[1] Ne tun b'a fɛ ka Israɛl kɛnɛya tuma min na, o yɔrɔ nin bɛɛ ne ye Efrayim bɔnsɔn ka tilenbaliya ni Samari ka juguya kow ye kɛnɛkan, sabu nanbara kow diyara u ye. Soɲalikɛla bɛ so sɔgɔ ka don so kɔnɔ, binkannikɛla bɛ cɛli kɛ dugu bɔlɔnw na.
[2] U tɛ miiri u yɛrɛw kɔnɔ ko ne hakili bɛ to u ka juguya kow bɛɛ la. Ayiwa sisan, u ka jurumuw ye u datugu, olu bɛ ne ɲɛ kɔrɔ.
[3] U bɛ masakɛ nisɔndiya ni u ka juguya ye, ka kuntigiw nisɔndiya ni u ka nkalon kumaw ye.
[4] U bɛɛ ye jatɔyakɛlaw ye. U bɛ i n'a fɔ buuru dilabaa ka fuuru gwoniman. Ni a bɛ buuru dɔgi tuma min na, a tɛ tasumaɲɔni fo buuru ka funun.
[5] An ka masakɛ ka seli don na, kuntigiw bɛ u yɛrɛw bana diwɛn caman minni kosɔn. Masakɛ ni nparabɔlaw bɛ jɛɲɛnajɛ kow la.
[6] Ka nparabɔlaw to u ka dabali la, u dusu bɔlen bɛ buuru dilabaa ka fuuru fɛ. U madalen bɛ su bɛɛ kɛ, nka sɔgɔma da fɛ u dusu bɛ wuli, i ko tasuma manaba bɛ tasuma seri cogo min na.
[7] U bɛɛ ka farin i ko fuurunoba kalaman. U bɛ u ka kiritigɛlaw jeni. U ka masakɛw bɛɛ bira, u si ma ne tɔgɔ wele ka u dɛmɛ.
[8] Efrayim bɛ jɛ siya wɛrɛw fɛ. Efrayim kɛra i ko takula yɛlɛmabali.
[9] Dunanw ye a barika ban, nka a ma bɔ a seere ma. A kunsigi jɛra, k'a sɔrɔ a ma o dɔn.
[10] Israɛl ka kuncɛbaya kɛra a yɛrɛ seere ye u yɛrɛw kama. U ma kɔsegin Matigi u ka Ala ma. O fɛnw bɛɛ y'u sɔrɔ nka halio, u ma a ɲini.
[11] Efrayim kɛra i ko ntubanni nalonma hakilintan. A denkɛw bɛ dɛmɛbaaw ɲini Misira. O kɔ, u bɛ taa Asirikaw sɛgɛrɛ.
[12] Ka u to sira kan ka taa, ne na ne ka jɔ fɛnsɛ u ɲɛ. Ne na u minɛ ne ka jɔ la i ko sanfɛ kɔnɔw. Ne na u tɔorɔ i ko a fɔra u ye u ka jamalajɛ yɔrɔ la cogo min na.
[13] Bɔnɛ bɛ u ye k'a masɔrɔ u bolila ka mabɔ ne la. U na halaki, sabu u ye kanntanya kɛ ne la. Ne kɔni tun b'a fɛ ka u kisi, nka u ye nkalon tigɛ ne ko la.
[14] U ma kasi ne nɔ fɛ u dusukun na, nka u bɛ kulo ka u to u ka dalanw kan. U tɛ miiri fɛn wɛrɛ la u ka suman tigɛli ni u ka diwɛn sɔrɔli kɔ. U ye ne bila.
[15] Ne de ye u kalan ka u bolow barika bonya, nka o bɛɛ n'a ta u bɛ dabali juguw miiri ne kama.
[16] Ni u yɛlɛmana, u tɛ taa Kɔrɔtalenba fan fɛ. U bɛ janfali kɛ i ko bonnikɛ kala dulen. U ka kuntigiw na faga ni npan ye, u ka fariya kow latigɛlen kosɔn. O de kosɔn u na kɛ yɛlɛbɔ fɛn ye Misira jamana kɔnɔ.