[1] بِصه‌لِل اَقاقئیا آغاجیندان ساندیق دوزَلتدی. ساندیغین اوزونلوغو ائکی قول‌آچ یاریم، اِنی قول‌آچ یاریم و بویو قول‌آچ یاریم ائدی.
[2] اونو ائچه‌رئدن و چؤلدن خالئص قیزیللا اؤرتدو، اطرافینا دا قیزیل قالئب دوزَلتدی.
[3] اونون دؤرد آیاغی اوچون دؤرد تؤکمه قیزیل حالقا، ائکی حالقانی بئر یانی اوچون، قالان ائکی حالقانی دا او بئری یانی اوچون دوزَلتدی.
[4] اَقاقئیا آغاجیندان دئرَکلر دوزَ‌لدئب اوستونو قیزیللا اؤرتدو.
[5] ساندیغی داشیماق اوچون دئرَکلری ساندیغین یانلارینداکی حالقالارا کچئرتدی.
[6] خالئص قیزیلدان کفّاره قاپاغینی دوزَلتدی؛ اوزونلوغو ائکی قول‌آچ یاریم، اِنی ده قول‌آچ یاریم ائدی.
[7] کفّاره قاپاغینین هر ائکی اوجو اوچون یاستیلانمیش قیزیلدان ائکی کَرّوب دوزَلتدی.
[8] بئر کَرّوبو قاپاغین بئر اوجوندا، او بئرئسئنی ده او بئری اوجوندا دوزَلتدی؛ قاپاغین ائکی اوجوندا اولان کَرّوبلار اونونلا بئر حئصّه‌دن ائدی.
[9] کَرّوبلار یوخاری طرف آچیلمیش قانادلاری ائله کفّاره قاپاغینی اؤرتدولر. کَرّوبلارین اوزلری بئربئرئنئن موقابئلئنده قاپاغا طرف ائدی.
[10] اَقاقئیا آغاجیندان بئر مئز دوزَلتدی؛ اوزونلوغو ائکی قول‌آچ، اِنی بئر قول‌آچ، بویو دا قول‌آچ یاریم ائدی.
[11] اونو خالئص قیزیللا اؤرتدو، اطرافینا قیزیل قالئب دوزَلتدی.
[12] اطرافیندا بئر اوووج اِنئنده یان لؤوحه‌لری دوزَلتدی؛ اونلارین اطرافینا دا قیزیل قالئب دوزَلتدی.
[13] مئز اوچون دؤرد قیزیل حالقا تؤکدو، حالقالاری اونون دؤرد آیاغینداکی دؤرد کونجه بَرکئتدی.
[14] حالقالار یان لؤوحه‌لره یاخین اولاراق مئزی آپاران دئرَکلرئن کچدئیی یرلر ائدی.
[15] مئزی آپارماق اوچون دئرَکلری اَقاقئیا آغاجیندان دوزَلتدی و اونلاری قیزیللا اؤرتدو.
[16] مئزئن اوستونده اولان لوازئماتی، نئمچه‌لری و قابلاری، مایع تقدئملرئنئن تؤکولمه‌سی اوچون سَهَنگلری، و کاسالاری خالئص قیزیلدان دوزَلتدی.
[17] چیراقدانی خالئص قیزیلدان دوزَلتدی. بو چیراقدان یاستیلانمیش قیزیلدان ائدی؛ پایاسی، مئله‌لری، پئیالالاری، قؤنچه‌لری و گوللری اونونلا بئر حئصّه‌دن ائدی.
[18] چیراقدانین یانلاریندان آلتی شاخه یعنی اونون بئر یانیندان اوچ شاخه، او بئری یانیندان دا اوچ شاخه چیخدی.
[19] بئر شاخه‌ده بادام چئچه‌یئنه بَنزه‌ر اوچ پئیالا، بئر قؤنچه و بئر گول، او بئری شاخه ده بادام چئچه‌یئنه بَنزه‌ر اوچ پئیالا، بئر قؤنچه، و بئر گول دوزَلتدی؛ چیراغدانین بوتون آلتی شاخه‌لری اله ائدی.
[20] چیراقداندا بادام چئچه‌یئنه بَنزه‌ر دؤرد پئیالا، قؤنچه‌لر و گول‌لر وار ائدی.
[21] چیراقداندان چیخان شاخه‌لرئن بئرئنجی جوتونون آلتیندا بئر قؤنچه وار ائدی. چیراقداندان چیخان شاخه‌لرئن ائکئنجی جوتونون آلتیندا بئر قؤنچه، و چیراقداندان چیخان شاخه‌لرئن اوچونجو جوتون آلتیندا بئر قؤنچه وار ائدی. چیراقداندان چیخان بوتون آلتی شاخه‌ده بله وار ائدی.
[22] قؤنچه‌لری و شاخه‌لری اونونلا بئر حئصّه‌دن ائدی، یعنی هامیسی یاستیلانمیش خالئص قیزیلدان ائدی.
[23] اونون اوچون یدّی چیراق دوزَلتدی. پئلته ماشالاری و سئنی‌لری ده خالئص قیزیلدان ائدی.
[24] چیراقدانی و اونون بوتون لوازئماتینی بئر تالانت خالئص قیزیلدان دوزَلتدی.
[25] اَقاقئیا آغاجیندان بوخور اوچون قوربانگاه دوزَلتدی؛ مورَبّع شَکلئنده ائدی؛ اوزونلوغو بئر قول‌آچ، اِنی بئر قول‌آچ، بویو دا ائکی قول‌آچ ائدی. بوینوزلاری اونونلا بئر حئصّه‌دن ائدی.
[26] اونون اوستونو، هر یانینی و بوینوزلارینی خالئص قیزیللا اؤرتدو، اطرافینا قیزیل زولاق قویدو.
[27] بئربئرئنئن موقابئلئنده اولان ائکی یانلاردا، قالئبئن آلتیندا ائکی قیزیل حالقا دوزَلتدی کی، اونو آپاران دئرَکلر، اونلارین ائچئنه کچسئنلر.
[28] دئرَکلری اَقاقئیا آغاجیندان دوزَ‌لدئب اونلاری قیزیللا اؤرتدو.
[29] عطرئیّاتچینین ائشی اولان موقدّس مسح یاغینی و عطئرلی بوخورو دا حاضیرلادی.