[1] رب موسایا ددی: «فئرعونون یانینا گدئب اونا دِه: ”عئبرانئلرئن تاریسی رب بله دیئر: خالقیمی آزاد بوراخ کی، منه عئبادت اتسئن!
[2] اگر سن اونو بوراخماقدان بویون قاچیردیب، ساخلاماغی داوام اتدئره‌سن،
[3] باخ، رب الئنی، زمئنده اولان حیوانلارین؛ آت، اِششَک، دَوه، مال-حیوان و قویون-کچئنئن اوستونه قالدیراجاق؛ چوخ آغیر وبا اولاجاق.
[4] لاکئن رب ائسرایئل اؤولادلارینین حیوانلاری ائله مئصئرلی‌لرئن حیوانلاری آراسیندا فرق قویاجاق. ائسرایئل اؤولادلارینا عایید اولان حیوانلاردان هچ بئری اؤلمه‌یه‌جکدئر.“»
[5] رب واخت تعیئن ادئب ددی: «رب بونو اؤلکه‌ده صاباح اده‌جک.»
[6] محض بونو دا رب صاباحی گون اتدی. مئصئرلی‌لرئن بوتون حیوانلاری اؤلدو. آمّا ائسرایئل اؤولادلارینین حیوانلاریندان هچ بئری اؤلمه‌دی.
[7] فئرعون آدام گؤندَ‌ردی و باخ، ائسرایئللی‌لرئن حیوانلاریندان حتّا بئری ده اؤلمه‌مئشدی. لاکئن فئرعونون اوره‌یی عئنادکار اولدو و او خالقی آزاد بوراخمادی.
[8] رب موسایا و هارونا ددی: «کوره‌دن ائکی اوووچ دولوسو کول گؤتورون. قوی موسا اونو فئرعونون گؤزو قاباغیندا گؤیه سَپسئن.
[9] بوتون مئصئر تورپاغیندا توز قالخاجاق، ائنسانلارین و حیوانلارین بدنی گؤینه‌ین چئبانلار تؤره‌ده‌جک.»
[10] اونلار کوره کولونو گؤتوروب فئرعونون حوضوروندا دایاندیلار. موسا اونو گؤیه سَپدی، ائنسانلارین و حیوانلارین بدنئنه گؤینه‌ین چئبانلار چیخدی.
[11] سِحربازلار دا بو چئبانلارا گؤره موسانین قاباغیندا دایانا بئلمه‌دئلر؛ چونکی چئبانلار سِحربازلارین دا بدنلرئنه، بوتون مئصئرلی‌لر کئمی چیخمیشدی.
[12] ربّئن موسایا ددئیی کئمی اولدو: رب فئرعونون اوره‌یئنی عئنادکار اتدی و فئرعون اونلارا قولاق آسمادی.
[13] رب موسایا ددی: «صاباح سحر تزدن قالخ و فئرعونون قاباغیندا دایانیب اونا بله دِه: ”عئبرانئلرئن تاریسی رب بله دیئر: خالقیمی آزاد بوراخ کی، منه عئبادت اتسئن!
[14] چونکی من بو دفه سنئن، اعیانلارینین و خالقینین اوستونه بوتون بلالاریمی گؤندَ‌ره‌جیم. بوندان بئله‌جکسن کی، بوتون دونیادا منه بَنزه‌ر یوخدور.
[15] اگر ائندی اَلئمی اوزادیب سنی و خالقینی وبا ائله جزالاندیرسایدیم، یر اوزوندن سئلئنئب کَسئلردئنئز.
[16] اونا گؤره سنی قورویوب ساخلادیم کی، اؤز گوجومو سنه گؤرسدئم و آدیم بوتون دونیایا اعلان ادئلسئن.
[17] سن حله ده منئم خالقیما آغالیق ادئب، اونلاری بوراخمیرسان.
[18] باخ، من صاباح بو واخت چوخ گوجلو بئر دولو گؤندَ‌رئرم: اله بئر دولو کی، مئصئرئن قورولماسیندان بری اورادا اولماییب.
[19] ائندی حیوانلارینی و چؤلده اولان هر شیئنی اَمئن-آمانلیغا آپار، چونکی زمئده قالان بوتون ائنسانلار و حیوانلار اِوه گتئرئلمَسه، اونلارین اوستونه دولو یاغاندا اؤله‌جکلر.“»
[20] فئرعونون اعیانلاریندان بعضئلری ربّئن سؤزوندن قورخوب اؤز قول و حیوانلارینی تَلَسئک اِولرئنه گتئردئلر.
[21] ربّئن سؤزونه اعتئناسیزلیق ادنلر، اؤز قوللارینی و حیوانلارینی زمئده قویدولار.
[22] رب موسایا ددی: «الئنی گؤیه اوزات. قوی بوتون مئصئر تورپاغینا و اورادا اولان ائنسانلارین، حیوانلارین و بوتون زمی بئتکئلرئنئن اوستونه دولو یاغسین.»
[23] موسا دَیَنَکئنی گؤیه اوزاتدی. رب ائلدیریملا دولو گؤندَ‌ردی و یره اود دوشدو؛ رب مئصئر تورپاغی اوستونه دولو یاغدیردی.
[24] بله‌جه، چوخ گوجلو بئر دولو یاغدی. دولو ائچئنده اود آلیشیردی؛ مئصئر مئلّتئنئن قورولوشوندان بَری، بورادا بله بئر دولو اولمامیشدی.
[25] دولو بوتون مئصئر تورپاغیندا آدامدان حیوانا قدر ووردو و زمئده اولان هر بئتکئنی محو اتدی و هر آغاجی قیریب تؤکدو.
[26] آمّا ائسرایئل اؤولادلارینین یاشادیغی گوشِن وئلایتئنه دولو یاغمادی.
[27] فئرعون موسانی و هارونو چاغیرتدیریب اونلارا ددی: «بو دفه گوناه اتدئم. رب صالحدئر، شرئر اولان من، و منئم خالقیمدیر.
[28] ربّه یالوارین، چونکی کئفایتجه ائلدیریم و دولو باش ورئب. من ده سئزی آزاد بوراخارام و بورادا داها قالمازسینیز.»
[29] موسا اونا ددی: «شهردن چیخاندا الئمی ربّه طرف اوزاداجاغام، ائلدیریم دایاناجاق و داها دولو یاغمایاجاق. بوندان بئله‌جکسن کی، دونیا ربّئنکئدئر.
[30] لاکئن من بئلئرم کی، سن و اعیانلارین گئنه ده تاریدان قورخمورسونوز.»
[31] بو واخت کتان و آرپا محصولو محو اولدو، چونکی آرپا دن گتئرمئش، کتان دا یِتئشمئشدی.
[32] آمّا بوغدا و قیرمیزی بوغدا محصولو محو اولمادی؛ چونکی اونلار گِج یِتئشئرلر.
[33] موسا فئرعونون یانیندان شهردن چیخیب الئنی ربّه طرف اوزاتدی؛ ائلدیریم و دولو دایاندی و یره یاغیش یاغمادی.
[34] فئرعون یاغیشین، دولونون و ائلدیریمین دایاندیغینی گؤروب گئنه ده گوناه اتمه‌یه باشلادی، اؤزو و اعیانلاری اورَکلرئنی عئنادکار اتدئلر.
[35] ربّئن موسا واسئطه‌سی‌ائله ددئیی کئمی، فئرعونون اوره‌یی عئنادکار اولدو و او، ائسرایئل اؤولادلارینی آزاد بوراخمادی.