[1] تاری بوتون بو سؤزلری دانیشیب، بله ددی:
[2] «سئزی مئصئر تورپاغیندان، نؤکرچئلئک اِوئندن چیخاردان تارینیز رب، منم.
[3] مندن باشقا آللاهلارین اولمایاجاق.
[4] اؤزون اوچون هچ بئر بوت؛ نه یوخاریدا، گؤیده و یا آشاغیدا، یرده، نه ده یرئن آلتیندا ییغیلان سولارداکی شیلرئن هچ بئرئنئن صورتئنی دوزَلتمیه‌جکسن.
[5] بله شیلرئن قاباغیندا سجده‌یه دوشوب عئبادت اتمه. چونکی من، سنئن تارین رب، قیرتلی‌یَم. مندن نئفرت ادن آتالارین جزاسینی، اوچونجو-دؤردونجو نسئله قدر اؤولادلارینا چکدئره‌رم.
[6] آمّا منی سِوئب امرلرئمه عمل ادنلره، مئنلر نسئله قدر محبّت گؤرسده‌رم.
[7] رب تارینین آدینی بوش یره آغزینا گتئرمه، چونکی رب اونون آدینی بوش یره آغزینا آلانی جزاسیز قویماز.
[8] سَبّت گونونو یاددا ساخلاییب، موقدّس گون کئمی سای.
[9] آلتی گون چالیشیب بوتون ائشلرئنی گؤر.
[10] لاکئن یدّئنجی گون، تاری ربّئن سَبّت گونودور. بو گون سن، اوغلون، قیزین، قولون، کنئزئن، حیوانین، یانیندا یاشایان یاد اِلئن، هچ بئر ائش گؤرمه‌سئن.
[11] چونکی آلتی گون عرضئنده رب گؤیلر و یری، دهنزی و کائناتداکی هر شیی یاراتدی، لاکئن یدّئنجی گون ائستئراحت اتدی. بونون اوچون رب سَبّت گونونه برکت ورئب، اونو موقدّس سایدی.
[12] آتا و آنانا حؤرمت ات کی، تارین ربّئن سنه وره‌جیی تورپاقدا عؤمرون اوزون اولسون.
[13] قتل اتمه.
[14] زئنا اتمه.
[15] اوغورلوق اتمه.
[16] کئمسهنئن ضئدّئنه یالان شاهئدلئک اتمه.
[17] کئمسهنئن اِوئنه، آروادینا، قولونا، کنئزئنه، اؤکوزونه، اِششه‌یئنه، اونون هچ نه‌یئنه طاماح سالما.»
[18] بوتون خالق گؤی گورولتوسونو، شئمشَکلری، کَره‌نای سَسئنی اشئدئب، داغین توستولَنمه‌سئنی گؤرنده تئتره‌دئلر و اوزاقدا دوردولار.
[19] موسایا ددئلر: «سن دانیش، بئز ده اشئدک. قوی تاری بئزئمله دانیشماسین، مبادا اؤلَک.»
[20] موسا خالقا ددی: «قورخمایین، تاری اونا گؤره گلئب کی، سئزی ائمتاحانا چکسئن و اونون قورخوسو گؤزونوزون قاباغیندا اولسون کی، گوناه اتمیه‌سئنئز.»
[21] خالق اوزاقدا دوراندا، موسا اورادا تارینین اولدوغو آغیر قارانلیغا یاخینلاشدی.
[22] رب موسایا ددی: «ائسرایئل اؤولادلارینا بله دئیه‌جکسن: ”سئز گؤردونوز کی، من سئزئنله گؤیلردن دانیشدیم.
[23] مندن ساوایی، باشقا آللاهلار دوزَلتمه‌یئن؛ اؤزونوز اوچون نه قیزیلدان، نه ده گوموشدن آللاهلار دوزَلتمه‌یئن.
[24] منئم اوچون تورپاقدان قوربانگاه دوزَ‌لت. یاندیرما و باریش قوربانلارینیز اولاراق اؤز قویون-کچی و مال-حیوانینیزی اونون اوستونده قوربان اده‌جکسئنئز. آدیمی یادئگار اوچون قویدوغوم هر یره گلئب، سنه برکت وره‌جیم.
[25] اگر منئم اوچون داشدان قوربانگاه دوزَ‌لده‌سن، یونما داشدان تئکمیه‌جکسن، چونکی اونون اوستونده اگر آلَتله ائشلَیه‌سن، اونو نجئس ادرسن.
[26] عاییبین آچیلماماق اوچون، منئم قوربانگاهیما پئلّه ائله چیخمایاجاقسان.“»