[3] Nka ko min ka ɲi, Israɛl bɔnsɔn banna o ma. Juguw ye u nɔgɛn.
[4] U ye masakɛw sigi u yɛrɛw kun na, k'a sɔrɔ u ma ne ɲininka. U ye kuntigiw sigi, u ma o fɔ ne ye. U ye u ka warijɛw ni u ka sanuw kɛ boliw ye, o de kosɔn u na halaki.
[5] Samari, ban kɛra i ka sanu misiden ja dilalen na. Ne diminna u kɔrɔ. U na se ka yafali sɔrɔ tuma jumɛn?
[6] K'a masɔrɔ o sanu misiden ja dilalen ye Israɛl bɔnsɔn bolo baara nɔ ye. Maɲɛrɛ dɔnna y'a dila, Ala tɛ. Siga t'a la, Samari misiden ja dilalen na karikari.
[7] Israɛl bɔnsɔn ye fiɲɛ dan, u ka nafa sɔrɔlen na kɛ fiɲɛba ye. U tɛna alikama suman tigɛ, danni siw tɛna den. Hali ni u denna, jamana wɛrɛ mɔgɔw na u tiɲɛn.
[8] Israɛl bɔnsɔn yɛrɛ halakira. U kɛra siyaw ɲɛ na i ko bɔgɔ daga gwansan.
[9] U taara Asiri, u kɛra u dan na i ko kungo fali. Efrayim ye a kanubaaw san.
[10] U ye nili fɛn caman di siya wɛrɛw ma, o de kosɔn ne na o siyaw lajɛ u kama. Sɔoni u na tɔorɔ Asiri kuntigiw ka masakɛ bolo.
[11] Efrayim ye saraka bɔlan caman jɔ, ka jalaki ni jurumu bi a yɛrɛ kan.
[12] Hali ni ne ye ne ka sariya sɛbɛn siɲɛ waa kelen k'a di a ma, a na o jate jamana wɛrɛ mɔgɔw ka sariya ye.
[13] Saraka minw bɛ faga ne ye, Israɛl bɔnsɔn bɛ u bɔ ne ye ka u sogow dun, nka olu ko man di ne, Matigi ye fewu. Ne hakili tɛ bɔ u ka tilenbaliya kow kɔ, ne na u tɔorɔ u ka jurumuw kosɔn. U na kɔsegin ka taa Misira.
[14] Israɛl bɔnsɔnɲinɛna u Dabaa kɔ, ka masaya sow jɔ u yɛrɛw ye. Juda bɔnsɔn ye duguba barikama caman jɔ, nka ne yɛrɛ na tasuma tugu u ka duguw la. Tasuma na u ka masaya sow jeni.