[1] ¿Kunapachkamarak ukham parlaskakïtasti? Arunakamax mä jach'a thayampi sasiwa.
[3] Taqi ch'aman Tatitux, janipuniw kunapachas kunatix chiqapäki uk maysar q'iwkiti.
[4] Wawanakamatix Dios nayraqatan jucha lurapxchi ukaxa, jupax wawanakamar juchapatjam mutuyi.
[5] Taqi ch'amani Diosar thaqtam, jumat khuyapt'ayasiñapatak mayim.
[6] Jumatix q'uma kankañampi, chiqa kankañamp taqi kunsa luräta ukapachaxa, jupax jumar arxatätamwa, ukatsti kunatix utjkäyätam ukanak kutt'ayxarakïtamwa.
[7] Kuna qamir yänakamatix utjkän ukax, janiw kunäkanisa, kunanakatix qhipat utjkätam ukamp kikipt'ayataxa.
[8] Nayra jaqinakar jiskt'asim, nayra jaqinakan sarnaqäwinakapat yatiqarakim.
[9] Jiwasax masür jaqinakakïtanwa, janiw kuns yatktanti, jakäwisax aka uraqin ch'iwjam sarakipirikiwa.
[10] Ukampis nayra jaqinakaw taqi kunxat parlapxätam, yatichapxarakïtam.
[11] Junco alimpi, papiro alimpix, walja umax utjki ukawjanakan jilanti,
[12] ukampisa, ch'uxñpacha, janïra yawskataw, yaqha alinakat sipan nayra wañsuwayxaraki.
[13] Uka pachparakiw ñanqha jaqinakampix lurasi, Tatitut armasirinakampixa: suyt'äwinakapax ina ch'usarukiw tukuwayxi.
[14] Jupanakan suyt'añapampi alkatañapampisti, kusikusin simpapamp sasikiwa.
[15] Uka simpat waythapisiñ munapxani, ukasti t'aqasxakiniwa, jan ukax, uka simpax janiw jupanakar katxäskaniti.
[16] Ñanqha lurir jaqinakax, ch'uxña alinakampi sasiwa, lupin lupt'atax panqar uypachan saratati,
[17] qarqa taypinakaruw saphinti, qalanakaruw wal katthapisi,
[18] maynitix uka alinak jik'inukuspaxa, janiw khitis yatkaspati uka alinakan ukkhankatapxa.
[19] Ukhamaw kusisit jakañapax tukusiwayxi, uka lantisti yaqha alinakaw ch'ichtanxaraki.
[20] Tatitux aski jaqir janiw apanukkiti, ñanqha jaqinakarus janirakiw yanapt'kiti.
[21] Jupaw jumarux wasitat larusiyxätam, kusisiñatsa arnaqasiyxarakïtam;
[22] ukampisa, uñisirinakamax p'inqachjataw uñjasini, ñanqha jaqinakan utapasti t'unjataw uñjasirakini.