[1] O bɛɛ n'a ta Israɛl bɔnsɔn na caya i ko kɔgɔji da la cɛncɛn. Mɔgɔ si tɛna se ka u dan ka u dama dɔn. A fɔra u ye yɔrɔ min na ko: «Aw tɛ ne ka mɔgɔw ye,» a n'a fɔ u ye yen ko: «Aw ye Ala ɲɛnama denkɛw ye.»
[2] Juda bɔnsɔn ni Israɛl bɔnsɔn na u lajɛ yɔrɔ kelen na ka kuntigi kelen sigi u kun na. U na kɔsegin ka bɔ jɔnya jamana la k'a masɔrɔ Jizreɛl don na kɛ donba ye.
[3] Aw k'a fɔ aw balimakɛw ye ko, «Ami» k'a fɔ aw balimamusow ye ko, «Rukama.»
[4] Aw ka aw ba kɔrɔfɔ, aw ka a kɔrɔfɔ, k'a masɔrɔ a tɛ ne furumuso ye tun, ne tɛ a cɛ ye tun. A ɲɛ kana kakalaya filɛli kɛ tun, a ka jatɔya bila ka bɔ a disi la.
[5] Ni o tɛ, ne na a farilankolonya k'a farilankolon bila i ko a bange don. Ne na a kɛ i ko saheli kungo k'a kɛ i ko dugukolo jalan. Ne na a faga minnɔgɔ fɛ.
[6] Ne tɛna hinɛ a denw la sabu kakaladenw don.
[7] Tiɲɛ la, u ba y'a yɛrɛ bila jatɔya la. Muso min y'u bange, o nɔgɔlen don. K'a masɔrɔ a ko: «Ne na taa ne kanubaaw nɔ fɛ, olu minw ye dumuni ni ji di ne ma, ka ne fɛɛrɛbɔ ni sagasi ni lenfu fini ye ka tulu ni minni fɛnw di ne ma.»
[8] O de kosɔn ne na sira tigɛ a ɲɛ ka sira datugu ni nwɔniw ye. Ne na kogo jɔ a ɲɛ fɛ fo a tɛna se ka a ka sira ye.
[9] A na a kanubaaw nɔgɛn, nka a tɛna kun u la. A na u ɲini, nka a tɛna u ye. O kɔ, a n'a fɔ ko: «Ne na kɔsegin ne cɛ fɔlɔ ma, sabu ne tun bɛ hɛrɛ la o waati la ka tɛmɛn sisan kan.»
[10] O bɛɛ n'a ta a m'a dɔn ko ne ye dumuni ni diwɛn ani tulu di a ma, ka a ka warijɛ ni sanu caya, a ye olu minw di Baal ma.
[11] O de kosɔn ne na ne ka suman bɔsi a la suman tigɛ tuma la, ka ne ka diwɛn kɛnɛ fana bɔsi a la o se waati la. Ne ka sagasi ni lenfu fini minw kɛra k'a fɛɛrɛbɔ, ne na olu minɛ a la.
[12] Ne na a farilankolonya a kanubaaw ɲɛ na. Mɔgɔ si tɛna se ka a tila ka bɔ ne bolo.
[13] Ne na a ka nisɔndiya kow bɛɛ ban, ani a ka seli donɲɛnajɛw, ni kalo kura seliw ani a ka lafiɲɛ donw ani a ka jamalajɛ senumaw bɛɛ.
[14] Ne na a ka rezɛn nakɔw ni a ka toro dentaw bɛɛ tiɲɛn, a y'a fɔ olu minw ko la ko: «Ninw kɛra ne sara ye ne kanubaaw fɛ.» Ne na o yɔrɔw kɛ kungokolon ye, kungo waraw na u tiɲɛn.
[15] A ye wusulan wusu Baal ye ka a yɛrɛ masiri ni tulola nɛgɛw ni kanna kɔnɔnw ye, ka boli a kanubaaw nɔ fɛ ka ɲinɛ ne kɔ don minw na, ne na a sara olu la. Matigi ko ten.
[16] O de kosɔn ne na a nɛgɛn ka taa n'a ye kungokolon kɔnɔ ka dusu saaloli kuma fɔ a ye.
[17] O tuma la ne na a ka rezɛn nakɔw kɔsegin a ma. Akɔr jɛkɛnɛ na kɛ a jigi da yɔrɔ ye. A na nisɔndiya dɔnkiliw da i ko a npogotigima, i ko a bɔra Misira kɔnɔ don min na.
[18] Matigi ko: «O don na i na ne wele ko ‹Ne furucɛ›, nka i tɛna ne wele ko ‹ne ka Baal, ne makɛ› tun.
[19] Ne na bato fɛn Baal wala boli wɛrɛw tɔgɔw bɔ i da la. I hakili tɛna jigin u tɔgɔw la tun.
[20] O don na ne ni kungo waraw ani sanfɛ kɔnɔw ani dugukolo kan fɛn fofotaw bɛɛ na layidu ta u kosɔn. Ne na jamana kɔnɔ bonnikɛ kalaw ni npanw karikari ka kɛlɛ ban ka bɔ jamana kɔnɔ. Ne ka mɔgɔw na sigi hɛrɛ la.
[21] «Ne na i maminɛ ne yɛrɛ ye badaa. Ne na i maminɛ ne ye ni tilennenya ni tiɲɛ ni makari ani hinɛ ye.
[22] Ɔwɔ, ne na i maminɛ ne ye ni kantigiya ye. I na Matigi dɔn.»
[23] Matigi ko: «O don na, ne na lamɛnni kɛ. Ne na sankolo kan lamɛn, sankolo na dugukolo kan lamɛn.
[24] Dugukolo na sɛnɛ kɛ suman ani diwɛn ni tulu kan lamɛn, olu na Jizreɛl kan lamɛn.
[25] Ayiwa ne yɛrɛ na Israɛl kɛ danni si ye nin jamana kɔnɔ ka makari Lo-Rukama la. Ne n'a fɔ Lo-Ami ye ko: ‹I ye ne ka mɔgɔ ye›, a na ne jaabi ko: ‹I ye ne ka Ala ye.›»