[1] Job, inas jumatak jan walïkchiniti maynin jumar parlxayañapaxa, ukampis janiw amukïñjamäkiti.
[3] Jumax waljaniruw nayrax yatichäyätaxa, pisi ch'amaniruw ch'amañchäyätaxa;
[4] arunakamampiw llakit jaqinakaru, aynacht'ir jaqinakar ch'amañchäyätaxa.
[5] Jichhax jumaruw t'aqhisiñax puriraktam ¿axsarayasïtati, khathatirakïtacha?
[6] ¿Janit iyawsañamasti Diosar axsartañ chuymäkxisti?, ¿janit chiqap sarnaqäwimasti suyt'añamäkxisti?
[7] Amuyt'asim, amthapisirakim, ¿khiti jan juchan jaqirak tukusiyat uñjasisti? ¿kawkïr aski jaqirak t'unjat uñjasisti?
[8] Nayarux sarnaqäwiw yatichitu, ñanqha lurañanakan sarnaqirinakax luratapatjam achunak apthapi.
[9] Diosax phiñasiñapan jupanakxar phust'ani, samanapakiw jupanakar q'al tukji.
[10] Leonanakar uñtatas jach'at wararisipkpan, Diosaw jupanakarux laka ch'akhanakap t'unaras amukt'ayani.
[11] Manq'at awtjat leonanakar uñtataw jiwarani, wawanakapasti ananukutaw uñjasini.
[12] Mä aruw jinchuxar purinitu, k'achat uxurjamak ist'ta.
[13] Arumasti, ikix jaqinakar atipjki ukapachaw, mä jan wali samka uñjta.
[14] Axsarañaw nayarux katuntxitäna; ch'akhanakaxas wal khathatirakïna.
[15] Mä ch'uch'u thayaw ajanuxa sarakipawayi, ñik'utanakaxas q'alaw sayarawayi.
[16] Mayniw ukankaskäna, sayatap uñjarakta, ukampis janiw ajanup uñkatkti. Taqi kunas ch'ujtatakïnwa. Ukatsti mä aru ist'arakta:
[17] “¿Jaqix Diosan nayraqatapan askïspati? ¿Jupar irnuqasir Diosapan nayraqatapan q'umat jikxatasispa?
[18] Diosax janiw angelanakaparus alkatkiti, jupanakan pantjasirïpxatap layku,
[19] ¡ukatsa juk'ampiw jaqir jan alkatkaspati, jaqin t'ukhätap layku, laq'a patxar utachat ñiq'i utar uñtatätap layku, ukanakasti thuthar uñtat pallalljatäspawa!
[20] Mä arumakiw t'unjat uñjasi, wiñayatakiw jiwawayxi, janiw khitirus jiwatapax llakisiykiti.
[21] Jaqin jakañapax ch'ankhas t'aqaskaspa ukar uñtatakiw tukusi; yatiñ kankañ jan jikxatasakiw jiwawayxaraki.”