[1] Israɛl, i kana nisɔndiya. I kanaɲagalikan bɔ i ko siya tɔw b'a kɛ cogo min na, k'a masɔrɔ i tilennen tɛ. I ye jatɔya kɛ ka i ka Ala bila. I ye jatɔya sara ɲini gendekɛnɛw la.
[2] I tɛna balo sɔrɔ gendekɛnɛw ni diwɛn ji bɔ yɔrɔw la tun. Diwɛn kɛnɛ na dɛsɛ.
[3] I tɛna sigi Matigi ka jamana kɔnɔ tun. Efrayim bɔnsɔn na kɔsegin Misira jamana la ka Asirikaw ka dumuni nɔgɔlenw dumu.
[4] U tɛna diwɛn saraka bɔntaw bɔ Matigi ye tun. U ka sarakaw ko tɛna diya Matigi ye. O na kɛ u bolo i ko sanga bonda la dumuni, minw bɛ o dun, olu bɛɛ na nɔgɔ. Ɔwɔ, u ka buuru na kɛ u yɛrɛ dama ta ye, k'a masɔrɔ u tɛna don Matigi ka so kɔnɔ tun.
[5] Aw na mun kɛ jamalajɛ senuma donw ni Matigi ka seli donw na?
[6] A filɛ, u na taa yɔrɔ jan ka u ka jamana lankolon to. Misira jamana na u ladon, u suw na don Memfis dugu kɔnɔ. Bin jugu na u ka warijɛ fɛnɲumanw sɔrɔ, nwɔni na falen u ka finisow kɔnɔ.
[7] U tɔorɔ donw sera. U sara donw sera. Israɛl bɔnsɔn na o dɔn. Kira na kɛ fatɔ ye. Hakilitigiw na kɛ nalonmaw ye aw ka tilenbaliya ni aw ka kanbilali caman kosɔn.
[8] Efrayim kɛra kɔlɔsilikɛla ye ne ka Ala kama. Minɛli janw dara kira tɛmɛn siraw bɛɛ la. Jugu bɛ a ka Ala ka so kɔnɔ.
[9] U kɛra mɔgɔ sɔnkolonw ye i ko Gibeakaw. Matigi na a hakili jigin u ka tilenbaliya kow la, ka u tɔorɔ u ka jurumuw kosɔn.
[10] Israɛl ko tun diyara ne ye i ko kungo rezɛn sun. Ne tun ye aw bɛnbaw jate i ko toro mɔ kun fɔlɔ, nka u taara Baal-Peɔr ka o bato fɛn jugu bato. U kɛra haramulen ye i ko u ka bato fɛn kanuta haramulen.
[11] Efrayim nɔorɔ na pan ka taa i ko sanfɛ kɔnɔ. U tɛna bange kɛ, muso kɔnɔma tɛna sɔrɔ yen. U tɛna kɔnɔ ta tun.
[12] Hali ni u ye denmisɛnw sɔrɔ ka olu lamɔ, ne na olu bɔsi u la sani olu ka bonya. Tiɲɛ la, ni ne ye u bila, bonɛ bɛ u ye.
[13] Ne ye Tir mafilɛ tuma min na, ne ye Efrayim turulen ye dugukoloɲuman na. Efrayim na taa ni a denw ye fagali yɔrɔ la.
[14] Matigi, i ka a di u ma. I na mun di u ma? I ka u musow kɔnɔ tiɲɛn ka u musow sinw ja.
[15] U ka juguya bɛɛ bɛ jira Gilgal. Ne ye u koniya yen. Ne na u gɛn ka bɔ ne ka so kɔnɔ u ka kɛwale juguw kosɔn. Ne tɛna u kanu tun. U ka kuntigiw bɛɛ kɛra kanbilalikɛlaw ye.
[16] Efrayim tiɲɛnna, a dili bɛɛ jara. Hali ni u ye den kɛ, ne na u den kanulenw faga.
[17] Ne ka Ala na u fili, sabu u ma lamɛnni kɛ. U fililen na yaalayaala siyaw cɛma.