[1] رب موسایا ددی:
[2] «بئرئنجی آیین بئرئنجی گونو ربّئن خیمه‌سئنی یعنی حوضور چادیرینی قور.
[3] شهادت ساندیغی اورایا قوی و پرده ائله قاباغینی کَس.
[4] سونرا مئزی گتئر، اوستونه اشیالاری دوز. چیراقدانی گتئر، چیراقلاری دا قوراشدیر.
[5] بوخور اوچون قیزیل قوربانگاهی شهادت ساندیغینین قاباغینا قوی. خیمه‌نئن گئرئش آراکَسمه‌سئنی ده قور.
[6] یاندیرما قوربانلاری اوچون قورولان قوربانگاهی خیمه‌نئن یعنی حوضور چادیرینین گئرئشئنئن موقابئلئنده یِرلَشدئر.
[7] بؤیوک لَیه‌نی حوضور چادیری ائله قوربانگاهین آراسینا قوی، ائچئنه سو تؤک.
[8] اطراف حیطی و حیطئن دروازاسینین آراکَسمه‌سئنی قور.
[9] سونرا مسح یاغینی گؤتوروب، خیمه‌نی و ائچئنده‌کی هر شیی مسح ات؛ بله‌جه اونو و بوتون لوازئماتینی تقدئس ات کی، موقدّس اولسون.
[10] یاندیرما قوربانلاری اوچون قورولان قوربانگاهی، اونون لوازئماتینی مسح ات و قوربانگاهی تقدئس ات کی، او لاپ موقدّس اولاجاق.
[11] بؤیوک لَیه‌نی و اونون آلتلیغینی مسح ادئب، تقدئس ات.
[12] هارونلا اوغوللارینی حوضور چادیرینین گئرئشئنه گتئر و اورادا سو ائله یویوندور.
[13] هارونا موقدّس پالتارلار گِیئندئر. اونو مسح ادئب، تقدئس ات کی، منه کاهئنلئک اتسئن.
[14] سونرا هارونون اوغوللارینی گتئرئب، اونلارا خئرقه‌لر گِیئندئر.
[15] آتالارینی مسح اتدئیی کئمی اونلاری دا مسح ات کی، منه کاهئنلئک اتسئنلر. اونلار نسئلدن-نسئله ابدی کاهئنلئک اوچون مسح اولوناجاقلار.»
[16] رب موسایا نجه امر اتمئشدی، او دا بو جور اتدی.
[17] بله‌جه ائکئنجی ائلئن، بئرئنجی آیین بئرئنجی گونونده خیمه قورولدو.
[18] موسا خیمه‌نی قوردو: آلتلیقلارینی قویدو، چَرچئوه‌لرئنی بَرکئتدی، دئرَکلرئنی قوردو و سوتونلارینی دئکَلتدی.
[19] خیمه‌نئن اوستونه چادیر سالدی، اونون اوستونه ده چادیرین اؤرتویونو قویدو. ربّئن موسایا امر اتدئیی کئمی اولدو.
[20] بوندان سونرا او شهادت لؤوحه‌لرئنی گؤتوروب، ساندیغین ائچئنه قویدو. دئرَکلری ساندیغا تاخدی، کفّاره قاپاغینی دا ساندیغین اوستونه قویدو.
[21] ساندیغی خیمه‌نئن ائچئنه گتئردی و آراکَسمه پرده‌سئنی قوروب، شهادت ساندیغینین قاباغینی کَسدی. ربّئن موسایا امر اتدئیی کئمی اولدو.
[22] مئزی حوضور چادیرینین ائچئنده، خیمه‌نئن شئمال طرفئنده، پرده‌نئن باییر طرفئندن یِرلَشدئردی.
[23] اونون اوستونه ربّئن حوضوروندا چؤرک دوزدو. ربّئن موسایا امر اتدئیی کئمی اولدو.
[24] چیراقدانی دا حوضور چادیرینین ائچئنده، مئزئن موقابئلئنده، خیمه‌نئن جنوب طرفئنده یِرلَشدئردی.
[25] چیراقلارینی دا ربّئن حوضوروندا قوراشدیردی. ربّئن موسایا امر اتدئیی کئمی اولدو.
[26] قیزیل قوربانگاهی دا حوضور چادیرینین ائچئنده، پرده‌نئن قاباغیندا یِرلَشدئردی؛
[27] اونون اوستونده عطئرلی بوخور یاندیردی. ربّئن موسایا امر اتدئیی کئمی اولدو.
[28] خیمه‌نئن گئرئشئنده آراکَسمه‌نی قوردو.
[29] یاندیرما قوربانلاری اوچون قورولان قوربانگاهی، خیمه‌نئن، یعنی حوضور چادیرینین گئرئشئنده یرلشدئردی؛ اونون اوستونده یاندیرما قوربانینی و تاخیل تقدئمئنی گتئردی. ربّئن موسایا امر اتدئیی کئمی اولدو.
[30] بؤیوک لَیه‌نی حوضور چادیری ائله قوربانگاه آراسیندا یِرلَشدئرئب، ائچئنه یویونماق اوچون سو تؤکدو.
[31] موسا، هارون و هارونون اوغوللاری اورادا اَل-آیاقلارینی یودولار.
[32] نه زامان حوضور چادیرینا گئردئلر، نه زامان قوربانگاها یاخینلاشدیلار، ربّئن موسایا امر اتدئیی کئمی یویوندولار.
[33] خیمه ائله قوربانگاهین اطرافیندا حیطی قوردو و حیط دروازاسینین آراکَسمه‌سئنی آسدی. بله‌جه موسا ائشلری تاماملادی.
[34] او واخت بولود حوضور چادیرینی بورودو و ربّئن جلالی خیمه‌نی دولدوردو.
[35] موسا حوضور چادیرینا گئره بئلمه‌دی، چونکی بولود اونون اوستونده یرلشمئشدی و ربّئن جلالی خیمه‌نی دولدورموشدو.
[36] ائسرایئل اؤولادلارینین بوتون سفری بویو بولود خیمه‌نئن اوستوندن قالخاندا یولا دوشَردئلر؛
[37] لاکئن بولود قالخمایاندا، قالخدیغی گونه قدر یولا دوشمَزدئلر.
[38] بوتون سفرلری بویو ائسرایئل اؤولادلارینین گؤزلری قاباغیندا گوندوز ربّئن بولودو خیمه‌نئن اوستونده، گجه‌لر ده اود بولودون ائچئنده ائدی.