[1] «Sarakalasebaaw, aw ka nin lamɛn. Israɛl ka so, i ka i tulo majɔ. Masakɛ ka so, i tulo majɔ. Kiri na bi aw kan sabu aw kɛra jan ye Mizpa, ka kɛ minɛli juru ye Tabɔr kulu kan.
[2] U ka sariya tiɲɛn kow cayara u ka sarakaw fagali ko la. Ne na u bɛɛ sara.
[3] Ne bɛ Efrayim dɔn. Israɛl dogolen tɛ ne la. I ye jatɔya kɛ, Efrayim. Israɛl y'a yɛrɛ nɔgɔ.»
[4] U ka kɛwalew bɛ u bali ka kɔsegin u ka Ala ma, katuguni kakalaya dusu bɛ u la. U ma Matigi dɔn.
[5] Israɛl bɔnsɔn ka kuncɛbaya kɛra a yɛrɛ seere ye. Israɛl bɔnsɔn ni Efrayim na bi u ka tilenbaliyaw kosɔn, hali Juda yɛrɛ fana na bi u fɛ.
[6] U ni u ka sagaw ni u ka misiw na taa Matigi ɲiniɲɔgɔn fɛ, nka u tɛna a ye. A bɔra u cɛma.
[7] U ye Matigi janfa, sabu u ye ɲɛmɔgɔdenw bange. A tɛ mɛn tun, kalo kelenɲɔgɔn, u ni u bolo fɛnw na halaki ka ban.
[8] Aw ka buru fyɛ Gibea. A' ye buru fyɛ Rama. Aw ka kasikanba bɔ Bɛt-Avɛn. Benjamɛn, i juguw bɛ i kɔ.
[9] Efrayim na halaki bɔnɛ don na. Ne ye ko dɔ latigɛ Israɛl bɔnsɔn kama, o tɛ yɛlɛma.
[10] Juda bɔnsɔn kuntigiw bɛ i ko mɔgɔ minw bɛ forow dancɛw yɛlɛma. Ne na ne ka dimiya yɛlɛma u kan i ko kɔji woyo.
[11] Efrayim tɔorɔla kiri tilennen kosɔn, sabu a taamana a yɛrɛ sagona siraw fɛ.
[12] O de kosɔn ne kɛra Efrayim kama i ko ntumuɲimilikɛla, ka kɛ i ko joli jugu tolilen Juda ka so kɔnɔ.
[13] Efrayim ye a ka bana dɔn, Juda ye a ka jogindaw dɔn. O tuma la Efrayim taara Asirikaw fan fɛ. A ye cidenw ci ka taa masakɛba Jarɛb sɛgɛrɛ, nka o masakɛ tɛ se ka aw kɛnɛya. A tɛ se ka aw jogindaw kɛnɛya.
[14] K'a masɔrɔ ne na kɛ Efrayim kama i ko waraba, ka kɛ Juda bɔnsɔn kama i ko waraba kamalen. Ɔwɔ, ne na u bɛɛ farafara. Jɔn na se ka u tila ka bɔ ne bolo? Ne na taa ni ne ka fɛn cɛlenw ye, mɔgɔ si tɛna se ka u bɔsi ne la.
[15] Ne na bɔ u cɛma ka taa ne sigi yɔrɔ la fo Israɛl bɔnsɔn ka a ka jalaki dɔn ka neɲɛda ɲini. U na kɔsegin ne ma u ka tɔorɔ waati la.