[1] Ukhamasti, Job, arunakax ist'ita, arsutanakaxar amuyump isch'ukim.
[2] Lakaxankxiw jumar sañaxa:
[3] Taqi chuymaw jumar sarakïma, nayan amuyt'a arunak qhan sarakïma.
[4] Taqi ch'aman Diosaw nayarux irnuqitu, ajayupampiw jakañ churarakitu.
[5] Wakischi ukax, arsusim; arsusiñatak wakichasim.
[6] Jumampi, nayampix Diosan nayraqatapan mayakïtanwa; nayas ñiq'ita luratakirakïtwa.
[7] Ukhamax janiw kunat axsarañamas utjañapäkiti, janiw nayax jumat sipan juk'amp yatiñanïkti.
[8] Jumarux ist'asamachaksmawa, akham siri:
[9] “Nayax q'umätwa, janiw juchanïkti, janiw pantjasitaxasa, juchaxas utjkituti.
[10] Ukampis Diosax kunat juchañchañsa thaqhapuniwa, mä uñisiriparjamaw uñjarakitu;
[11] kayunakaxarusti cadenampiw ñach'antitu, sapa chillqtäwixa uñch'ukirakitu” sasa.
[12] Amuyam, janiw uka arsutamax chiqapäkiti, Diosax jaqinakat sipan juk'amp jach'awa.
[13] ¿Kunatarak Diosatak arsustasti? ¿Arsusitanakamar jan jaysatapatti ukham parlta?
[14] Diosax kunayman tuqit jiwasarux parlistu, jiwasasti janiw amuyasktanti.
[15] Yaqhip pachanakax arumanakaw parlistu, mä samka tuqi, jan ukax mä unañchäwi tuqi, jaqinakax ikimpi atipjayasipki ukapacha.
[16] Diosax jinchu jak'atak jaqinakarux parli; arsutanakapampi iwxt'asax axsarayiwa,
[17] jan wali luräwinakat jithiqtañapataki, jach'a jach'a tukuñat jithiqtañapataki.
[18] Ukhamat jupax sepulturar puriñat qhispiyi, jiwañatsa qhispiyaraki.
[19] Yaqhip kutinakax Diosax usuñanakampiw jaqirux chiqachi, janchiparus wali usuyasaraki.
[20] Manq'añanakax qawqhasa sumäskpan, jan manq'kañaw tukurapxi.
[21] Janchipas q'alaw tukusiwayxi, ch'akhanakapas uñstxarakiwa.
[22] Jakañapax amay imäwiruw jak'achasiski, jiwañana punkupankarakiwa.
[23] Ukampis jupa jak'antix mä angelax utjchi, waranqat maynikis jupat arxatasis parlpan, chiqa aski jaqïtapat arsurakpan;
[24] jupat khuyapt'ayasisarak Diosar sarakpan: “Jiwañat qhispiyam, qhispiyasiñap jikxatta” sasa.
[25] Ukapachaw janchipax wasitat k'umar uñjasxani, ukatsti wayna urunakaparuw kutjtani.
[26] Diosaruw mayisini, jupasti ist'arakiniwa; kusisiñampiw Diosarux ajanuy ajanu uñkatani, jaqinakarusti Diosan khuyapayasiñapat q'uchuni.
[27] Sarakiniwa: “Juchachastwa, kunatix jan chiqapäki ukanak lurta, ukampis Diosax janiw mutuyañ munkituti;
[28] ukat sipana, nayarux jiwañat qhispiyitu, qhansa uñjaskaraktwa” sasa.
[29] Diosax jaqirux ukham uñji, mayampi, mayampi ukham uñji;
[30] jiwañat qhispiyi, qhansa uñjayaskarakiwa.
[31] Job, jichhax amuyump ist'ita; arsutanakaxar amuk isch'ukim.
[32] Kuna arsusiñam utjipansa, arsuskakita; arsusitamatix chiqapäni ukapachax, taqi chuymaw iyawsäma;
[33] janitix chiqapäkchi ukapachasti, amuki ist'ita, nayaw jumarux yatiñ kankañat yatichäma.