[1] «Ne ye Israɛl denmisɛnma kanu. Ne ye ne denkɛ wele k'a labɔ Misira jamana la.
[2] O bɛɛ n'a ta ne y'a wele ko caman, nka a y'i mabɔ ne la. A ye saraka bɔ Baal boli ye, ka suma diyalan wusu a ka ja dilalenw ye.
[3] Ne de ye Efrayim bolo minɛ k'a tɛtɛ, nka u m'a faamu ko ne bɛ u kɛnɛya.
[4] Ne ye u sama niɲumaya juruw ni kanuya sirilanw ye. Ne ye karafe bɔ a da la walisa a ka dumuni kɛ ko ɲuman.
[5] «U tɛna kɔsegin Misira tun, nka u na taa Asiri masakɛ yɔrɔ, sabu u t'a fɛ ka kɔsegin ne ma.
[6] Npan na u ka duguw ci, ka u ka dugu dondala konw tiɲɛn. Npan na dugu kɔnɔ mɔgɔw bɛɛ faga u ka dabali juguw kosɔn.
[7] Tiɲɛ la, ne ka mɔgɔw murutira ne ma. U bɛ wele ko u ka Kɔrɔtalenba filɛ, nka u si ma sɔn ka a bonya.
[8] «Efrayim, ne bɛ se ka i bila cogo di? Israɛl, ne bɛ se ka i janfa wa? Ne bɛ se ka ko jugu kɛ i la i ko Adima cogo di, ka i kɛ i ko Zeboim? Ne dusu bɛ lamaga na kɔnɔ, ne ka makari bɛ a cogo la tuma bɛɛ.
[9] Ne tɛna ne ka dimiya ko kɛ, ne tɛna Efrayim halaki tun. K'a masɔrɔ ne ye Ala ye, ne tɛ Hadamaden ye. Senuma min bɛ to i cɛma, o ye ne de ye. Ne diminnenba tɛna na i kama tun.
[10] U na tugu Matigi nɔ fɛ, o min bɛ konbokan bɔ i ko waraba. Ɔwɔ, a na konbokan bɔ, a denw na boli ka bɔ tilebi yanfan fɛ ka na.
[11] U bɛ na ka bɔ Misira i ko kɔnɔ panta, ka na ka bɔ Asiri jamana la i ko ntubanni. Ne na u lasigi u ka sow kɔnɔ.» Matigi ko ten.