[1] «O waati la, kuntigiba Mikaɛl na wuli ka i ka mɔgɔw dɛmɛ ka kɛlɛ kɛ. O don na kɛ tɔɔrɔba don ye. O bɔɲɔgɔnko tɔɔrɔ ma kɛ kabini siyaw da tuma la fo ka na se o don ma. I ka mɔgɔ minw tɔgɔw sɛbɛnnen bɛ kitabu kɔnɔ, olu na kisi.
[2] Minw dalen bɛ dugukolo jukɔrɔ, olu caman na kunun. Dɔw na kunun ɲɛnamaya banbali kama, dɔ wɛrɛw na kunun tɔɔrɔ ni maloya banbali kama.
[3] Minw ye hakili sɔrɔ, olu na manamana i ko sankolo nɔɔrɔ. Minw ye mɔgɔ caman bila tilennenya sira kan, olu na manamana tuma bɛɛ i ko dolow badaa badaa.
[4] «E kɔni Daniɛl, i ka o yeli fɛn ko to i kɔnɔ gundo la ka nin kitabu da tugu ni taamashyɛn ye fo ka taa se waati latigɛlen ma. Mɔgɔ caman na a kalan, dɔnniya kow na caya.»
[5] Ne Daniɛl, ne ye mɔgɔ fila wɛrɛ jɔlen ye. Kelen jɔlen tun bɛ ba fan kelen na, kelen tun bɛ ba fan dɔ fɛ.
[6] Lenfu fini tun bɛ cɛ min kan na, ni o jɔlen tun bɛ baji kan, o cɛw la kelen ye o ɲininka ko: «O kabakow na kɛ ka dafa tuma jumɛn?»
[7] Cɛ min jɔlen bɛ baji kan, ni lenfu fini bɛ a kan na, ne ye o kan mɛn. O y'a kininbolo ni a numanbolo kɔrɔta san fɛ ka i kali badaa ɲɛnamaya tigi la, ko o kow na kɛ san saba ni tila kɔnɔ. Ko o kow bɛɛ na kɛ ka dafa ni siya senuma barika bɛɛ banna tuma min na.
[8] Ne Daniɛl, ne ye o kumaw mɛn nka ne ma u faamu. Ne y'a fɔ ko: «Ne matigi, o kow laban na kɛ mun ye?»
[9] A ye ne jaabi ko: «Daniɛl, i ka taa, sabu nin kumaw dogolen datugulen na to ni taamashyɛn ye fo laban tuma ka se.
[10] Mɔgɔ caman na kɔrɔbɔ ka saniya ka jɛya. Nka mɔgɔ juguw na ko jugu kɛ, u si tɛna hakili sɔrɔ ka o faamu. Mɔgɔ hakilimanw dama na o faamu.
[11] K'a daminɛ don o don saraka dabila waati la fo ka taa se tiɲɛnnikɛla ka saraka haramulen waati ma, o na kɛ tile waa kelen ani kɛmɛ fila ni tile bikɔnɔntɔn ye.
[12] Ni mɔgɔ min ye muɲuli kɛ fo ka tile waa kelen ni kɛmɛ saba ni tile bisaba ni duuru dafa, o ye dubaden ye.
[13] «E kɔni ka taa fo laban. I na lafiya sɔrɔ. O kɔ i na wuli ka i niyɔrɔ sɔrɔ laban donw na.»