[1] «سن اونلارین موقابئلئنه بو حؤکملری قویمالی‌سان:
[2] سئزدن بئری عئبرانی قول آلاندا، او قول آلتی ائل قوللوق ادئب یدّئنجی ائل پولو قایتارمادان آزاد اولونسون.
[3] اگر قولون تک گلئب، قوی تک ده گتسئن؛ اگر آروادی وارسا، قوی آروادی اونونلا گتسئن.
[4] اگر قول صاحئبی قولونا آرواد ورئب و قولون آروادی اوغلان و یا قیز دوغوب، آروادلا اوشاقلاری آغاسی اوچون قالسین. آمّا قول تک گتسئن.
[5] لاکئن اگر قول تأکئدله دسه: ”آغامی، آروادیملا اوشاقلاریمی سوئرم و آزاد اولماق ائسته‌مئرم“،
[6] اوندا قوی قولون آغاسی اونو تارینین حوضورونا گتئرسئن؛ قولونو قاپی‌یا و یا قاپینین یان تاختاسینا سؤیکه‌یئب قولاغینی بئزله دشسئن. بو قول آغاسینا عؤمورلوک قوللوق اتسئن.
[7] اگر بئر آدام قیزینی کنئزلئیه ساتیر، قیز، کئشی نؤکرلر کئمی آزاد اولماسین.
[8] اگر او قیز، اونو اؤزو اوچون تعیئن ادن آغاسینین گؤزونده پئس گؤرونور، آغاسی قیزین گری ورئلمه پولونو قبول ادئب، اونو آزاد اتسئن؛ او آغانین ائختئیاری یوخدور کی، قیزی یاد اِللئلره ساتسین. چونکی او قیزا خیانت ادئب.
[9] اگر آغا کنئزئنی اوغلو اوچون تعیئن ادئب، اونونلا عادته گؤره، اؤز قیزی کئمی رفتار اتمه‌لی‌دئر.
[10] اگر او آدام ائکئنجی آرواد آلیر، بئرئنجی آروادینی یمک و پالتار تأمئناتیندان و آروادلیق حوقوقوندان محروم اتمه‌سئن.
[11] اگر اَری بو اوچ حاقّی آروادا ورمئر، قوی بو آرواد هچ پول قایتارمادان آزاد ادئلسئن.
[12] آدام ووروب اؤلدورن شخص اؤلدورولمه‌لی‌دئر.
[13] لاکئن اگر او شخص اؤلدورمک قصدئنده اولماسا و اؤلوم منئم ائجازمله اولسا، او زامان بئر یر تعیئن اده‌رم کی، اورایا پناه گتئرسئن.
[14] بئر آدام، آیری آدامی قصدن حئیله ائله اؤلدورسه، او آدامی حتّا منئم قوربانگاهیمدان گؤتور کی، اؤلومه ورئلسئن.
[15] آتاسینی، و یا آناسینی دؤیَن آدام اؤلدورولمه‌لی‌دئر.
[16] ائنسان اوغورلاییب ساتان، و یا ساخلایان آدام اؤلدورولمه‌لی‌دئر.
[17] آتا-آناسینا لعنت ادن آدام اؤلدورولمه‌لی‌دئر.
[18] آداملار موناقئشه ادنده، اگر کئمسه آیری آدامین داشلا ووردوغو یا دا یومروغو ائله ووردوغو بئر آدام اؤلمه‌یئب یاتاغا دوشسه،
[19] او سونرا یاتاقدان قالخیب اَل آغاجی ائله اشئکده گزسه، اونو ووران آدام جزاسیز ساییلسین و آنجاق یاتدیغی مودّتئن عوضئنی ورسئن، کامئل صاغالانا قدر اونون قیدئنه قالسین.
[20] بئر آدامین دَیَنَکله ووردوغو قولو، و یا کنئزی ضربه‌دن اؤلدویو حالدا، او آدام جزالاندیریلمالی‌دیر.
[21] اگر قول و یا کنئز بئر-ائکی گون دئری قالسا، آغا جزا چکمه‌سئن؛ چونکی قول، و یا کنئز آغانین اَملاکی‌دیر.
[22] کئشئلر، داعوالاشان زامان، اگر بویلو بئر آروادا ضربه ووروب اونون اوشاغینین دوشمه‌سئنه باعئث اولسالار، آمّا آیری بئر زئیان اونا دَیمه‌سه، تقصئرکار آدام، او آروادین اَرئنئن طلب اتدئیی جرئمه‌نی، حاکئملرئن تعیئن اتدئیی مبلغده وره‌جک.
[23] اگر آروادا زئیان دَیئبسه، تقصئرکار آدام جان عوضئنه جان،
[24] گؤز عوضئنه گؤز، دئش عوضئنه دئش، اَل عوضئنه اَل، آیاق عوضئنه آیاق،
[25] یانیق عوضئنه یانیق، یارا عوضئنه یارا، زَده عوضئنه زَده ورسئن.
[26] اگر آغا قولونون و یا کنئزئنئن گؤزونه ووروب اونو کور اتسه، گؤزونون عوضئنه اونو آزاد اتسئن.
[27] اگر آغا قولونون، و یا کنئزئنئن دئشئنی سیندیرسا، دئشئنئن عوضئنه اونو آزاد اتسئن.
[28] اگر بئر اؤکوز بئر کئشی یا دا بئر آروادی بوینوزلا ووروب اؤلدورسه، اؤکوز گرک داشا باسیلسین؛ اونون اَتی یِیئلمه‌مه‌لی، آمّا اؤکوز صاحئبی گوناهسیز ساییلسین.
[29] لاکئن اگر اؤکوز او واختا قدر ووراغان ائمئش و صاحئبئنئن ده بوندان خبری وار ائمئش، آمّا اونون قاباغینی آلماییب، نتئجه‌ده ده حیوان بئر کئشی و یا آروادی اؤلدوروب، اؤکوز داشا باسیلسین، صاحئبی ده اؤلدورولسون.
[30] اگر حیوانین صاحئبئندن، گری ورئلمه پولو ائسته‌نئلئر، او، ائسته‌نئلَن پولون مبلغئنی گری ورئب، جانینین عوضئنی وره بئلر.
[31] همن حؤکم اوغلانا و یا قیزا بوینوز وورانین ضئدّئنه ده ائشله‌نسئن.
[32] اگر اؤکوز قولو یا دا کنئزی بوینوزو ائله وورسا، اؤکوز صاحئبی، آغاسینا اوتوز شِکِل گوموش ورسئن، آمّا اؤکوز داشلانسین.
[33] بئر آدام چوخور قازیب، اوستونو اؤرتمه‌سه و اورایا بئر اؤکوز و یا اِششَک دوشسه،
[34] چوخور قازان آدام ضررئن بَدَلئنی ورسئن؛ حیوانین دَیَرئنی صاحئبئنه ورسئن، آمّا اؤلَن حیوان او آداما قالسین.
[35] اگر بئر آدامین اؤکوزو آیریسینین اؤکوزونو ووروب اؤلدورسه، صاحئبلر هم صاغ قالان اؤکوزو ساتیب دَیَرئنی یاری بؤلمه‌لی‌دئرلر، هم ده اؤلو اؤکوزو.
[36] آمّا اؤکوزون او واختا قدر ووراغان اولدوغو معلوم اولاندا، اونون قاباغینی آلمایان صاحئبی اؤکوزون عوضئنه اؤکوز ورسئن؛ آمّا اؤلن اؤکوز اونا قالمالی‌دیر.»