[1] Efrayim bɛ ne lamini ni nkalon ye. Israɛl ka so bɛ ne lamini ni nanbara ye. Karafe ma don Juda da la fɔlɔ Ala ta fan fɛ, Senuma Kantigi ta fan fɛ kɔni.
[2] Efrayim bɛ balo fiɲɛ fɛ, a bɛ boli kɔrɔn fɛ fiɲɛ nɔ fɛ. A bɛ nkalon caman tigɛ ka muruti don o don. A bɛ layidu ta Asirikaw ye ka tulu di Misirakaw ma.
[3] Matigi bɛ kiri tigɛ Juda fana kan ka Yakuba tɔorɔ o taama cogo jugu kosɔn. A na Juda sara ka kɛɲɛ ni o ka kɛwalew ye.
[4] Yakuba ye a balimakɛ sen tontoli minɛ ka u to u ba kɔnɔ. A kɛra cɛ ye tuma min na, a ye bari ta Ala fɛ.
[5] A ni mɛlɛkɛ ye bari ta, ale ye se sɔrɔ. A kasitɔ ye hɛrɛ deli o fɛ. O y'a sɔrɔ a tun sera Bɛtɛl ka ban. Ala kumana an fɛ yen.
[6] Matigi ye Kɛlɛbolowtigi Ala de ye. Ale tɔgɔ ko Matigi.
[7] E kɔni, i ka kɔsegin i ka Ala ma ka ɲumaya ni tilennenya mara. I jigi ka to i ka Ala kan tuma bɛɛ.
[8] Efrayim ye jagokɛla de ye. Sumanikɛ ja nanbarama bɛ a bolo. Mɔgɔw tɔɲɔli ko ka di a ye.
[9] Efrayim b'a fɔ ko: «Tiɲɛ la, ne fɛntigiyara, ne kɛra nafolobatigi ye, nka o bɛɛ lajɛlen ye ne bolo baara nɔ ye. Tilenbaliya ni jurumu ko si tɛ ne bolo baara nɔw si la.»
[10] Kabini i bɔ tuma la Misira, ne ye Matigi i ka Ala de ye. Ne na i lasigi i ka finisow kɔnɔ ko kura, i ko a bɛ kɛ seli donw na cogo min na.
[11] Ne kumana kiraw fɛ ka yeli fɛn caman jira, ka kuma ntalenw la kiraw da la.
[12] Ni Galad ma foyi kɛ tilenbaliyaw kɔ, u na halaki, siga t'a la. U ye misiw kɛ saraka fagataw ye Gilgal. U ka saraka bɔlanw na kɛ i ko kabakurunw tonnenɲɔgɔn kan ntugun kurulenw kan forow la.
[13] Yakuba bolila ka taa Siri jamana la. Israɛl y'a yɛrɛ don jɔnya la walisa a ka muso sɔrɔ. A kɛra bagan gɛnna ye walisa ka muso furu.
[14] Matigi ye Israɛl labɔ Misira jamana kɔnɔ kira dɔ bolo. Kira kɛra Israɛl kɔlɔsibaa ye.
[15] Efrayim ye ne dusu dimin kosɛbɛ. O de kosɔn, a ye mɔgɔ minw faga, a Matigi fana na o joli hakɛ bi a kan. Matigi na a ka mafiɲɛyali kow kɔsegin a yɛrɛ ma.