[1] موسا و هارون گلئب فئرعونا ددئلر: «ائسرایئلئن تاریسی رب بله دیئر: خالقیمی بوراخ کی، گدئب صحرادا منئم اوچون بایرام توتسونلار!»
[2] آمّا فئرعون ددی: «رب کئمدئر کی، اونون سَسئنه قولاق آسیب ائسرایئل اؤولادلارینی بوراخیم؟ ربّی تانیمیرام، ائسرایئل اؤولادلارینی دا بوراخمایاجاغام.»
[3] اونلار ددئلر: «عئبرانئلرئن تاریسی بئزئمله گؤروشوب؛ قوی صحرادا اوچ گون سفر ادئب، تاریمیز ربّه قوربان تقدئم اِدَک. یوخسا بئزی وبا یا دا قیلینجلا محو اِدَر.»
[4] لاکئن مئصئر پادشاهی اونلارا ددی: «ای موسا و هارون، نه اوچون خالقی ائشئندن سالیرسینیز؟ ائشئنئزئن باشینا دؤنون.»
[5] فئرعون گئنه ددی: «باخین، اؤلکه‌نئن خالقی ائندی چوخدور، سئز، اونلارا، اتدئیی ائشلرئنده مانع اولورسونوز.»
[6] بله‌جه اِله همن گون فئرعون خالقین نظارتچئلرئنه و گؤزَتچئلرئنه امر ادئب ددی:
[7] «خالقا کرپئج دوزَلتمک اوچون بئر داها سامان ورمه‌یئن. قوی اؤزلری گدئب سامان ییغسینلار.
[8] آمّا اونلاردان ائسته‌یئن کی، قاباقکی همن ساییدا کرپئچ دوزَ‌لتسئنلر. کرپئچ ساییسینی آزالتمایین. چونکی اونلار تنبلدئرلر، بونا گؤره ده باغیریرلار کی، ”گدک تاریمیزا قوربان تقدئم ادک.“
[9] قوی زحمتلری داها آغیر اولسون، قوی ائشلرئنه مشغول اولسونلار کی، یالان سؤزلره قولاق آسماسینلار.»
[10] خالقین گؤزَتچئلری و نظارتچئلر، خالقین یانینا گلئب اونلارا ددئلر: «فئرعون بله دیئر: ”آرتیق سئزه سامان ورمه‌یه‌جیم.
[11] گدئن، اؤزونوز هارادان تاپا بئلئرسئنئز، سامان ییغین، لاکئن ائشئنئزدن هچ بئری آزالمایاجاق.“»
[12] بله‌جه خالق بوتون مئصئر تورپاغینا سَپه‌له‌نئب، سامان عوضئنه کولَش ییغماغا باشلادیلار.
[13] نظارتچئلر اونلاری زورلاییب دیئردئلر: «گونده‌لئک ائشئنئزی یرئنه یتئرئن، اله همن قدر کی، سامان ورئلن واخت ادئردئنئز.»
[14] بوندان علاوه، ائسرایئل اؤولادلارینین گؤزَتچئلری کی، فئرعونون نظارتچئلری اونلاری ائش باشینا قویموشدولار، دؤیولوب سوروشولدولار: «نئیه دونَن و بو گون، داها قاباکی ساییدا اولان کئمی کرپئج دوزَلتمه‌یئبسئنئز؟»
[15] او واخت ائسرایئل اؤولادلاریندان اولان گؤزَتچئلر، فئرعونون یانینا گلئب باغیردیلار: «قوللارینلا نئیه بله رفتار ادئرسن؟
[16] قوللارینا سامان ورمئرلر، آنجاق ”کرپئج دوزَ‌لدئن“ دیئرلر. باخ، قوللارین دؤیولور. آنجاق بو سنئن اؤز خالقینین تقصئری‌دئر.»
[17] آمّا فئرعون ددی: «سئز تنبلسئنئز، چوخ تنبل، بونا گؤره ده دیئرسئنئز: ”گدک، ربّه قوربان تقدئم ادک.“
[18] ائندی گدئن ائشله‌یئن. سئزه سامان ورئلمه‌یه‌جک، آمّا گئنه ده همن ساییدا کرپئج دوزَلتمَلی‌سئنئز.»
[19] ائسرایئل اؤولادلارینین گؤزَتچئلری پئس وضعئیّته دوشدوکلرئنی گؤردولر، چونکی اونلارا دیئلدی کی، «سئزئن اوچون موعَیّن اولونموش گونده‌لئک کرپئج ساییسی آزالمایاجاق.»
[20] فئرعونون یانیندان چیخاندا، اونلارا مونتَظئر اولان موسا و هارونلا راستلاشدیلار.
[21] اونلارا ددئلر: «قوی رب سئزئن نه اتدئیئنئزی گؤرسون و جزانیزی ورسئن! سئز بئزی فئرعون و اونون نؤکرلری گؤزونده رَذئل اتدئنئز و اللرئنه قیلینج وردئنئز کی، بئزی اؤلدورسونلر.»
[22] او واخت موسا ربّئن حوضورونا قاییدیب ددی: «ای پروردئگار، نه اوچون بو خالقی بله بلایا سالدین؟ منی نئیه گؤندَ‌ردئن؟
[23] سنئن آدیندا فئرعونلا دانیشماق اوچون گلندن بَری او، بو خالقی بلایا سالیب، سن آمّا خالقینی هچ قورتارماییبسان.»