[1] Nayatakix kusisiñäspaw jumanakatix nayar ist'apxitasma ukaxa.
[3] Nayan parlañaxkamax llamp'u chuymampiy ist'apxita, uka qhipat larusiñ munapxäta ukasa, larusisipkäta.
[4] Nayan arsusitaxax janiw khiti jaqitakïkisa; janiw aliqat arsuskaraktti.
[5] Jumanakatix ist'apxitätaxa, axsarañatsa amutuw uñjasipxäta.
[6] Naya pachpaw ukanak lup'isax axsarayasta, janchixas khathatirakiwa.
[7] ¿Kunatarak ñanqha lurir jaqinakasti jakasipkakisti, chuyman tuqirus ch'aman phuqt'atäsipkarakisti?
[8] Wawanakaparusa, allchhinakaparus jilarir uñjasipkaraki; uka wawanakapasa, allchhinakapasa jupa jak'an janiw kunatsa llakisipkiti.
[9] Janiw kunas jupanakar ñanqt'aykiti, Tatitus janirakiw jupanakar mutuykiti.
[10] Uywanakapax jupanakatak wal miranti; uywanakapan qallunakapasti janirakiw jiwarkiti.
[11] Wawanakapasti oveja qallunakjamaw uksa aksa chhukhunaqas sink'usipxi,
[12] kusisitaw thuqhupxi, t'isktapxaraki arpana, tamboranakana, pinkillunakan phust'asitapampi.
[13] Wali qamiriw sarnaqawayapxi; jan kuna llakiniw jiwawayxapxaraki.
[14] Diosarux sapxiwa: “¡Jan parlapxistati, janiw nanakax kamachinakam yatiñ munapkti!
[15] ¿Khitirak taqi ch'aman Diosasti jupar luqtaskañasatakisti? ¿Kuna askirak jikxattan jupa nayraqatan killisisasti?” sasa.
[16] Ukampis ñanqha lurir jaqinakatakix kusisiñanakapax janiw amparapankkiti. ¡Ñanqha lurir jaqinakjam amtañax nayat jayankpan!
[17] ¿Kunapacharak ñanqha lurir jaqinakast janïräkasin jiwapxisti? ¿Kunapacharak jupanakasti chijinakar puripxisti? ¿Kunapacharak Tatitusti jupanakatak q'apisisin t'aqhisiyisti?
[18] ¿Kunapacharak jupanakasti tutuka thayampi jichhur uñtat willinukut uñjasipxisti?
[19] Satarakiwa: “Diosax awkinakapan juchanakapat wawanakaruw t'aqhisiyi” sasa. Ukampis pachpa ñanqha lurir jaqiw t'aqhisiskañapa, juchapatsa phuqhaskañaparaki.
[20] Jupaw Taqi ch'amani Tatitut mutuyäwip katuqaskañapa.
[21] Jiwatap qhipatsti, wila masinakapax janiw jupatakix kuna llakïkxisa.
[22] Ukampisa, ¿khitirak Diosar yatichaspasti?, jupax alaxpachan utjirinakarus juchañchiwa.
[23] Yaqhipanakax k'uchikiw jiwawayxapxi, ch'amani, kusisita, jan kuna llakini,
[24] wali k'umara, qamir yänakan phuqt'ataraki.
[25] Yaqhipanakasti aynacht'atakiw jakasipxi, kusisiñ jan uñt'asakiw jiwawayxapxaraki.
[26] Ukampisa, amay imäwin mayakïxapxiwa; taqinirus laq'unakaw manq'antxi.
[27] Nayax jumanakan lup'itanakam yatta, nayar ñanqha lurañ amtatanakamsa amuyaraktwa.
[28] Jiskt'asipxaraktawa: “¿Kawkinkarak uka ñanqha jaqin utapasti?” sasa.
[29] ¿Janit thakhi sarir jaqinakar jiskt'asipktasti? ¿Janit jupanakan parlatap ist'apktasti?
[30] Jupanakax sapxiwa: “Diosax q'apisiñapan mutuyäwi apayani, ukampis ñanqha lurir jaqirux, janiw kunas kamachkiti” sasa.
[31] Janiw khitis ñanqha luratanakap ajanupar irkatkiti, janiw khitis juchapatjam mutuykarakiti.
[32] Jiwxi ukapachasti, walja jaqinakaw imäwipar sarapxi jupan nayraqatapa, jupan qhipapa, amay imäwi jak'ansti uñjirinakaw uñjapxi, jupatak uraqi allsuñas jasakirakiwa.
[34] ¡Jumanakax inamayaw nayar chuymachañ munasipkistaxa! ¡Jumanakan arsutanakamax k'arikamakiwa!