[1] Taqi akanak pachpa nayraxampiw uñjta, pachpa jinchuxampiw ist'arakta.
[2] Jumanakax yatipkta ukanakxa, nayax yatiraktwa; janiw kunansa jumanakat pisïkti.
[3] Ukampis nayax Diosampiw parlañ munirista, taqi ch'aman Tatitumpiw nayax arusxatañ munarakirista.
[4] Jumanakax chiqapäki ukxa k'arisiñampiw imt'apxtaxa, jan khitirus waliptayir qullirinakäpxtawa.
[5] ¡Amukt'apxakismasa, aski yatiñan jaqinakat uñt'ayasipxasma!
[6] Jichhax sum ist'apxam, nayax arst'asirakïwa.
[7] ¿K'ari amuyunak arsusati Diosampi askit uñt'ayasiñ munapxtasti? ¿sallqjañanakampit jupar arxatañ munapxäta?
[8] Jumanakax Diosat arxatasiriw tukupxtaxa, jupan arxatiripäpkasmas ukham amuyasipxtaxa.
[9] Ukampisa, ¿kunas kamachaspa Diosatix jumanakar chuymanakam uñantapxiristam ukkhaxa? ¿Jumanakasti mä jaqirjamati sallqjapxasmaxa?
[10] Diosax tuqinuqapxiristamwa, jumanakatix k'arinakampi jupar arxatañ munapxasma ukaxa.
[11] Diosan ch'amapax sinti jach'awa, jumanakarusti axsarañat khathatiyapxiristam.
[12] Jumanakan arunakamax jan kunatak inamay laq'amp sasiwa, ñiq'i pirqanakampi jark'aqasiñ munksnas ukhamakiwa.
[13] Jichhasti, ¡amukt'apxam, nayaw arsusirakï, kunasaya, kawkisaya nayatak utjaskpan!
[14] Jiwañaxas wakisinixa janiw axsarkäti, taqi kun apt'asirjamäkä ukas arsusiskakïwa.
[15] Jupax jiwaykitani ukasa, sayt'asiskakïwa, ajanuy ajanuw jupan nayraqatapan sarnaqäwixat arsusï.
[16] Inas ukhamat qhispiskirista, janiw mä ñanqha jaqix nayraqatapar uñstkaspati.
[17] Jichhasti sum ist'apxam, kuntix sapkäm uka arunaka.
[18] Arsusiñatak wakicht'atäxtwa, Diosan jan juchanïtax uñjañap yatirakta.
[19] Maynitix nayar kunatsa juchañchañ munchituxa, nayax amukïxäwa, janipuniw wasitat arskxäti.
[20] Dios Tatay, pä amuyuxaruki jayst'ita, jaysitäta ukaxa, janiw nayax jumat imantaskäti:
[21] Jan juk'amp mutuykxistati, janirak ukataq axsaraykxistati.
[22] Jawsitaya, nayasti ist'ämawa, munsta ukaxa, naya nayraqat arsü, ukat jumax jaysanitäta.
[23] Jichhasti sitaya, ¿kunarak juchaxasti? ¿Kunarak jan wali luratanakaxasti?
[24] ¿Kunatarak nayatak imantastasti? ¿Kunatarak nayar uñisirimarjam uñjistasti?
[25] Nayax waña laphimpi sasiktwa, ¿kunatarak nayar t'unjañ munistasti? Nayax waña jichhumpi sasiktwa, ¿kunatarak nayar arknaqistasti?
[26] T'aqhiskañ juchañchäwinak nayatak apantaxa; wayna kankañaxan pantjasitaxat t'aqhisiyaskistaxa.
[27] Kayunakaxarus maniyampiw ñach'antistaxa, chillqtatanakaxsa uñch'ukisktawa, takt'atanakaxsa uñakiparaktawa.
[28] Ñusantatäkiristsa ukhamaw nayax tukusiskta, thuthan thutjat isir uñtataw tukusiskarakta.